Photos & Video: Heat Production

近一兩年，我聽唔少玩開日本車或歐洲車嘅巴打話，想搵返部Subaru GC8型Impreza揸吓。

鬼唔想咩！有企理放盤先得㗎？ 

GC8呢啲閒閒哋十幾廿年嘅Impreza，銀碼真係「有限錢」，唔計較預多少少維修，又唔介意跪地哀求車房大哥幫你跟頭跟尾，係玩得過嘅。

喺邊度買到企理GC8（不論係本地同外地），呢個資訊爆炸年代，唔使我哋多嘴。

大家咁like元祖Impreza WRX，原因何在？ 

大致有以下幾點：

第一，鍾意佢個樣。先入為主，第一代硬係最好嘅冇辦法，亦可能大家對當年Impreza 越野賽車太深印象喇。

第二，引擎聲。唔少巴打話GC8年代嘅EJ20型平四Turbo引擎聲最粗獷豪邁，又話佢把「煲水聲」引死人，「巧跣梘」！

第三，車輕，嗰時Impreza WRX RA，只重1250kg至1270kg，但引擎有成260匹至280匹，雖然峰值扭力都係「三十零」，但咁嘅動力重量比率，已夠好爽好輕快，呢種優勢係千禧「大眼仔」Impreza同後來嘅型號無法比擬。

今次試駕嘅Impreza S201 STi Version（以下簡稱S201），係GC8年代嘅壓軸之作。佢推出後四個幾月（2000年4月），Impreza正式進入GD年代（大眼仔）。

正如好多普羅汽車用家嘅心態：尾期最穩陣喎，乜都改良到最好啦！

如果你覺得呢套理論適用於S201，咁呢款車應該係買得過包冇衰，佢既係S20X高性能系列嘅先驅，亦係限量製造（300部），而且外形都「幾爆」。

缺點係，呢款車仲未夠20歲，買返嚟要喺停車場坐多幾年監，等到2020先可以在晴落的一天出冊，朝夕相對。

Impreza S201 STi Version係以GC8年代尾期RA版為製作基礎，並作大幅度改良升級。重點有以下幾方面： 

引擎及排氣：改用紅色矽膠進氣管，減低阻力，增加吸氣量。中冷器同引擎節流室（Throttle Chamber）之間嘅氣管採用四層厚嘅矽膠製造，提高耐熱度。另配直徑120mm嘅尾鼓，根據STi嘅官方說法，裝條咁粗嘅喉係想「Cool」啲同重低音勁啲。120mm，小弟個大拳頭都塞得落。

懸掛傳動：倒立式吸震筒係「例牌嘢」，有30mm可以自行調校高度，車底嘅橫向及拖曳連桿全部配備滑枕式球型杯士（Pillow Ball Bush），據STi講咁嘅設計有助令入彎反應更快更線性。前軸採用Helical LSD，好處在於平時跑街，動力傳輸質感同反應較自然，「快劈」時反應比離合器式LSD快得多。

車身方面：誇張到嘔，包括與鬼面罩一體化嘅頭泵把、加大30%嘅引擎艙蓋中冷氣進風口、子彈式門邊鏡、車身兩邊底部「裙腳」、增加下壓力及附設導流槽嘅尾泵把，仲有，由富士重工航空宇宙事業部設計嘅鋁質雙層擾流大尾翼，同埋一「Pat」撻喺車尾箱蓋嘅高置式剎車燈。

數完Specs，要認真講吓駕駛感。 

可能係太耐冇揸GC8（上一次係五、六年前，當時揸朋友嘅一部小改Version IV），一開車餵幾腳大油，部車已經搶住飈出去。好老實，喺今日或五年前嘅標準，S201嘅車身剛性只係普普通通，例如喺S彎「左質右質」，車體未夠牢固堅剛，總覺得引擎喺動力最旺盛嘅轉數，車體馬上與底盤角力、鬥大，雙方一味喺度「咩呀！咩呀！咩呀！」。 

咁嘅駕駛氣氛，你可能覺得好熱鬧、好緊湊刺激，但我相信三菱Lancer Evolution VI Tommi Edition「六代半」嘅用家，會嫌S201整體剛性仲未夠高，差一點點先能夠與強勁嘅Turbo引擎看齊。

相比1996年、1997年嘅Impreza WRX STi，S201已經算好硬淨。

呢部累計只行咗約26,000公里嘅S201，車體同底盤仲係好紮實，近乎冇雜音，好難得。如果你打算喺日本中古車店物色心水，賣方畀你試車，又或者畀你坐吓前座乘客位feel下，我都建議你慢慢試，搵部剛性高啲嘅，雜音少啲嘅。

