今代寶馬3系喺2015年facelift，右軚版早前到咗香港，MenClub試揸過330i M Sport（http://www.menclub.hk/auto/5793），整體感覺相當唔錯。不過，330i再冇經典直六引擎，只有一副2公升直四Turbo機器，相信必定有啲寶馬fans若有所失。

冇法啦，而家要喺三系「玩直六」，至少要買340i。如果，命運能選擇，當然好，但有時消費者真係好被動，再者，3系呢啲要賣個量，又要慳油嘅車，好多時要喺兩難中取捨，2公升直四Turbo機器無疑喺呢方面有優勢。

寶馬喺2009年提出一系列EfficientDynamics節能技術之後，入門版3系嘅引擎容積好似愈縮愈細，2公升，1.6公升，到最新嘅318i，只配1.5公升直三引擎。真TMD開玩笑，1500c.c.三系。

我知道有唔少香港車迷會話，「痴線㗎你！$399,900買部得嗰136匹嘅1500c.c. 318i？要買1500c.c.我點解唔買Corolla？使你教？係都叫人加多兩萬幾，揀部184匹嘅2000c.c. 320i啦！1500c.c.三系唔會有人買㗎，唔好咁癲啦！」

講真吖，呢類咁嘅聲音，我入行到而家聽咗十幾年，慣晒。

早七、八年前，好多自以為「傳統派」嘅「平治粉」都話唔買有Turbo嘅Benz，結果而家有邊部Benz新車係冇Turbo？我哋嘅責任，唔單止係搵啲好車介紹畀大家，認真啲去搵吓佢有咩好定唔好，度多幾個scenario，等大家易明易投入啲，亦唔奢望個個讀者跟上潮流尖端，而係想幫到大家睇闊啲，選擇多啲。

因為，介紹完某一部車，你未必即刻買，但往後幾季，以至幾年，你可能好大機會買同一款車，或採用相同技術嘅汽車。

成日聽到人話買唔落手，有錢唔知買架咩車，同佢傾兩句，部份嘅思想真係好舊，對舊設計過於執著迷戀，對新設計太多偏見，以往嘅用車不快經驗，亦冇認真檢討是否涉及自己用車及保養習慣，總之一面倒賴晒車廠。

好嘞，用得幾間大廠嘅產品，都係燶口燶面收場，又話以後唔再買呢間，呢世最憎嗰間。結果，繼續揸舊車，但啲舊車又唔生性，睇見佢就辛苦。

好坦白，318i呢個級別喺香港嘅形象，向來都係「叫做有部寶馬囉」，而且定價又尷尬，畀多2萬7千買320i，部車多成50匹，2000c.c.啫，牌費其實唔算貴吖，「我仲畀得起」，「買得德國車，唔好計到咁盡，咁寒酸！」，所以，我好有信心預測，318i同facelift前輸港嘅316i嘅結局一樣，都唔會大賣。

挑！賣到幾多車，甚至一部都賣唔到，關我鬼事！我係編輯，唔係賣車。

我喺去年寶馬公布facelift 3系嘅全新引擎陣容之後，已好想試呢副新引擎，後來聽到歐洲行家好評之後，更加向本港代理爭取早啲試車。

318i嘅1.5公升直列三汽缸渦輪增壓引擎，最大馬力136匹，峰值扭力22.4kgm/1250rpm-4000rpm。請唔好再以為3汽缸引擎，必定比雙數汽缸引擎「震」兼「嘈」，實情係，318i喺怠速相當寧靜，低轉好滑溜，高轉更加冇尖刺鬼叫，反而係帶有一股好獨特嘅低頻，有少少似直列五汽缸引擎，似大型貨輪或郵輪行駛時嘅聲響。

其實，寶馬i8都配有一副1.5公升直三Turbo引擎，但兩者嘅設計有幾多相同，喺截稿前仍未收到德國總廠回覆，我唔想亂吹一通。

值得留意係，「每缸500c.c.」已成寶馬及部份歐洲車廠（如歐洲福特）新款引擎嘅標準，其中一個理由係，喺目前及可見將來嘅歐盟廢排標準，「每缸500c.c.」嘅燃爆表現最efficient，亦都係最易控制廢氣排放量。

