POSTED ON 04 Feb 2017
Photos & Video: Heat Production 我記得喺2012年左右,第一次試揸寶馬(BMW)1系118i,金屬橙色車身,好靚,當年賣35萬左右。車,好好揸,個八速自動波好醒,醒目嘅程度(尤其是二波同二轉三嘅暢順性)比523i嘅八速好好多。後座緩震程度相當唔錯,當時小弟仍未有計劃結婚……心諗「先斬後奏」出番部,點知,突然想轉工,「突擊計劃」變「爛尾樓」。 |
|
我唔係劈頭第一句就勁廣告口吻「咬定」:「喂!情人節又嚟喇,買M140i啦!啦!啦!啦!啦!……」,但好似M140i、福士(Volkswagen)Golf R、平治(Mercedes-Benz)A45 AMG、Audi RS3呢類德國高性能係揭背車的確係幾啱當下香港嘅玩車現實環境。 | |
「飛得吓」、「載得吓人」、「搬到嘢」,德國品牌,出入高級場所唔失禮。千辛萬苦先喺屋企附近租到一個車位,部車有齊咁多項優點,算係咁啦! 今代1系,仍然係實實在在嘅一部五門掀背車,撇開工作上常用嘅分類方法,我始終當佢係一部玩樂汽車。有五度車門,冇緊要啦,後座椅背有個合理嘅置物空間,又唔拘喎。我試車當日都講過,我最喜歡1系同Golf,但如果有個自稱係忠心Golf fans嘅純情33D靚女,拎把「老牛」「杭」住我,我依然會話:「妹,我就揀硬1系㗎嘞,而家二月,天氣仲係凍,唔好著得咁少布,利器要放好,女仔要愛護自己身體……」 |
|
1系無論係入門級嘅118i、以前嘅M135i、今次試嘅M140i,抑或接近10年前嘅E87型130i,動態都係好自然,頭同尾都係好平衡,我攤開老實同大家講,我呢五六年係好鐘意呢類動態嘅車,我大約喺2010定2011年試揸過款尾130i,部車有M Sport懸掛,硬咗啲,行西貢、清水灣舊路唔算好貼服,但啲路一夠靚同滑,好鬼正呀! 所以,如果你嘅「好操控」定義,係要勁grip、超grip,grip到好似行路軌咁嘅呢,咁你可以skip咗M140i,佢grip嘅水平只係「好grip」,仲未到「勁」同「超」嘅level,而且係活生生。 |
|
讚還讚,我唔係一面倒話1系「天上有,地下無」,不足之處有以下幾方面: 我覺得佢整體嘅各方面調校都係剛柔並濟之中略為偏柔,例如軚盤輔助力度仍然係大咗少少,總係覺得軚盤偏輕,我知有相當用家可能會話:「阿陳,你又話一部頂幾部,如果用嚟做『腳車』,set到咁重辛苦喎!」嗱!咁你試車嗰種自己判斷兼慢慢想清楚喇 |
|
我喺試車短片提過,M140i嘅入彎Turn-in反應(包括一扭軚盤反應嗰吓,車頭實時有咩反應,軚盤仲有幾多可以feel到嘅路訊「電軚年代不能苛求」)及唔上M2 Coupe,車尾喺出彎時嘅動態亦略嫌有啲保留,「規矩咗啲」,理應可以更加活潑。 | |
另外,今次M Sport Suspension嘅吸震筒同彈簧都有啲偏硬,喺德國或日本嘅優質鋪裝路,一定唔成問題,但喺香港嘅舊路,始終未夠貼服,總覺得懸掛忙過不停應對彈跳,好在,「多啲嚟密啲手」,喺消減起伏點產生嘅震盪方面,尚算快手,未有大幅度破壞整體循跡力,但乘坐舒適性就比不上118i嗰種軟中厚韌,如果你預咗高性能車「係跳啲㗎喇,咪咁奄尖啦!」,咁咪OK囉!冇咩事,我出番去先喇! 唔怪得部份英國汽車雜誌編輯都話,M140i喺英國B-Road嘅緩震表現只算中規中矩。 |
|
你又會問:「好哋哋做乜拎M140i同M2 Coupe比較呀,兩部唔同類喎,一部59萬有找,另一部85萬,唔Fair喎!買得M140i就唔會揀M2 Coupe啦!」 我部份認同呢種講法啦,畢竟係兩類車,但佢哋又係同品牌、相近尺碼同最接近價位嘅選擇。我相信唔少人可能諗過:少30匹啫,又係直六,又有Turbo、扭力輸出又一樣,又實用啲;當然,你亦可能覺得想好玩,要去盡啲,就米咁婆婆媽媽,一心一意畀多「廿零個」(內心霸氣加多句:_!我又唔係畀唔起!)。 |
|
嗱!見你R晒頭十五十六唔知點揀,一於惡搞加多句:「其實M2 Coupe車尾廂都幾見使㗎!」 慢慢諗啦巴打! |
|
BMW M140i規格
售價:$585,000 代理:BMW HK www.bmwhk.com 車型:五門五座 體積:(長)4324mm x (闊 )1765mm x (高)1411mm 軸距:2690mm 引擎:2998c.c. 直6汽缸單渦輪增壓,前置引擎 壓縮比:11.0:1 馬力:340匹/5500rpm 扭力:51kgm/1520rpm-4500rpm 波箱:8前速扭力轉換器自動波,後輪驅動 懸掛:(前)麥花臣支柱;(後)五連桿 制動:(前)透氣碟;(後 )透氣碟 0至100km/h加速:4.6秒 極速:250km/h 油缸容積:52公升 行李艙容積:360公升-1200公升 車重:1475kg(德制淨重)、1550(歐盟標準淨重) 耗油:7.1L/100km(巿區及公路混合測計模式)、9.4L/100km(巿區測計模式) 輪胎:225/40 R18(前)245/35 R18(後) |