「大頭文！你仲有機會呀」—BMW 218d Gran Tourer

文：MenClub John Chan　　圖：MenClub

POSTED ON 22 May 2017

本港柴油私家車新例將於十月一日推行，大部份現有新款柴油私家車未必能夠順利過渡。講得白啲，大家仲有四個幾月買全新柴油私家新車。

香港再次有柴油私家車引入，要回數到2008年至2009年初，當時嘅奧迪Q7 3.0 TDI Clean Diesel打破悶局，之後斷斷續續有新款柴油私家車引入，要數近年我較喜歡嘅例子，有寶馬320d房車、X1 sDrive18d、平治E220 BlueTEC、Mazda 6 Diesel 2.2。

其實，無論係日本或歐洲品牌，都有唔少優質盤，去到呢個「尾聲」階段，柴油私家車「三十幾萬」就有一部，儘管冇可能好似歐洲或日本咁，有啲再平嘅新盤，但都已經比我預期好。未來幾年，仲會唔會有柴油私家車符合新例順利來港呢？好難講，畢竟「柴油門」事件已令歐洲汽車業界重新審視，甚至拍停柴油引擎技術嘅中長線發展。話鬼知佢，活在當下，睇睇仲有乜慳油筍盤啱用，嘭嘭聲俾錢。

幾個星期前試揸咗218d Grand Tourer，直至近日先有空執筆，請各位見諒。揀柴油版2系Grand Tourer，梗係貪柴油襟燒，入一缸有排行。廠方耗油數字，每4.5公升行到100km，以每公升柴油約9.5元（已扣減折扣），即係每公里約4毫幾。我哋今次試車由九龍區出發，經沙田、大埔、大尾督到鹿頸，然後折返九龍，耗油約每5.3公升行100km，即係每公里約5毫，都係嗰句，好鬼抵呀，大大聲喺fb日灑夜曬啦。

我哋喺2014年底試揸過5個座位嘅225i Active Tourer（http://menclub.hk/auto/1436），當時我哋認為佢231匹嘅馬力偏大，五人嘅廣體家庭車唔使咁大power嘅，而且懸掛表現冇3系或1系咁柔韌同貼服。事隔兩年多，今次試嘅218d Grand Tourer，配石橋Turanza T001 205/55 R17 Run Flat Tyre，而上文提及嘅225i Active Tourer，配石橋Potenza S001 225/45 R18 Run Flat Tyre。兩款車胎雖然都係RFT，但前者明顯走舒適、寧靜嘅路線，再加上厚度不同，即時畀到感覺你：「呢部前驅2系好坐咗好多喎！」當然，認真啲去比對specs，兩部車嘅配搭有好大分別。

218d Grand Tourer喺一般巿區行車，高速巡航，好易揸，零壓力。但喺窄彎揸快啲，又或者喺高速公路天橋彎位，佢嘅前驅車特性明顯得有點老派，容我講清楚啲：218d Grand Tourer喺你扭軚入彎嘅第一刻，佢仲算樂意遵從指令，但喺靠近彎心之際，車身外側嘅傾幅多咗啲。我反覆喺類近地形嘅彎位揸咗多次，其實唔影響成部車嘅循跡力，肯定係安全嘅。但從駕駛者角度，就係「唔夠爽，唔夠俐落，唔夠一氣呵成」，未習慣之際，可能會喺走彎過程中，不自覺想修正軚盤角度。在我歷年嘅試車記憶中，近七、八年已冇見過歐洲同類廣體家庭車有咁嘅情況。

218d Grand Tourer嘅2公升直四Turbo柴油引擎，最大馬力150匹/4000rpm，峰值扭力33.6kgm。上車閂埋門，揀NORMAL行車模式，龜速到70km/h輕輕畀住油慢揸，引擎震盪好輕微，唔嘈，喺呢個狀態之下，引擎好順，波箱轉波唔算好快，但醒目，一夠力就好快跳到5、6波。我好鍾意呢種最新款柴油引擎嘅輕快feel，不費吹灰之力，已喺吐露港公路跑上100km/h。就算要急速爬頭，輕輕篤一篤油門，引擎就有股內勁推住你上。

我揸過近年幾款寶馬柴油私家車，佢哋嘅SPORT行車模式，係巿場上少有能夠有凌厲衝刺感，但又唔多畀你feel到柴油引擎喺高轉（約由2800rpm至4000rpm）嘅嘮嘈同震盪，呢樣係值得拍多兩吓手。不過，SPORT行車模式只適合快揸時使用，入到巿區仲hold住SPORT模式，燈位起步同頭幾個波段嘅轉波都唔夠順，都係轉返用NORMAL啦！

