「如果係真真正正『懷著謙卑的心』，就唔會衝出嚟認＿認＿爭住認第一，仲要扮唔好意思企出嚟認第二。」

我諗係因為真切地認識自己有所不足，冇誤以為自己瓣瓣掂，好打得，所以謙卑。

認，有兩種層次，心底同自己「認」，鼓勵自己，ok的；

另一種係喺別人面前自認。你唔係車行營業員，唔使對住人客講：「我哋呢款車，喺同級車中敢認第二，冇人認第一」呢類可能令人覺得有自負味道嘅說話。

呢個年代，自己（人、公司）做咗件自豪嘅事或產品，不妨落力少少畀人知，但唔好吹得太大，吹到過火。網絡年代，透明度高咗好多好多，大搖大擺企出嚟「我至叻」認第一，甚至開到口話：「唔好因為妒忌我而唔開心喎！」咁係好傻，亦都好戇居。

認第二，已經「好盡」。

呢篇好明顯唔係CX-3廣告專輯，如果你睇完依然有「賣廣告」或不快感覺，咁請恕小弟辦事不力，無法再「服務」閣下嘞。

講講部份人眼中嘅CX-3缺點，2公升自然吸氣引擎，冇Turbo、160匹都唔夠、冇雙離合器（Dual Clutch）自動波箱、車廂唔夠大、「點解唔學Mazda6有柴油引擎版」、日本車始終唔及歐洲車「鋼水」好⋯⋯仲有冇？

2800rpm係引擎聲浪高低嘅轉折點，2800rpm內嘅寧靜程度不俗

相比CX-5、CX-7同五十幾萬大大部嘅CX-9，CX-3係屬於小型SUV，歐洲稱為Compact Crossover，呢類車建基於車廠嘅小車底盤，最佳例子有近六、七年喺歐洲好好賣嘅日產（Nissan）Juke，佢建基於同門小車March（歐洲稱為Micra）。CX-3建基於Mazda2，只有4.27米長，當然唔會好似CX-5（4.5米長）或日產Qashqai（4.4米長）咁大部。

所以，先要問自己想買一部空間有幾大嘅車，如果你係「空間愈大愈好」嘅買家，CX-3一定唔啱你，唔好講試車、睇車，連睇網頁都可以慳返。

我覺得，CX-3、Juke、本田（Honda）Vezel或已經於日本推出嘅豐田（Toyota）新一代小型SUV──C-HR嘅買家，正正就係唔想部SUV咁「大嚿」論盡，又或者係揸開小車，夠期換車又唔想再揸返小車或小型SUV，見咁多人都揸SUV，不如整部試吓啦，畀多五、六萬，又唔係貴好多。

站在個人角度，我都想CX-3配Turbo引擎，應該話，我想所有呢類小型SUV都配Turbo引擎，低扭更肥更厚，加個主動啲、聰明啲嘅自動波，舒服得又快得！但係，每間車廠喺動力同傳動系統嘅設計方針都有唔同，消費者有時只能妥協。

睇返呢類小型SUV，即使配Turbo引擎，峰值扭力介乎18kgm至25kgm（視乎引擎容積），CX-3有20.8kgm，都ok喎。當然啦！Turbo引擎同自動吸氣引擎嘅動力帶係有明顯分別，前者千零轉已嚟晒峰值扭力，後者，可能要到三千零四千轉。

CX-3嘅2公升自然吸氣引擎，屬Skyactiv高壓縮比（13.0:1）設計，加上刻意將低扭輸出時間推前，2800rpm已嚟晒峰值扭力，而CX-3車身唔算重，只係1226kg，即使冇Turbo，喺荃錦公路遇上慢車流上斜，2000rpm內嘅扭力都算幾好。

個人認為，SPORT駕駛模式只靠「拉高轉數，榨取多啲動力」嘅手法唔算新奇高效，唔著佢反而更順更爽

呢副6前速自動波箱算幾主動，由康樂園經林錦公路到石崗迴旋處，無論喺上斜同落斜（過咗嘉道理農場之後嘅長命斜）都派到個好合適嘅波段，雖然只係6個前速，但印住印住油門夠力攀斜坡，落斜又唔使踩咁深brake，配合引擎制動（engine braking）減慢車速落斜，比配搭CVT無段變速自動波箱嘅對手，明顯安穩同受控。