318i有3個行車模式，Sport、Comfort同Eco Pro。本來呢幾個Mode都熟口熟面，冇乜值得講。不過，倒要細講Comfort同Sport兩個模式下嘅引擎反應。我由土瓜灣寶馬陳列室開車，先以Comfortl模式，喺宋皇台道、露明道、九龍城一帶嘅舊街刻意慢揸，陰柔啲俾油，模仿吓「媽咪揸車湊仔返放學」。喺聖德肋撒醫院燈位起步，車多，慢慢俾油，千五轉以內嘅扭力唔算強，但好線性，至少你唔會覺得佢有明顯Turbo lag。

從嘉林邊道左轉上衙前圍道，另慢溜上聯福道浸大路口，內勁還可以。不過，想爽啲，中段爆發力肉緊啲，一定要長hold Sport模式。由映月台上獅隧，沿沙田路、沙田第一城方向往馬場呢段路，318i嘅懸掛好舒服，喺過咗新田圍邨，又未到博康邨呢段嘅沙田路，高低落差較大，有唔少巴打都鍾意喺度揸快少少，一部普通過普通嘅318i，懸掛韌挺度竟然可以咁，bound同rebound都好穩，頂！真係揸到我偷笑。

如果要我做blind test，我死都唔信318i只得嗰136匹，純體感，覺得佢至少有150匹。冇緊要，多少都冇所謂，feel最重要。

要彈嘅話，318i喺S彎，例如喺中文大學一帶嘅大埔道、赤泥坪嗰幾個山路彎，turn in唔算sharp，喺上斜中、大彎揸快少少，可能會認同前輪嘅指向性應該要再好一啲。想好啲，考慮吓畀$4800加option裝M Sport懸掛。

車胎係Bridgestone Potenza S001出品，run-flat胎，225/50 R17尺碼。由於懸掛調校本身已有相當柔韌度，所以配上50厚度嘅車胎已經有好好嘅早段緩震表現。一句到尾，真心like。

車廂，望埋去都係黑色、銀色塑料，無特別裝飾，好在摸落揩落嘅手感幾滑溜，真皮軚盤不設轉波撥片，我覺得問題不大，呢款軚盤握感幾好，手感充實，軚環又唔算太粗，幾啱厚肉又掌大嘅男人。後座係唔係真係咁齋咁失禮，留番你自己評價。

接駁iPhone聽歌，無得睇Album嘅Cover Art，但操作介面易用，算啦，要求唔可以太高

黑色塑料門檻保護膠，賣相麻麻dee

耗油方面，喺今次試車過程中（由土瓜灣經獅隧沿吐露港公路、新界環迴公路到錦銹花園迴旋處原路折返至沙田第一城，高速公路路段全以合法車速上限及Sport模式行駛），油耗介乎9.0L/100km至7.9L/100km，$1至$1.2（以每公升汽油$13.4計算），我覺得好合理。

1500c.c.直三Turbo嘅318i，希望你唔好視佢為寶馬R & D一個僥倖獲商品化嘅pet project，試車之後，不禁由心出發認同，呢副引擎已經好成熟，好滑，好靜。七年前聽過日本著名汽車工程師貴島孝雄一句話：「內燃機（引擎）至少仲有50年嘅發展空間。」1500c.c.直三Turbo直噴引擎喺十年前簡直係天馬行空，十年八年後嘅5系、7系嘅入門級別，分分鐘就係「直三Turbo當道」。

售價：$399,900

代理：BMW HK www.bmwhk.com

車型：四門五座

體積：（長）4633mm x （闊 ）1811mm x （高）1429mm

軸距：2810mm

引擎：1499c.c. 直列3汽缸渦輪增壓，前置引擎

馬力：136匹/4400-6000rpm

扭力：22.4kgm/1250-4300rpm

波箱：8前速自動，後輪驅動

懸掛：（前）麥花臣支柱；（後）五連桿

制動：（前）透氣碟；（後 ）透氣碟

車重：1400kg（德國工業標準）1475kg（歐盟標準）

耗油：5.5L/100km（公路及巿區混合測計模式，廠方數字）

0至100km/h加速：8.9秒

極速：210km/h

輪胎：Bridgestone Potenza S001 225/50 R17 94W