豐田（Toyota）Prius，已幾乎成為Hybrid車嘅代名詞，好多，真係好多香港人話要買Hybrid私家車，幾乎立即諗到Prius，就好似話買慳油細車仔，實有人話「Honda Jazz！Honda Jazz！」。

即係咁，多人買，多人讚嘅車，佢大多數嘅fans都想聽多啲讚嘅嘢，甚至唔想聽到人哋話佢揸緊嗰款車嘅缺點。坊間有少數「舔吮式」車評，如果你覺得嗰類文章已令你有推心置腹啲燙貼良好感覺，請不必詳閱下文。

Prius推出過三代，三代都有行貨，總括來講，在我所接觸嘅用家，都認同佢慳油又或非常之慳油。

我未擁有過Prius，所以無法以第一身用家身份，去評價佢嘅耐用性，維修容易程度，以至有冇一啲不能解決嘅機械或電子問題。

不過，歷年我曾多次有為期三至六日嘅短期試用機會，再加上平時試揸新款Prius嘅機會，勉強都有能力喺第四代Prius抵港時，講多幾句對Prius優缺嘅感想。

我最滿意第二代Prius，其中一樣係：我覺得第二代嘅1.5公升Hybrid系統，比第三代嘅1.8公升Hybrid系統靜，車廂嘅共鳴聲比第三代低，論慳油，第二代Prius很多時候比第三代慳。請唔好叫我拿出數據，因為我用車時，不是要為舉證而駕，認同我嘅讀者，自然會喺第二代Prius fans揮手區相遇；唔認同嘅，就當大家冇見過吧。

先講講第四代嘅耗油表現，本港代理皇冠汽車提供予傳媒嘅數字為27km/L，如果以每公升汽油$13.94計算，即約$0.51一公里。今次由於時間緊逼，未有詳細測試耗油，我哋在稍後以專題形式報道。

其實，當確實知道第四代Prius沿用1.8公升Hybrid系統及無段變速自動波箱之後，我對Prius喺駕駛趣味方面，真係冇乜特別期望，「都係嗰啲啦，CVT，你想佢點？」但係，豐田話成部車「Fun to Drive咗」，豐田講得出嘅承諾，多多少少值得去認真分析，唔好盲目信，但不妨聽其言觀其行。

一上車，撥動依然輕飄飄嘅波棍，喺太平道左轉窩打老道再左轉梭椏道，暗斜個波箱好似「咬」得幾實，唔覺跣喎。「雖則話近幾年日本CVT波箱喺傳遞動力嘅緊緻度改善咗，但一上大斜路就見底。」

喺亞皆老街右轉上嘉道理道長命斜，喂喂！啲力嚟得好實淨，引擎千零二千轉，電動摩打嘅綿密扭力殺到，完全好清楚咁，feel到好飽滿嘅扭力，但係波箱喺輸送動力嘅表現好紮實，唔多覺係CVT，反而有傳統扭力轉換器波箱味，喺嘉道理道12號門口附近嘅上斜S彎，我稍微收少少油，動力無瞬間大幅下滑，而係跟住我鬆開油門踏板嘅角度，好有比例咁回落。

更重要嘅係：由剛才提及嘅亞皆老街右轉嘉道理道嘅「斜路底」到12號門牌對出嘅S彎，Prius嘅引擎同波箱都幾靜，再冇二、三代「一踩大油就鬼殺咁嘈」嘅缺點，確實好大改進。

不過，唔係話發掘咗佢少少優點就講完，大家相信都知道，摩打嘅介入時間唔算長，當車速上升或引擎轉速提高至若干水平，摩打就再冇可能再提供更強大嘅扭力，呢個亦係摩打同引擎喺先天運作特性上嘅分別，就係喺呢一短短嘅交匯段落，你會感到剛才細密而強大摩打扭力突然不見了，引擎頓時失去剛才嘅勁度。我自問唔係貪得無厭嘅汽車用家，Prius喺呢個階段將成個動力系統tune到咁，我已經幾滿意，好落意畀85分佢，加多2、3分都仲得。

車架剛性，今代轉以TNGA（Toyota New Generation Architecture）底盤，TNGA，大多數用家見過呢個名就算，邊會理得你係乜東東。實在感受，Prius比上代紮實咗好多，上代.....都畢竟係2009年面世嘅產品，7年後硬咗好多，係應份，係合理。新Prius嘅懸掛噪音唔算明顯，上代後座喺行經起伏路面時所產生嘅明顯共鳴，已不見鳥。不過，隨車嘅Yokohama ASPEC輪胎嘅早段緩震表現麻麻，胎噪亦明顯，喺我哋經常試車嘅呈祥/龍翔道，喺濕滑路面同高速過彎嘅抓著力，ok的，但靜音同舒適度，真認真麻麻哋，冇認真發揮「65」厚度車胎應有嘅優勢，自問對車胎要求高嘅你，收車後快換。

操控，坦白講，係唔係去到Fun，可謂見人見智，可能我以前揸過啲好Fun，甚至勁Fun嘅Toyota，所以，你問我第四代Prius Fun唔Fun，我只能話係Mild Fun。今代最大改進應該係軚感，回饋力度多咗啲，但所謂「多咗啲」只係相對而言，講到尾，Prius堂軚，依依係輕輕鬆鬆，塞齊屯公、「三號仔」、西隧、中環金鐘告士打道，個幾兩個鐘先返到太古坊（touchwood），落車都唔會攰嘅豐田五門掀背車。

外形嘅嘢，各花入各眼，講真，就算Prius再靚同再醜，你都會買，因為全世界得佢最有公信力同最慳油，其他製造商推出嘅，你買到嗎？你敢搏嗎？所以，有時唔使想得太多，阿Q少少，改變唔到嘅，又唔係同你核心價值或普世價值有抵觸嘅，一於咋睇唔到，當冇事發生。我喺東京車展採訪時，遇到一位專程由香港飛去睇車嘅阿叔，佢話：一對前座之間個車身同色「膠兜」（中槽裝飾連杯架）好醜樣，睇過！有幾醜啊！喺創意設計上及相關商品化課題上，我一向好信任豐田，有時更會盲從，我好慶幸自己仲識得抱包容同欣賞態度，看待呢個被稱為「膠兜」嘅裝置，我衷心希望十零年後，我仍然保持到呢種視野。

仲有一樣要批評，後排座椅坐墊應該再厚少少軟熟少少，係我大籮柚兼重磅，亦或廠方走漏眼疏忽咗呢個看似微細，但影響可以好大嘅設計呢？你幫幫下，試坐完上我哋facebook PM我，大家開心share。

Toyota Prius規格

售價：$299,600 Luxury版  $333,200 Super Luxury版

代理：Crown Motors www.crown-motors.com

車型：五門五座

體積：（長）4540mm x （闊 ）1760mm x （高）1470mm

軸距：2700mm

引擎：1798c.c. 直列4汽缸，前置引擎

馬力：97匹/5200rpm

扭力：14.4kgm/3600rpm

摩打最大馬力：72匹

峰值扭力：16.6kgm

油電混合動力系統總輸出：122匹

波箱：無段變速自動，前輪驅動

懸掛：（前）麥花臣支柱；（後）雙搖臂

制動：（前）透氣碟；（後 ）碟式

車重：1375-1400kg

耗油：27.0km/L