2系Grand Tourer比2系Active Tourer多兩個位，只賣三十零萬，畀在我，一見到廣告就「仆到去」，咁係好正常。 2系Grand Tourer採用2+3+2座位佈局，揭開中門望望，最尾排兩個位有少少undersized，類近設計常見於歐洲汽車界，大家心知肚門尾門係畀你「臨時坐吓」，坐住穿州過省一定唔自在，再講得直啲白啲，純粹係「湊夠數七個好睇啲」。我試坐過，可能因為雙腿唔算長，還可以嘅，但進出時，必須跨大步，上車唔難，落車時要小心，唔好咁急，避免踏空。揸車嗰個，最好停個空位多啲嘅上落點，錫住尾排乘客。

行李艙，好大，未放平已有645公升，就算3系GT都唔係佢對手。車廂載貨空間容積最高可以增至1995公升。4.55米長嘅7人車有呢個空間尺碼，算幾好㗎喇。

所謂各有各理，各有考量，廢排標準高如Euro 6嘅德國柴油私家車，都極可能過唔到新例（加州LEV III標準），實在令人感慨，霎時間真不知如何描述心情我想借用1993年電影《風塵三俠》結尾前嘅一小段對白。程仁（梁家輝）喺教堂對大頭文/陳大文（梁朝偉）講：「惠芳（袁詠儀）走咗，我抱憾終生……你而家仲有機會，阿Cat（柏安妮）喺門口等緊你呀！」機會嘅嘢…… 希望你唔會買咗一年之後就嗌悶，話要賣車啦。

BMW 218d Grand Tourer規格售價：$359,900 代理：BMW HK http://www.bmwhk.com 車型：五門掀背七座體積：（長）4556mm x （闊）1800mm x （高）1608mm 軸距：2780mm 引擎：1995c.c. 直列4汽缸柴油Turbo 馬力：150ps/4000rpm 扭力：33.6kgm/1750rpm 波箱：8前速自動附手動轉波功能懸掛：（前）麥花臣支柱；（後）多連桿制動：（前）透氣碟；（後）透氣碟車重：1525kg 加速：0至100km/h加速9.3秒極速：205km/h 耗油：4.3l-4.5l/100km（廠方測試值）輪胎：Bridgestone Turanza T001 RFT 205/55 R17

MERCEDES-BENZ E500 AMG

LAND ROVER DISCOVERY SPORT SE

download menclub auto

本港柴油私家車新例將於十月一日推行，大部份現有新款柴油私家車未必能夠順利過渡。講得白啲，大家仲有四個幾月買全新柴油私家新車。

香港再次有柴油私家車引入，要回數到2008年至2009年初，當時嘅奧迪Q7 3.0 TDI Clean Diesel打破悶局，之後斷斷續續有新款柴油私家車引入，要數近年我較喜歡嘅例子，有寶馬320d房車、X1 sDrive18d、平治E220 BlueTEC、Mazda 6 Diesel 2.2。

其實，無論係日本或歐洲品牌，都有唔少優質盤，去到呢個「尾聲」階段，柴油私家車「三十幾萬」就有一部，儘管冇可能好似歐洲或日本咁，有啲再平嘅新盤，但都已經比我預期好。未來幾年，仲會唔會有柴油私家車符合新例順利來港呢？好難講，畢竟「柴油門」事件已令歐洲汽車業界重新審視，甚至拍停柴油引擎技術嘅中長線發展。話鬼知佢，活在當下，睇睇仲有乜慳油筍盤啱用，嘭嘭聲俾錢。

幾個星期前試揸咗218d Grand Tourer，直至近日先有空執筆，請各位見諒。揀柴油版2系Grand Tourer，梗係貪柴油襟燒，入一缸有排行。廠方耗油數字，每4.5公升行到100km，以每公升柴油約9.5元（已扣減折扣），即係每公里約4毫幾。我哋今次試車由九龍區出發，經沙田、大埔、大尾督到鹿頸，然後折返九龍，耗油約每5.3公升行100km，即係每公里約5毫，都係嗰句，好鬼抵呀，大大聲喺fb日灑夜曬啦。

我哋喺2014年底試揸過5個座位嘅225i Active Tourer（http://menclub.hk/auto/1436），當時我哋認為佢231匹嘅馬力偏大，五人嘅廣體家庭車唔使咁大power嘅，而且懸掛表現冇3系或1系咁柔韌同貼服。事隔兩年多，今次試嘅218d Grand Tourer，配石橋Turanza T001 205/55 R17 Run Flat Tyre，而上文提及嘅225i Active Tourer，配石橋Potenza S001 225/45 R18 Run Flat Tyre。兩款車胎雖然都係RFT，但前者明顯走舒適、寧靜嘅路線，再加上厚度不同，即時畀到感覺你：「呢部前驅2系好坐咗好多喎！」當然，認真啲去比對specs，兩部車嘅配搭有好大分別。