沿荃錦公路經軍營上山，喺多個手臂上斜彎，每當出彎再畀油算幾好力，唔使刻意畀大油扯高轉數，總係有一股內勁喺度等你用。值得留意，我喺剛才提及嘅試車路段全程用D波，冇用手動轉波模式，純粹由電腦發辦話事，但竟然做到「自動自覺兼醒目生性」，我係有啲喜出望外。

CX-3嘅操控相當靈活，同Juke差不多，但CX-3嘅車架實淨得多，喺全段荃錦公路走咗幾轉，唔覺佢有好明顯扭擺，以日本同級車嚟講，佢應該係最紮實。輸港CX-3屬前驅版，無獨有偶，英國右軚版都係只得前驅版。

由荃錦公路「英雄亭」到甲龍林徑呢一段，路面起伏大，呢部i-Plus版配18吋嘅215/50 R18輪胎，可能因為胎氣打得多咗啲，早段緩震表現只算一般，彈跳多啲，但懸掛喺呢種狀態下熨貼路面嘅能力仍然唔錯，mechanical grip係豐富嘅，如果喺呢個位插入一句：「呀！因為呢，CX-3配備G-Vectoring Control車身穩定系統，所以咪咁好囉！」，咁嘅手法著實有啲輕率。

你有機會試車的話，自己感受吓。

放低後座椅背，車廂置物空間增至1174公升

後座椅背繫緊按掣嘅外框容易夾到指頭嫩肉，有待改進

我唔會用試掀背小車（例如Mazda2）嘅標準去睇CX-3，因為無論由試車完畢到執筆一刻，我都唔覺佢係咩矯若游龍、行雲流水，又或者咩無敵彎王，但佢實實在在係一部動傳（動力及傳動）組合、車體動態好協調嘅一部高身細車，輕輕鬆鬆順住畀油扭軚，佢已經好流暢，揸快少少，畀油重啲，佢又可以陪你chok個「認真」mode，加、減速嘅節拍即時變得緊湊、肯定，呢種感覺肯定談唔上「高性能」啦，我亦唔想求其用「Sporty」或「跑味」形容就收工去也。

應該話：清爽、硬朗。

呢種DNA喺今代（ND）、第二代MX-5（NB）同第三代輸港嘅1.5公升5速棍波Mazda2都有

導航系統設計算仔細，唯輸入中文地址嘅方法較花時適應

我見有部份網民評價CX-3時，只將焦點放喺佢兩個版本（CX-3 High $249,000同CX-3 i-Plus $274,900）嘅配備差異，例如：「多兩萬六有齊Bose喇叭、轉波撥片、車門裙腳、18吋胎軨、車道偏離警示系統、電動玻璃天窗（仲有啲，懶去數）喎！」

我想引用「志偉哥」喺《龍咁威》講過嘅一句話：「切忌貪果盤！」

大哥！買車唔好淨係望實個option list同各個版本嘅差價，汽車主體同本質掂唔掂，啱唔啱你先係最重要！

售價：$249,900（CX-3 High）$274,900（CX-3 i-Plus）

代理：Vang Lek Motors (Hong Kong) www.mazda.com.hk

車型：五門五座

體積：（長）4275mm x （闊 ）1765mm x （高）1535mm

軸距：2570mm

引擎：1998c.c. 直4汽缸，前置引擎

壓縮比：13.0：1

馬力：156匹/6000rpm

扭力：20.8kgm/2800rpm

波箱：6前速自動，前輪驅動

懸掛：（前）麥花臣支柱；（後）扭力桿

制動：（前）透氣碟；（後 ）實心碟

油缸容積：48公升

行李艙容積：264公升—1174公升

車重：1226kg（淨重）

耗油：6.1L/100km（巿區及公路混合測計模式）

輪胎：Toyo Proxes R40 215/50 R18 92V（前、後）