六月初，MenClub試揸過上代（W212型）E-Class「款尾」E 200 Sport，車價由$469,000起。

話咁快又七月尾，全新一代E-Class（W213型）E-Class抵港，我哋先試E 200 Avantgarde版本，售價由$564,000起，兩者相差$95,000，四捨五入，即係10萬啦。 

表面上，畀多10萬坐到新一代E-Class，設備新咁多，又雙Mon，又有全新車廂設計，車尾似S-Class，車頭又有C-Class年青味道，真係，愈諗愈唔明點解要勒住荷包，睇得呢10萬咁緊。

冷靜啲再諗，對E 200有feel，純粹係想買部「似樣啲」嘅「Benz」代步，「我係真．用家，有新功能，係開心嘅，會唔會用到盡呢，答你唔到。事實上，我唔係一上車就左撳右撳嗰類人，我有好多嘢要諗，生活同生意上有好多嘢要顧，總之安安全全，揸部車出街見得人，人哋知道係Benz就得啦！！」 

點樣作最後決定呢，MenClub梗係唔會幫你揸主意啦，你咁大個人，買車呢啲小問題都扭扭擰擰，唔係阿化。

MenClub咁睇啦，如果你唔係對有電腦控制介面嘅device有強烈恐懼，又或者將10萬蚊睇到天咁大，實在睇唔到有好大理由抗拒新E-Class。除非你老早假設：新E 200售價頂盡比（W212型）E-Class「款尾」E 200 Sport多一萬幾千、同價、甚至平少少兼送埋油券，咁就另作別論。

新E-Class強調有「雙Mon」，兩個12.3吋（1920 x 720像素）顯示屏，顯示晒車上所有畀你控制得到嘅功能。不過，呢兩個Mon唔係觸控式，前座乘客想手多多睇吓有咩玩，又或者想揀歌，要用中槽上面嘅Touchpad。司機可以用軚盤柱左右兩翼嘅Touch Control觸控鍵（Blackberry部份型號或昔日Nokia E Series都有類似設計）。試用過，敏感度同設計都幾好，位於Touch Control中央嘅Select Button，「行程」短，回彈質感清晰。

同C-Class一樣，開得太凍，好易有「倒汗水」

要一讚主要功能操控介面，佈局好清楚，同Touch Control亦好合拍。不過，喺接駁iPhone 6S嘅過程中有兩樣值得一講，我先後用藍牙及USB線接駁，藍牙接駁方法簡單，易用；但以USB接駁，必先揀啱USB插口，中槽有一個儲物小空間，內有兩個USB插口及SD卡插槽，我以為插其中一個就OK，點知失敗收場，車上系統顯示iPhone 6S內無任何歌曲（其實有10GB音樂檔），本著「插你唔得插佢囉」嘅心態，轉插靠近司機位嗰個，即掂。

我唔知係我未設定好，抑或係我蠢，車廂屏幕未有顯示歌曲嘅CD Cover Art，我試玩咗約8分鐘，仍未搵到Album嘅控制layer，算！放棄，唯有拎起iPhone選曲。反觀寶馬5系，完全唔使刻意搵，介面結構及操作「流向」一目了然，拎上手就識用。

日後希望有機會向代理借部新E-Class 試用幾日，詳細了解一下各類控制介面操作。

好多人見到新E-Class，都將焦點放喺「雙Mon」同Distance Pilot DISTRONIC系統。其實，站喺最實際最貼身嘅角度睇，新E-Class另一突破係來自乘坐感同懸掛設定。坊間有說法指，全新E-Class不設電子懸掛，但睇返仁孚行發出嘅E 200 Avantgarde（W213）銷售簡介有提到，呢款車設有「AGILITY CONTROL suspension with selective damping system and lowering」。咁究竟邊個啱？

搵吓中控台有冇個吸震筒logo嘅掣？係冇嘅！原來新一代E 200嘅電子懸掛系統，係冇得畀用家自行調節硬度，幾時軟，幾時硬，一切由電腦話事，所以話「新『E仔 200』冇電子懸掛，肯定錯。」

