第二代Freed九月中喺日本公布，早前已喺香港開售，據知第一批買家近日將會收車。Freed賣24萬幾，25萬有找。

八卦吓同門Stepwgn最新售價，原來只係同Freed相差5萬幾。買Freed夠用，抑或你覺得畀多幾萬冇所謂，買部大啲，呢啲要留番你自己諗。 

表面睇，新Freed同上一代對比，唔覺明顯大咗，與其籠統話長咗啲、闊咗啲，尷尷尬尬、怕怕羞羞、鬼鬼鼠鼠咁形容你聽，不如畀個實數你參考，自行判斷。

軸距：冇增長，都係2740mm

車長：長咗50mm，總長4265mm 

淨睇呢兩個數，梗係冇feel啦。但係第二代嘅座椅前後滑動距離多咗。 

第二排座椅前後滑動空間：增加咗120mm

第一排座椅之間空間：多咗50mm（放手袋或背囊都夠闊）

第一、二、三排之間距離（以屁股中央點計算）：多咗90mm

中門離地距降低咗15mm至390mm。

其實，4.3米內嘅空間，載到7個人，你覺得仲有乜嘢可以花款玩到？仲有邊啲突破？

唔通大得過Stepwgn、Serena同Noah呢級日本中型高身MPV？

咁多年來，我同所有人（不論讀者、老友、親戚以至舊女友）都講：

買好似Freed呢類車（包括新一代豐田Sienta），唔好以為諗住坐到7個人，就當佢闊落到好似豪華Van咁，我咁講唔係站喺車迷，又或者你可能覺得我袋咗車行/車廠好多錢嘅角度去講，係實實在在，有碗話碗。

否則，你一聽到「7座位」就飛身仆到去買，一定係希望大，失望愈大。

先小人，後君子。講明買呢類車應有嘅心理準備，再講第二代有邊啲重大改良。 

我覺得第二代Freed最大優點之一，係第二排座椅滑動距離長咗好多。

如果全車只有五人，就唔好諗咁多，將成份第二排推到最後，腳位空間攞到盡。當第三排要載人：第一排移前少少，第二排又可以推到好前，咁第三排乘客上落明顯係輕鬆咗。

至於話拆咗頭枕之後，第二同第三排座椅，又或者第一同第二排座椅，可以組合到一個近乎平台嘅佈局，我係開心嘅，但我會問吓自己，有幾何會用得著？香港夏天有幾何會天晴兼涼風撲面？有幾多個海灘畀你部車停車喺海邊？香港仲有幾多塊草地畀你揸部車上去兼冇蚊？

駕駛席前方雜物盒，放定十張八達通、油卡、屋苑停車場閘卡……

呢個Shape，用嚟放津露烏龍茶一流

A柱「透明雞翼」玻璃面積大咗，啱嘞！睇實啲「盲毛」！

我對本田嘅車，哪管係MPV或大房車，都對佢嘅操控、懸掛調校同動力系統都有啲期望。雖然輸港嘅Freed只配一副1.5公升自然吸氣引擎同CVT波箱。引擎最大馬力131匹/6600rpm，峰值扭力15.5kgm/4600rpm，今代採用雙頂凸輪軸（DOHC）盤頂設計，最大馬力比上代單頂凸輪軸（SOHC）設計多13匹，峰值扭力多咗1.1kgm。數字係死嘅，最重要睇吓個CVT波箱傳動效率。

呢副CVT波箱，冇加減波，但我好滿意，而且係非常滿意佢傳送動力嘅表現，平日巿區平路開車，介乎1500rpm至2000rpm，輕輕「掂住」「印住」油門，傳送動力嘅質感已經好實在，喺上沙田九肚山嘅長命斜，兩個大人，唔使拖去S波，我相信四個大人加一個小童，D波仲夠力；滿座就一定要用S波。

整體嚟講，引擎動力同波箱咬得好緊，類似嘅感覺，我喺今代Stepwgen都感受過，但我當時有好冷靜諗過：「可能係Turbo引擎低扭好，Cover咗CVT喺傳輸動力嘅時滯」。但喺Freed，自然吸氣引擎，冇「味精」，真刀真槍，冇得呃。

另外，喺落斜路段（例如馬鞍山繞道），放鬆油門，波箱自動派到個好適合嘅傳動比率，唔需要用家長期拖住brake落斜，呢樣我好like，亦覺得好安心。

今代Freed波箱改進好大，間接降低加速時嘅車廂噪音水平，值得再三肯定

上代Freed嘅引擎力水，ok嘅，但引擎聲乾澀咗啲，CVT波箱又冇今代咁醒，每當進入高速公路踩大油，成部車好嘈，隔音亦未如理想。今代嘅轉變好大。正正因為今代嘅CVT波箱喺常用車速區域嘅傳輸質感夠紮實，唔需要刻意畀大油，引擎聲浪低咗，另方面，實時試車話我知，地台同內輪拱嘅隔音真係改善咗好多，你知啦，佢配嘅Yokohama BluEarth E50唔係出名寧靜嘅車胎，但喺混凝土路面傳入車廂嘅胎噪竟然係好輕微，有驚喜。

離地距只有390mm，K2仔仔女女都可以輕鬆自行上落車

接起第三排座椅，搬嘢好好用

今代Freed嘅整體剛性比上代多咗22%，老實講，唔係喺「A、B比試」，我真係感覺唔到有進步。前懸嘅支承力同強壯程度，只能算係合格，如果你慣咗逢係Honda都喺彎路「劈得一大爛餐」嘅話，你實會覺得Freed前懸偏軟，正常揸，係合格嘅。我較欣賞後懸掛嘅調校，幼細咗，軟熟咗，扭力桿佈局做到咁嘅水平，算好好。

上一代Freed喺大埔道（中文大學段）或巴爛少少嘅舊路，懸掛噪音偏多，而懸掛自身亦唔能夠喺壓縮同伸張時，好快咁安定落嚟。

開首話Freed賣24萬幾，合理與唔合理，以至貴定唔貴，大家有唔同睇法。我嘅感覺係：「吖！呢啲1500c.c.日本7人車仔，整整吓原來要賣成25萬㗎喎！」我嘗試代入自己目前處境去想，要一部闊落少少、擺物件鬆動啲嘅嘅家庭車/MPV，坐七個人唔係必須……如果真係要我揀，我唔會揀Freed，反而會喺Stepwgn同Jazz RS（$188,000）之間抉擇，而且會傾向前者。 

講得呢啲個人選擇，係純粹分享，亦預咗畀人插（你黐線㗎，七個位唔係Must你又揀七人車，就係你呢啲人搞到地球污染囉，塞車囉！）。

Honda Freed規格

售價：$246,880

代理：Reliance Motors www.honda.com.hk

車型：五門七座

體積：（長）4265mm x （闊 ）1695mm x （高）1710mm

軸距：2740mm

引擎形式：1496c.c. 直列4汽缸，缸內直噴，前置引擎

壓縮比：11.5:1

馬力：131匹/6600rpm

扭力：15.5kgm/4600rpm

波箱：無段變速自動，前輪驅動

懸掛：（前）麥花臣支柱；（後）扭力桿

制動：（前）透氣碟；（後 ）鼓式

車重：1365kg

油缸容量：36公升

耗油：19.4km/L（日本JC08燃費測計模式） 

輪胎：Yokohama BluEarth E50 185/65 R15 88S（前、後）