當然，Bid場嘅車肯定冇呢支歌唱啦！

試車時，我將DCCD鎖合度調校至最低水平。

相比我在上文提到的那一部Version IV，S201嘅轉向不足程度低得多，以二波大油喺上落坡彎道快跑，的確係有少少「推」，但仍然喺可以接受範圍內，只需酌量調整駕駛方式配合，例如輕輕用左腳brake一brake，再急少少扭軚turn-in，已經可以流暢得多。

S201有較快嘅轉向比率（13:1），或多或少幫到一把。個人嚟講，S201其實比2001年嘅GD型Impreza WRX STi更好揸。

懸掛方面，GC年代尾聲嘅S201，仍然採用當時STi「以硬打硬」嘅懸掛調校手法。我相信S201喺日本優質鋪裝山路會好好飛，情況有啲似世界越野錦標賽（WRC）嘅西班牙分站柏油路。

但喺香港舊路或起伏路段，懸掛同輪胎都顯得有少少忙亂，欠咗一份柔韌與淡定，同我哋年初時試駕嘅S207，簡直係天與地。專登搵咗段新鋪冇幾耐嘅柏油路快跑，懸掛仲係好貼服，反應好快。只能嘆句呢度唔係日本。

16年前嘅S201 EJ20平四Turbo引擎，最大馬力300匹/6500rpm，峰值扭力36.0kgm/4000rpm。坦白講，純粹論最大馬力，我今次真係唔多feel到佢同280匹嘅EJ20有乜大分別，但放喺只有1270kg嘅車體，震撼力的確非今日嘅300匹高性能車可比。

從低轉一口氣踩上5500rpm，推背力從後急湧而至，再直衝上喉嚨，加埋隔兩條街都聽到嘅排氣喉聲，實時感覺自己變身星爺，喺《蓋世豪俠》大結局練成絕世武功。

轟得幾轉之後，過癮到我忍唔住笑出嚟。

不過，那些年嘅「大power」EJ20 Turbo機器，扭力帶較窄、Turbo Lag大，2500rpm以內呆到似未瞓醒，3000rpm先開始感到投入嘅熱情，之後突然拍枱拍櫈發癲伸你一大腳，喺臨界6500rpm，蠻力驟然放緩。

如果跳上S201駕駛艙，能夠即時進入隱形狀態：變成「你睇我唔到」，快相機影你唔到，波波盡瘋狂加速兼路路暢通，方才提到嘅引擎調校取向，無疑是「Perfect池」，但喺現實世界，咁嘅tuning略欠韌度與易控度，只係一味衝呀！衝呀！衝呀！

有讀者問我，S201同Lancer EVO VI TME（即「六代半」），點揀？

如果我喺2000年初，我毫無疑問揀「六代半」。

理由係：車架底盤剛度、引擎動力提取容易度、動態平衡都比S201好。

但喺今日，我兩部都買，我亦相信，我會經常揸S201，因為佢真係好有當時Subaru高性能四驅房車嘅強烈機械感，而且呢種滿到瀉嘅機械味，不單係當下主流高性能四驅掀背車/房車所缺乏，就連那些年嘅「六代半」都搵唔到。

年青時，性能數字至上，怕畀人以為自己唔識貨。

人到三字尾，成熟咗，接觸嘅車多咗，選擇心頭好，最緊要好feel，有個性。

你笑我部S201外形「on79」。

我夠笑你三十幾度熱到嘔仲笠住頂帽。

Subaru Impreza S201 STi Version規格

售價：3,900,000日圓（2000年4月新車價）；15萬至20萬港元（2016年6月易手成交價）

車型：四門五座

體積：（長）4375mm x （闊 ）1690mm x （高）1405mm

軸距：2520mm

引擎：1994c.c. 水平對向4汽缸渦輪增壓，前置引擎

馬力：300匹/6500rpm

扭力：36.0kgm/4000rpm

波箱：5前速手動，四輪驅動

波箱傳動比

1波：3.083

2波：2.062

3波：1.545

4波：1.151

5波：0.825

最終傳動比（尾牙）4.444

懸掛：（前）支柱式；（後）支柱式

制動：（前）294mm透氣碟；（後 ）290mm透氣碟

車重：1270kg（淨重）

油缸容量：60公升

輪胎：205/50 R16