Cayman發表至今剛好十年，咁多年嚟，因工作關係，揸過多個級別嘅Cayman，當中最深印象，亦都算係like嘅有幾款，包括第一代（987型）嘅2.7棍波版。

2.7棍波版，外型冇咩特別，冇包圍，唔惡，好似係17吋胎軨，但部車好小巧，做乘客或做司機，都覺得部車超級靈活，但又好balance，醒目又聽話，喺揸慣揸熟嘅道路走幾轉，真係覺得部車幫你睇多咗嘢，深入了解到某段路原來係咁多古惑勺鑽位嘅，又或者，原來某段路唔係咁悶，係有一定程度挑戰性。

Cayman嘅引擎聲，好刻意要傳到駕駛席，拖低幾個波入彎，啃！啃！啃！，來自引擎聲嘅逼力，比911直接到肉得多。06/07年左右，聽過不止一個人話：「Cayman正過（整體評價）997型911好多！」我最初抱懷疑態度，但當揸過Cayman之後，真係覺得山外有山。

將987型Cayman同991 Carrera對比，更覺Cayman之可貴。

相信唔少人都可能咁諗：Cayman比911低一級，馬力輸出調校要睇住911嚟set，唔可以勁過「大佬」，因而睇唔起Cayman，覺得佢「冇料到」。

大家係男人，明白的，但有時玩車，真係要撫心自問，尤其買高性能車，有啲好大power嘅車，唔係個個控得穩、控得快，即使目前「波子」已有PDK都係咁話。

Cayman喺我心目中，係一部好平衡嘅跑車（以原廠setting冇改裝而言），車輕（淨重約1340kg），過彎快，引擎、油門都反應快，人同車之間嘅訊息量與訊息豐富程度，都比911（基礎至中級）多，300匹「頭」至300匹「中」，已經足夠爽到大部份用家有排都「玩唔厭」。純粹站在享受操控樂趣，而唔受「911光環效應」所影響的話，點會唔揀Cayman。

我仲未習慣今代Cayman（981型）嘅外形，要讚佢靚，我講唔出，車，望落冇上代咁「瀟灑」，body冇咁fit，硬係覺得佢有少少輕微臃腫。不過，呢個唔淨係Cayman要面對嘅問題，911都一樣，感慨都無用，反正控制唔到。

講番操控有關嘅項目，今代Cayman嘅車身剛度比上咗再硬好多，刻意喺啲路面較闊嘅S彎急扭，實在難以用體感去辨識車架扭動有幾大，腦裡就只有「硬．硬．硬」。轉用電軚之後，今代Cayman極力模仿第一代嗰種超細緻同高訊息量嘅軚感，但係，講到尾，都係模仿，即使好似今次揸嘅Cayman GT4咁，軚盤有反皮狀嘅物料，視覺上扮到好有「落場味」，但仍難掩軚盤回饋力略帶虛假嘅事實。但係，唔like都無辦法，電軚係大氣候，個個都轉，唯有接受。

歐洲汽車傳媒業界流傳一個說法，話991 GT3只得PDK自動波，冇咗6前速棍波，令GT3嘅銷情達唔到預期目標（尤其美國、澳洲及日本），所以廠方急忙開發Cayman GT4畀鍾情棍波「GT」系列嘅車迷「頂癮」。係唔係真，由你自己判斷，反正廠方唔會畀個正式答案你。

Cayman GT4只有六前速棍波，絕對係好事。要大多數保時捷買家明白「棍波保時捷」係幾正嘅一回事，其實冇必要，最老土嗰句：「啱你就埋嚟」。畢竟，Cayman GT4嘅最終產量，唔會多過1000部。

Cayman GT4製作配方好大路，「塞」副大c.c.大馬力引擎同特別配置嘅懸掛系統。

引擎來自911 Carrera S嘅385匹水平對向六汽缸引擎，前懸掛來自GT3（包括Wheel bearing、部份搖臂、避震機、和尚頭、車胎），以配合比一般Cayman闊13mm嘅跨距，另外，GT4嘅離地距，亦比其他Cayman低30mm，出入舊區停車場，頭唇「刮底」係必然事實，出入唯有扭多幾手軚。

我喺2012年揸過Cayman R，懸掛嘅寬容度唔高，喺極平滑嘅柏油路，開心到死，但喺大老山隧道（九龍往沙田管道）之類嘅混凝土路面，簡直如坐木頭車。我最初好擔心Cayman GT4嘅PASM會唔會有足夠寬容度，好在，無論喺Normal模式下，ride quality好好，即使配咗bucket seat，喺彈跳較多嘅路面（例如龍翔道）都揸得舒服。