好，實際路面feel吓，慢速（泛指50km/左右）喺平滑嘅柏油路行車，懸掛好軟熟，軟熟到有丁點輕微浮盪，有少少似揸緊廿幾年前嘅W124型「款尾」E-Class（E 220 Masterpiece？），上一代E-Class（W212型），肯定唔會有呢種feel。

平治有咁嘅tuning同可以tune到咁，我唔意外，問題係動機何在？唔通平治都好似寶馬咁「望返轉頭」，兜兜轉轉先發現，E34/E39嘅懸掛調校手法同取向，先至係最啱5系？

我最初有少少擔心呢種日常跑街坊彎都嫌偏柔嘅設定，啱唔啱快揸，但喺沙田醫院對出嘅跨河（城門河）大橋或吐露港公路上山一段（由廣福至康樂園）快揸，懸掛突然變得韌挺，經過S彎，懸掛冇顯得繃緊，body roll亦控制得好好，照咁睇，新E-Class嘅懸掛算係達到「軟硬俱佳」嘅水平。

不過，喺應對部份以混凝土製成嘅馬路（例如喺大埔工業邨外圍對出嘅汀角路，起起伏伏），懸掛濾震表現只算「普通」，未夠幼細，四條派拉利（Pirelli）Cinturato P7 run flat胎喺呢段路嘅胎噪亦大咗啲，驟然令你覺得：地台隔音好似麻麻哋喎。

引擎方面，E 200嘅兩公升直四Turbo引擎，最大馬力184匹，峰值扭力30.6kgm/1200rpm-4000rpm，動力輸出數字同上文提及嘅上代E 200（W212型）一模一樣，但波箱已經由7前速自動波，變成9前速自動波。

用咗新波箱之後，0至100km/h加速時間，由7.9秒降至7.7秒，除非你每每用秒錶計時，否則，嗰0.2秒有幾多個用家feel得到。值得一提，新款9G-TRONIC自動波箱醒咗好多，以前用Comfort Mode行車，轉波慢合理，但連系統感應及估算/學習駕駛者揸車習慣嘅智能度都低一皮，就接受唔到囉。

轉用Sport及Sport +模式，成副引擎生猛活躍咗好多，你認真啲去feel吓佢嘅中高轉區域運轉質感，聲音爽朗咗，動力發放得好結實暢滑，好高質素。我手頭上冇來自平治嘅技術數據，去證明廠方有冇重新改良呢副引擎嘅零件，但從實際試駕去感受，我嘅答案係肯定嘅。

就算只用D波，唔用手動加減轉波模式，已經有接近寶馬520i嗰種高智能與濃郁跑味結合嘅波箱mapping。你揸快少少，畀油狼啲狠啲急啲，落brake重啲，佢好快learn到你想點，派個最啱嘅波段畀你。唉！點解Benz咁遲先喺「E仔」推出呢款咁好嘅波箱呢，真係要唉多幾聲呀！

曾幾何時，520i同ZF嘅8前速自動波箱，一直係我心目中嘅最佳配搭，但試過E 200呢套9G-TRONIC，我覺得520i喺動力傳動組合呢兩方面，終於遇到強手喇，日後真係有必要同場試試呢兩款車。

Mercedes-Benz E 200 Avantgarde規格

售價：$564,000

代理：Zung Fu www.zungfu.com

車型：四門五座

體積：（長）4923mm x （闊 ）1852mm x （高）1468mm

軸距：2939mm

引擎：1991c.c. 直4汽缸渦輪增壓，前置引擎

壓縮比：9.8：1

馬力：184匹/5500rpm

扭力：30.6kgm/1200-4000rpm

波箱：9前速自動，後輪驅動

懸掛：（前）多連桿；（後）多連桿

制動：（前）透氣碟；（後 ）透氣碟

0至100km/h加速：7.7秒

極速：240km/h

油缸容積：50公升

行李艙容積：540公升

車重：1605kg（淨重）

耗油：8.0L-7.6L/100km（巿區行車測計模式）

輪胎：Pirelli Cinturato P7

245/45 R18 96Y（前）245/45 R18 100Y（後）