Photos & Video: Suzuki Production Special Thanks: Hercules Fix & Treasures Workshop 認識一位從事成衣布匹貿易的世叔伯有近30年,佢係家父同業兼老友。 呢位「叔叔」好鍾意玩真車同砌模型車,當香港未有行貨日產(Nissan)R32 Skyline GT-R賣,佢已經有一部白色,經常泊喺佢位於深水埗嘅布行地舖外面,有時警察行咇經過都會望望吓。 讀中學時,我會幫老豆去叔叔嘅布行拎布辦(新推出嘅布料樣辦)同一啲進出口報關文件,佢會撻著部32畀我煲吓冷氣,聽吓歌,有時佢會叫伙記去後面街麵舖外賣碗牛腩河同支裝可樂,話我可以喺32司機位慢慢食,我記得第一次好小心(冇倒瀉),我亦漸漸愛上喺司機位食麵,時至今日。 叔叔擁有過好多車,MINI Clubman、Nissan Bluebird SSS、Toyota Celica RA40、Honda Prelude、Toyota Supra(MA70、80)、TVR 350、Nissan Skyline R32 GT-R、Ferrari 328、348、F355、F430、458 Italia、BMW 735、745、E39 540i、E46 M3、Acura NSX、Mitsubishi Lancer Evolution III、VI、IX、Subaru Forester STI、Lexus LS 400、430、460、Eunos 800M 、Daihatsu X90、Peugeot 605、Peugeot 306 Cabriolet、Nissan Skyline R34 GT-R、Peugeot 206 GTi、Renault Clio R.S.、Lexus SC 430、Toyota 元祖bB、Porsche 930 Turbo、964 Turbo、993 Carrera 2、997 GT3、元祖Boxster⋯⋯總之就係,羡慕死人! 香港有好多呢類「雜食」車迷,乜車都啱,小弟所認識到的,已有十多位。 叔叔年近70,佢話年紀大,已逐步將愛車轉到仔女及孫仔孫女名下,以方便照顧,但寶馬E46 M3、R32 GT-R、保時捷及法拉利仍由佢名下持有,佢話:「呢啲車太快.太靚太好玩,所以最危險,我唔放心交畀其他人。」 「幾鍾意有日始終要放手,你(筆者)有邊部啱,可以排定隊(認購),我有本簿上住,有晒電話。各位老友第時好好對啲車,唔好亂改。」 如果佢呢番話喺15年前講,我一定揀R32 GT-R,不過,而家嘅我都係最like佢部零手棍波E46 M3。 |
|
[Youtube]https://youtu.be/kddMa1Bgy4M[/Youtube] |
|
寶馬M2 Coupe推出,唔少歐洲嘅汽車雜誌都將佢同E46 M3對比,咁點解唔同E30 M3比較? 講真,任何人將一部新款寶馬跑車同E30 M3比較都係不明智,畢竟E30 M3已經係30年前嘅設計。2010年底發表嘅1M Coupe,寶馬就將佢同E30 M3拍埋一齊影相、拍Video。你可能話:「人哋嘅意思係1M Coupe喺精神上承傳E30 M3啫,師兄唔好太認真啦!」 |
|
我覺得喺1M Coupe嗦到嘅「E30 M3味」實在微乎其微,反而有多少E46 M3味,但1M Coupe喺配上闊大嘅輪胎之後,轉向同整體靈巧度又同E46 M3有一段距離,有巴打可能話,M3就係M3,1M就係1M,做咩要拎埋兩部車一齊比。嘩!好惡呀,講吓都唔畀! |
|
當寶馬公布M2 Coupe嘅香港售價,係開心嘅,雖然我冇能力喺呢個階段現兜兜full cash出車,而84萬嘅車價比起1M Coupe又貴咗十萬有多,不過,以往「七十零萬」檔次嘅寶馬M系跑車總算有接班人,係好事,三幾年後嘅易手價回落到幾多,冇人可以準確估計,但可以肯定,唔似M3/M4咁遙不可及」,M2好明顯接地氣得多。 |
|
