Photos & Video: Heat Production

以前，講緊二十幾年前，大約係90至95年，香港嘅歐洲車巿場算得上百花齊放，唔計平治寶馬呢啲有慣性收視嘅大牌子，喺街望吓，仲好容易見到Volvo、Saab、Opel、Audi、Peugeot。

同玩車資歷深嘅前輩坐埋傾計，佢哋都認同嗰時歐洲車買家，雖然係貪「有部歐洲車」，但整體來講，消費作風都係務實，對自己幫襯嘅汽車牌子，係有相當認識。俗語所謂「知道個brand最叻係乜」亦「唔係人買佢又賣」，至少喺朋友堆之間做吓功課，更加唔係「有最貴就買最貴」，每每要揀頂級版。

呢批所謂「好客」，當中不乏在港工作嘅外籍人士或海外公務員，佢哋離鄉別井，買車好多時都揀番熟悉牌子，撐國貨嘅大有人在。

喺代理角度，多「好客」係好重要，因為香港巿場細，總廠好多時要地區代理「硬哽」一啲specs唔多吸引嘅中入門級車，可能冇天窗呀，絲絨椅呀，引擎又唔算好好力，牌費又要畀貴一級嗰啲呀，總之就咁咁咁啦。

倘若客人要求唔高，只求有部歐洲車，車行「去貨」速度自然又快又穩定，咁嘅生態，係二、三線歐洲汽車品牌生存所必需嘅。

當然啦，呢二十年來，香港營商同養車環境都變咗好多，大方向係不利養車族，亦因汽車工業界形勢大變，福士集團雄霸歐洲，令每年只賣幾十萬車嘅歐洲細廠，愈來愈難生存。唔係單純話要鬥價格戰，而係結合產品質素及品牌形象等因素去分析。

講番今次主角Volvo 850 T-5R，喺1994年底登陸香港，Volvo當年係香港嘅歐洲車台柱之一，有一批專業人士擁躉，醫生、教師、大專院校教職員，亦有大量自八十年代追隨嘅「廠佬」用家。

850車系1991年發表，接替有19年歷史嘅240車系。850有多項新設計，廠方寄予厚望，亦希望將850車系，以至車廠形象變化更加現代化，吸納多啲後生客，所以決定搵當時喺歐洲賽車界好紅嘅TWR（Tom Walkinshaw Racing）合作，將850車系投放到英國房車賽（BTCC）。

Volvo 850賽車版至今仍然係富豪fans眾埋常講話題

與此同時，富豪亦計劃以限量生產850高性能版本，亦即是850 T-5R。T-5R以850 Turbo為基礎，初期預計總產量2500部，但巿場反應太好，埋單計算接近5500部。

坊間多年來有說法指，保時捷（Porsche）有份設計850 T-5R。準確一點應該話係保時捷魏沙克/維沙克（Weissach）研究中心，該中心又被稱為Porsche Weissach，佢唔單止係保時捷重要開發基地之一，亦有為其他車廠、賽車隊，以至你意想不到嘅日本品牌，提供設計、顧問服務。

源自850 Turbo嘅2.3公升（2319c.c.）直列五汽缸Turbo引擎，喺特製汽車電腦及加大渦輪增壓器壓力配合，最大馬力增至240匹/5600rpm，峰值扭力30.5kgm/2000rpm，旅行車版喺0至96km/h加速時間為7.3秒（1994年11月2日Autocar測試數據）。波箱方面有五前速手動及四前速自動兩種選擇，原廠配205/45 R17 Pirelli P-Zero車胎。

不過，廠方所指的240匹，只喺overboost（盡踩油門）維持約30秒。

驚死你唔知佢有Turbo

Volvo Japan提醒用家喺關掉引擎前，先怠速一陣，此舉有助保護渦輪增壓系統

據了解，當年接近98%輸港嘅850 T-5R均屬四前速自動波，悉數為四門房車，聞說有不多於5部屬棍波版。不過，呢副來自日本愛知精機（Aisin）嘅四前速自動波箱，其耐用性普遍得到用家認同，事實上呢款波箱亦有喺豐田及其他日本品牌嘅2公升級前驅車上使用。

九十年代中期，香港嘅高性能旅行車尚未如今日大行其道，真係要我舉實例，大概只有售價達80多萬元嘅奧迪（Audi）RS2 Avant同250匹水平對向富士（Subaru）Legacy Wagon，所以好難怪本港代理將焦點放晒喺四門房車。

波箱設有SPORT、ECO及WINTER運作模式

今次呢兩部Volvo 850 T-5R來自同一位車主阿洋，阿洋話九十年代中期嗰幾年佢唔喺香港生活，完全冇接觸過嗰期喺香港賣嘅辣車，後來番香港發展，一直想搵棍波版T-5R Estate。「英國盤」，佢覺得質素一般，轉搵「日本盤」，亦因手波版放盤難求，最終揀咗自動波。不過，阿 洋同MenClub講，只要搵到棍波版，好大機會賣走其中一部，聽落好大決心咁喎。

可摺合兒童安全座椅，3歲以下免問

富豪（Volvo）喺八十年代初已提出：城巿大部份交通意外都涉及側撞，故積極研發減低側撞傷亡嘅設計，

包括安裝喺座椅側面嘅SIPS（Side Impact Protection System）BAG安全氣袋及提高車側剛性

阿洋話，日本嘅Volvo 850 T-5R車主，其實唔多想將呢款經典車賣出國外，可能係基於「日後仲有機會買番」，又或者擔心國外玩家「亂咁嚟」，唔愛錫部車等原因。如果遇到優質盤，可能要落多少少「誠意」打動對方。

Volvo 850 T-5R Estate規格

售價：$597,600（此為1994年12月輸港四門房車版售價）

車型：五門五座

體積：（長）4710mm x （闊 ）1780mm x （高）1430mm

軸距：2670mm

引擎：2319c.c. 直列5汽缸Turbo，前置引擎

口徑：81mm

衝程：90mm

壓縮比：8.5:1

馬力：240匹/5600rpm

扭力：30.5kgm/2200rpm

波箱：四前速自動，前輪驅動

懸掛：（前）麥花臣支柱；（後）多連桿

制動：（前）280mm透氣碟；（後 ）295mm鼓式

車重：1500kg

加速：0至96km/h約7.3秒

極速：232km/h