Porsche Cayman R

我諗：如果你參加珠海或肇慶嘅trackday，親自揸上去，去到當地都唔會太攰。據保時捷估計，廠方認為有80% Cayman GT4嘅買家，會親自揸部車去Trackday（即係唔會用「怪獸車」載去賽車場），所以好睇重要有合理嘅跑車懸掛柔韌度。以目前245/35 R20（頭）295/30 R20嘅Pilot Sport Cup 2輪胎規格，卻有如此理想嘅早段緩震及整體吸震表現，任你搵個最厭尖嘅巴打去舉分牌，至少畀佢90分（100滿分）。

快揸Cayman GT4，無論係mechanical grip或輪胎自身嘅抓著力都相當之高，同級有啲咁上下馬力嘅Turbo快車，但就冇咗喺大油出彎嗰種高黏力與靈巧兼備嘅特性。揸住Cayman GT4，好快就有信心喺空間充足嘅大彎，用更進取嘅扭軚幅度Turn in。個尾走咩？放心喎，唔會「跌死」你嘅，定住堂軚或少少相反軚，車頭夠晒「頭grip」，畀你好smooth咁出彎，咁嘅表現，Cayman同Cayman S一定做唔到，即使用技術搭夠，始終都會有少少生硬，特別喺慢彎。

Cayman GT4配電力輔助轉向系統（又稱電軚），唔會太輕，轉向比例清楚，但路訊唔夠多，你總會同自己講：「喂！呢幾個彎，堂軚應該畀多啲feedback我喎」，但事實，佢嘅「解像度」真係唔算高，極其量只係比高清多少少，仲未達全高清。不過，年青一輩或根本不在乎「軚感」為何物嘅車迷，相信已經好開心。

呢款來自911 Carrera S嘅3.8公升水平對向六汽缸引擎，轟烈同癲狂程度，同997 GT3 Mk II嘅3.8機器尚有好一段距離。廠方亦好老實話，冇刻意為GT4呢個project大改引擎，只係更改咗進氣系統（因為Cayman屬中置引擎設計，引擎艙佈局大不同）。聲，依然係呢副3.8公升平六機器嘅強項之一，加埋附有活瓣裝置嘅排氣喉，扭匙著車嗰刻已氣氛一流，肯定對得住自己，冇買錯車。

不過，我哋同好多國際汽車傳媒一樣，嫌Cayman GT4嘅二、三波偏長氣。如果二波「到頂」大約100km/h左右就good fit（目前「頂位」約130km/h）另外，引擎動力最旺盛段落正正喺4800rpm至7000rpm左右，你想衝上去呢段黃金段落「歎多一陣」「爽多一陣」咩？真係要執生，又或者求勁有仙氣嘅女神幫你手，超速嗰刻將你部車隱形，慈母同橙色盒子即時當你唔存在。

Cayman GT4嘅波檔閘行程短，檔閘同三個踏板嘅pattern清楚，要讚。不過，檔閘嘅阻力似乎大咗啲，每逢推與拉，都欠咗份爽勁，臨近檔閘行程末端，亦冇好似被「啜入去」嘅緊緻感覺。係我哋雞蛋裡挑骨頭，抑或真有其事，請自行判斷。

喺保時捷嘅歷史裡面，GT1、GT2、GT3呢類型號係Best Buy，買咗包冇後悔。Cayman GT4雖然喺動力及傳動組合有少許不足之處，但整體得分仍然好高，要我畀，至少畀88分。有眼你睇，911（GT3例外）、Boxster、Cayman全面轉用Turbo引擎，GT4呢啲打正招牌sell自然吸氣平六引擎、獨沽一味六速棍波嘅niche model，必定係未來嘅modern classic，玩得起，快買！

如有朋友同你講「Porsche棍波好難放盤，冇人要㗎」，有勞你幫我forward賭神高進叫人番印度食蕉嗰張jpg畀佢，真心唔該！

Porsche Cayman GT4規格

售價：$1,410,000起

代理：Porsche Center Hong Kong www.porsche-hongkong.com

車型：三門雙座

體積：（長）4438mm x （闊 ）1817mm x （高）1266mm

軸距：2484mm

引擎：3800c.c. 水平對向6汽缸，自然吸氣，中置引擎

壓縮比：12.5:1

馬力：385匹/7400rpm

扭力：42.8kgm/4750-6000rpm

引擎最高轉速：7800rpm

波箱：6前速手動，後輪驅動

懸掛：（前）麥花臣支柱；（後）雙搖臂

制動：（前）380mm x 34mm 透氣碟；（後 ）380mm x 30mm透氣碟

0至100km/h加速：4.4秒

0至200km/h加速：14.5秒

極速：295km/h

車重：1340kg

耗油：10.3L/100km（公路及巿區混合測計模式）

行李艙容積：（前）150公升、（後）184公升

油缸：64公升