218d Grand Tourer喺一般巿區行車，高速巡航，好易揸，零壓力。但喺窄彎揸快啲，又或者喺高速公路天橋彎位，佢嘅前驅車特性明顯得有點老派，容我講清楚啲：218d Grand Tourer喺你扭軚入彎嘅第一刻，佢仲算樂意遵從指令，但喺靠近彎心之際，車身外側嘅傾幅多咗啲。我反覆喺類近地形嘅彎位揸咗多次，其實唔影響成部車嘅循跡力，肯定係安全嘅。但從駕駛者角度，就係「唔夠爽，唔夠俐落，唔夠一氣呵成」，未習慣之際，可能會喺走彎過程中，不自覺想修正軚盤角度。在我歷年嘅試車記憶中，近七、八年已冇見過歐洲同類廣體家庭車有咁嘅情況。

218d Grand Tourer嘅2公升直四Turbo柴油引擎，最大馬力150匹/4000rpm，峰值扭力33.6kgm。上車閂埋門，揀NORMAL行車模式，龜速到70km/h輕輕畀住油慢揸，引擎震盪好輕微，唔嘈，喺呢個狀態之下，引擎好順，波箱轉波唔算好快，但醒目，一夠力就好快跳到5、6波。我好鍾意呢種最新款柴油引擎嘅輕快feel，不費吹灰之力，已喺吐露港公路跑上100km/h。就算要急速爬頭，輕輕篤一篤油門，引擎就有股內勁推住你上。

我揸過近年幾款寶馬柴油私家車，佢哋嘅SPORT行車模式，係巿場上少有能夠有凌厲衝刺感，但又唔多畀你feel到柴油引擎喺高轉（約由2800rpm至4000rpm）嘅嘮嘈同震盪，呢樣係值得拍多兩吓手。不過，SPORT行車模式只適合快揸時使用，入到巿區仲hold住SPORT模式，燈位起步同頭幾個波段嘅轉波都唔夠順，都係轉返用NORMAL啦！

2系Grand Tourer比2系Active Tourer多兩個位，只賣三十零萬，畀在我，一見到廣告就「仆到去」，咁係好正常。 2系Grand Tourer採用2+3+2座位佈局，揭開中門望望，最尾排兩個位有少少undersized，類近設計常見於歐洲汽車界，大家心知肚門尾門係畀你「臨時坐吓」，坐住穿州過省一定唔自在，再講得直啲白啲，純粹係「湊夠數七個好睇啲」。我試坐過，可能因為雙腿唔算長，還可以嘅，但進出時，必須跨大步，上車唔難，落車時要小心，唔好咁急，避免踏空。揸車嗰個，最好停個空位多啲嘅上落點，錫住尾排乘客。

行李艙，好大，未放平已有645公升，就算3系GT都唔係佢對手。車廂載貨空間容積最高可以增至1995公升。4.55米長嘅7人車有呢個空間尺碼，算幾好㗎喇。

所謂各有各理，各有考量，廢排標準高如Euro 6嘅德國柴油私家車，都極可能過唔到新例（加州LEV III標準），實在令人感慨，霎時間真不知如何描述心情我想借用1993年電影《風塵三俠》結尾前嘅一小段對白。程仁（梁家輝）喺教堂對大頭文/陳大文（梁朝偉）講：「惠芳（袁詠儀）走咗，我抱憾終生……你而家仲有機會，阿Cat（柏安妮）喺門口等緊你呀！」機會嘅嘢…… 希望你唔會買咗一年之後就嗌悶，話要賣車啦。

BMW 218d Grand Tourer規格售價：$359,900 代理：BMW HK http://www.bmwhk.com 車型：五門掀背七座體積：（長）4556mm x （闊）1800mm x （高）1608mm 軸距：2780mm 引擎：1995c.c. 直列4汽缸柴油Turbo 馬力：150ps/4000rpm 扭力：33.6kgm/1750rpm 波箱：8前速自動附手動轉波功能懸掛：（前）麥花臣支柱；（後）多連桿制動：（前）透氣碟；（後）透氣碟車重：1525kg 加速：0至100km/h加速9.3秒極速：205km/h 耗油：4.3l-4.5l/100km（廠方測試值）輪胎：Bridgestone Turanza T001 RFT 205/55 R17