自從Tesla Model S及寶馬i3兩個品牌的電動車在香港發售後，的確增加了港人對電動車的接受能力。

電動車不是艱深難明的民用產品，就像用電池的玩具車，現時的電動車最難搞是電池續航力不算遠，一般來說介乎150km至190km，表現好一點的，可以走遠點，有200至300km。

香港的新車巿場其實選擇眾多，要買部巿區代步的全新車，難度十分有限，閉起雙眼對著汽車雜誌的車價表隨便一篤，都可以買到整體表現理想的全新車，所以，如果你認為自己是汽車用家「新豬」，MenClub一定不見議你立即買部電動車，因為你有機大機會玩不起，說玩不起不是因為我假設閣下的財政能力，37萬有找，不是大數目 。

而是，要投入本地的電動車用家巿場，不是先問「e-Golf買唔買得過」，而是先要肯定住宅或辦公地點有穩定及就近的充電配套，可以輕鬆以「慢充」充電（倚賴「快充」不是長遠之計，一來只能充電至總容量的80%，二來，長期「快充」亦會加快縮減電池壽命）。否則，每晚放工後都要特意揸車到充電站，然後再截的士番屋企，翌日早上又要預早半小時步行或轉乘小巴去取車，我問你仲有冇癮？用電動車省下來的油錢，至少有一半都用來進貢的士大佬。

福士說要推出電動車，大大話話講了三幾年，由概念型到推出巿場，傳媒及公眾都先後見過幾款prototype，不過，廠方由始到終都是指定以Golf作為平台，而且是最「入到屋」的五門版本，並無像寶馬i3一樣，開發全新底盤及車型。

我先後以傳媒及用家朋友的身份試駕過寶馬i3，我很欣賞這款車，空間闊落，車廂設計很獨特。不過，我更喜歡福士e-Golf那種入世，最起碼，它就是一部Golf，五門設計，好實用，車胎雖是馬牌（Continental）的特製系列，但要找相近尺碼的替代品絕不困難，而且又多又平。

e-golf配一個115匹及27.5kgm嘅永久同步摩打，峰值扭力拍得住第五代Golf GTI，波箱屬一前速，0至80km/h加速時間為6.9秒，加速至100km/h要10.4秒。e-Golf車上裝264粒鋰離子電池，重量約320kg，全部放置在中槽、前座後座及行李艙底部，所以車身淨重雖然接近1600kg，但重量分布算平均，靜止起動大力加速，又或急速制動，車頭都無明顯仰伏。充電速度方面，大致與同級電動車相似，以家用13A插蘇充滿電要13小時，用快叉機，半小時可以叉滿總容量嘅8成，續航能力最少為130km，最多可達190km。

要用盡電動車在行車時及制動時的動能（Kinetic Energy），一定要多點主動設定回收動態模式。

e-golf有3個行車模式同4個回收動能模式，鍾意左襟右襟，肯定玩到無停手。相比起Model S、i3、日產leaf，e-Golf有個好設計，就算放鬆踩加速踏板（即是大家叫慣多年的油門），e-Golf仍有很大的落慣性衝力向前溜，沒有一下子停下來。所以，上車試駕約十分鐘，已經感受到e-Golf嘅加速反應，相當之有引擎車味道。

我刻意在徒斜的下坡路段，轉用回收動能表現較高的模式，索性不踩制動（brake），由它以穩當步伐落斜，根據行車電腦顯示，短短約1公里，已能賺回約8公里的續航距離。

配得Golf嘅底盤，買家或多或少對操控表現都有啲期望，e-Golf嘅懸掛特性同韌挺度大致同122匹嘅1.4 TSI相似，都係以舒服為主調，懸掛運作時噪音唔高，而55厚度嘅車胎喺起伏路面嘅緩震表現得分幾高。今代Golf底盤先天擁有不俗的turn-in反應，但e-Golf始終配搭著重乘坐舒適性的車胎，而且車重較 高（連計三名成年男士及約50kg攝影器材），車重接近1750kg，要以較快速度及急激扭軚方法攻窄彎，車胎會短暫大幅度變型，令車身傾側幅度稍多。我們很清楚針無兩利，e-Golf作為斯文舒服的德國hatchback，整體操控表現已達上佳水平。

以e-Golf的車價，經已可以買到多款有型又高性能的Golf，例如GTI及Golf Cabriolet，加畀10萬，更玩到Golf R，如果本著單純尋開心的態度，實在無可能想到買e-Golf。不過，如果用輕鬆一點的心態去看，將e-Golf視為一種新遊戲、新科技，而你亦覺得30多萬不是太數目，玩得起，那麼，就趁早去玩。