M2配3公升直6引擎,370匹,峰值扭力47.4kgm(overboost達51kgm),冇Twin Turbo,合理,試想像84萬有Twin Turbo引擎,輕輕改裝,閒閒哋可以過450匹,畀在你,仲會唔會買M3/M4?當然,鍾意M3/M4嘅人係唔係認同即使M2有Twin Turbo,可以取代佢哋dream car嘅地位。 |
|
M2雖然唔係配一副特別而設嘅新引擎,只係建基於寶馬M235i嘅3公升直6 Turbo機器,但改用來自M4嘅零件,例如活塞、汽缸套、油泵、油池、連桿軸承,誠意有幾大,你自己judge,講實際,無論係低扭嘅強橫同引擎暢滑度,都極之好,仲有冇好明顯嘅Turbo Lag?冇㗎喇,低到唔輕易察覺,總之,就係冇乜挑剔位。 |
|
理性啲講,上述嘅引擎表現完全係預期之內。 較有驚喜嘅係,引擎聲靚咗好多,固然比1M Coupe靚,兼且係響亮,調子亦隨住轉數升降有明顯變化,有返多少以前自然吸氣直六嗰種味道,應該啦!最新嘅德國高性能Turbo引擎,係tune聲方面落咗好多功夫,Turbo引擎再唔係「死gu gu」。 |
|
波箱方面,呢部供試駕嘅M2,配7前速DCT(雙離合器dual clutch)自動波箱,高轉拖波容忍度頗高,以comfort mode喺土瓜灣街巿慢行,又可以好順滑,如果你係打算輕鬆尋開心,無理由唔揀佢。 不過,我覺得M2有6速棍波選擇係天賜寶物,而且1M嘅6速棍已相當唔錯,即使未試過,我都投M2嘅6MT一票,始終,DCT同MT喺玩法同快感係有好大分別。 人人毒我,我毒人人,買棍波啦,仲諗! |
|
M2 Coupe唔係啲擁有神乎奇技嘅車,即使好有feel,面部表情都唔需要太誇張,亦管不用無端端亢奮尖叫。 相比以往嘅1M,M2嘅前輪抓著力豐富之餘,喺彎路仍然感到佢活生生,懸掛伸縮嘅反應一來冇1M咁繃緊,二來,柔韌度高咗好多,再者,M2嘅電力輔助轉向系統亦有好大改良,例如由軚盤置中開始扭動,會覺得輔助動力嚟得好線性,唔會過大,再冇1M嗰種人工味太濃兼虛假嘅缺點,好好。 |
|
未試M2之前,同過歐洲兩位行家交流過佢哋試後感覺,其中一位話未著DSC,車尾已蠢蠢欲動;另一位話,熄咗DSC好易甩,要好小心,但甩得嚟算係易控,好正。 兩位嘅意見我都認同,我幾鍾意M2喺熄咗DSC之後,由你feel到車尾有啲走到真正臨介「大甩」呢個區域,其實算幾闊,用二、三波,間中用油門「玩吓嘢」,係唔會跌死你,總括嚟講,我覺得冇1M咁神經質。 |
|
M2有冇缺點? 有,車,可以再輕啲,DCT版加埋人有接近1650kg(歐盟非淨重標準),但M2嘅底子係好好,揸過之後,你一定會諗:吖!有冇得再輕啲呢? 有傳寶馬有兩手準備,M2倘若賣得好,會立即推M2輕量版(可能叫CSL之類)。 車廂,有唔少試過車嘅歐美行家都話「齋」咗啲,我呢,我真係冇所謂,M2係攞嚟玩,基本真皮座椅,冷氣夠凍,駁到智能手機,咁已經足夠有餘,想靚想grand,唔係喺M2囉。 時勢唔好,外邊一片結業潮、裁員潮,你仲用接近85萬買一部車廂唔算好闊大,老婆覺得係唔等使嘅「雙門跑車仔」,難免要算過度過。兩個選擇,唔好諗咁多,今晚睇完聽朝去落訂,然後收埋嚟玩;又或者繼續做個聽教聽話嘅廿四孝老公。 |
|
BMW M2 Coupe規格 售價:$848,000起 代理:BMW HK www.bmwhk.com 車型:雙門四座 體積:(長)4468mm x (闊 )1854mm x (高)1414mm 軸距:2693mm 引擎:2979c.c. 直6汽缸渦輪增壓,前置引擎 馬力:370匹/6500rpm 扭力:47.4kgm/1400-5600rpm(Overboost達51kgm/1450-4750rpm) 波箱:7前速雙離合器(DCT)自動,後輪驅動 懸掛:(前)麥花臣支柱;(後)多連桿 制動:(前)透氣碟;(後 )透氣碟 0至100km/h加速:4.3秒(6前速棍波4.5秒) 極速:250km/h 車重:1645kg(DCT) 輪胎:Michelin Pilot Super Sport 245/35 ZR 19(前)265/35 R19(後) |