新一代柴油私家車登陸香港巿場已有六年，雖然型號唔算多，售價唔算大眾化，主要以平治、寶馬、奧迪德國品牌為主。多得寶馬320d、520d及平治E 220 BlueTEC，呢一、兩年多咗唔少人知道新一代柴油引擎有幾慳油同寧靜，所謂慳油，有人稱為「襟燒」，MenClub早前訪問過一位320d用家，據佢講，每入滿一缸柴油，可以行駛約900至930km，平均五、六毫一公里，羡慕死我。

照我觀察，呢類買柴油私家車嘅用家，年紀及外形大多較成熟，斯斯文文，至少35歲過外，絕少見到青年才俊，型男索女揸住部320d。呢類用家普遍認為自己是精打細算，擅於「計數」，消費模式相對保守，講得難聽啲，就係穩陣至上，要說服佢哋Hybrid車、電動車有幾妙有幾聰明，啲動力點收點放，註定浪費時間心機。

上述提到呢類柴油車用家，普遍作風低調務實，少有高調表達自己。可能連facebook都唔玩，就算玩，幾個月都未必update一次。因此，想睇佢哋喺facebook晒自己部柴油私家車有幾慳油，可能性係近乎零。

用過好用，卻沒見人、見狗、見鬼都在讚，「好消息」與「口碑」自然傳得慢，再加上香港人普遍對柴油私家車認識不多（唔少人唔知咩叫柴油，只知道入油），就算所謂識，可能基於個人口味，普遍仍存有偏見，覺得柴油引擎屬「次等或劣等科技」，認定買呢類車嘅人寒酸、無錢。

香港，就係咁變態！

MenClub預咗呢類柴油私家車報告唔會多人睇，更唔會多人Like，梗係啦，知音者少嘛。唔緊要，我哋覺得好嘅車就多介紹，即管盡做。

Mazda6 Diesel 2.2配一副Euro 6 2.2公升柴油Turbo引擎，最大馬力175匹/4500rpm，峰值扭力42.8kgm/2000rpm。買柴油私家車，就係貪佢夠扭力勁，嗰種feel就好似喺Office坐住張轉轉椅，叫全公司最大份嗰位女同事一腳伸到你老遠，嗰股瞬間爆發出嚟嘅驚人推力，上斜同起步加速都超爽。

試車時，我由青山公路深井迴旋處駛上屯門公路，再沿左線駛上汀九橋的接連道路，好輕鬆，最正係畀到你好輕快嘅加速感，雖然滑溜程度不及V8電油引擎，但嗰種不費吹灰之力的加速力，加上每公里「洗費」只係幾毫子，形成強烈對比，實在So Good！本住明知會畀代理埋怨我都要同你講：買Mazda6，揀Diesel 2.2，電油版，係幾好，但真係唔及柴油版咁正！

連《CAR》呢種奄尖挑剔的英國汽車雜誌，都給予Mazda6 Diesel 2.2四星評價（五星滿分），操控四星，性能四星，Feelgood factor，都係四星。會唔會收咗人錢先寫得咁好？朋友，少啲疑心，有mood嘅話多啲親身試車，體驗過之後，再落力插爆我都未遲。

Diesel 2.2配一副六前速自動波箱，冇Sport模式，更冇Economy模式，香港人一睇，嘩！萬事得咁孤寒啊，點都要有啦！人哋寶馬320d都有幾個mode喎。

你咁叻豬，仲唔快啲去買320d！一分錢一分貨，賣$299,900嘅Mazda6 Diesel 2.2，冇咁多電子設定，我覺得絕對可以接受，平心而論，萬事得呢副六速波箱同呢副柴油引擎嘅匹配程度，比電油版更好，對油門踩踏緩急嘅感應智能度固然較高，而且頭三個波段嘅轉波質感好順滑，由靜止起跑或在路口上高速公路，整個動力及傳動組合，都畀到你「彈射」感覺，30萬以內咁大力，又咁慳油慳錢嘅新車，只有佢。

懸掛調校方面，我覺得柴油版比電油版嘅懸掛行程稍長，韌挺度相對較高，換然之，過橋過渠蓋，以至駛過密集嘅巴爛路段（大幅度或短促嘅密集往復動作），柴油版的濾震表現都較細緻軟熟，儘管輪胎配搭與電油版相同。

有冇缺點？有，燈位怠速時柴油引擎嘅喳喳喳喳聲響，依然透過車門或玻璃傳到駕駛席，冇法，即使寶馬320d或平治E 220 BlueTEC都有類似情況，只能講句，柴油引擎，就係咁！

今次試駕嘅R-Grade版本，配附有RDS功能嘅Bose音響連11揚聲器、投射式行車資訊顯示屏、轉波撥片、雨點感應水撥、智能免匙車匙，LED頭燈、自動轉向頭燈，19吋合金輪圈及225/45 R19車胎。畀在我，我揀$299,900 V-Grade版本，慳番$50,000，$11、$12一升柴油，差不多夠入4200公升柴油，夠行多幾多里路，你自己計計，又或者留番嗰五萬去多一、兩次日本旅 行，又或者等換iPhone 6S或iPhone 7。

Mazda6 Diesel 2.2規格

售價：$299,000（V-Grade）、$349,000（R-Grade）

代理：Mazda HK www.mazda.com.hk

車型：四門五座

體積：（長）4865mm x （闊 ）1840mm x （高）1450mm

軸距：2830mm

引擎：2191c.c. 直列4汽缸Turbo，前置引擎

馬力：175匹/4500rpm

扭力：42.8kgm/2000rpm

波箱：6前速自動，前輪驅動

懸掛：（前）麥花臣支柱；（後）多連桿

制動：（前）透氣碟；（後 ）實心碟

車重：1530kg

耗油：18.9km/L 

輪胎：Bridgestone Turanza T001 225/45 R19 92W（前、後）