平治入門級汽車車系A-Class、B-Class、C-Class，你會點揀？

我會首選C-Class，理由係我可能守舊，即使「A仔」面世18年，「B仔」（B-Class）亦有10年歷史，但我仍覺得只有C-Class才算得上是平治車系line-up的起點。今代C-Class Estate尤其精彩，樣靚，空間大，引擎配搭又合香港環境，揀部C 200 Estate，小家庭或兩口子加隻狗，已好夠用，無需買MPV，出入高級場所夠體面，50萬有找，價錢合理。

得要面對現實，好些人買車至緊要車廂大，他們不會跟你慢慢討論何謂緊湊車廂佈局，總之愈大愈好，視覺行先，心理尚上抵食夾大件，懶得理又闊又高的車廂會否削弱操控表現。

因此，難怪B-Class在2011年底宣布輸港後，立即引發爭購潮。B-Class的確有其獨特優勢，就算未放平後座座椅，置物空間已達488公升，比大多數日本級行政房車的尾箱都大，如果放平椅背，空間更增至1547公升，比上文提到「首選」的C-Class Estate還要多57公升，所以，如果你真係要買「空間大」的入門級或中入門級Benz，B-Class先算得上最佳之選，C-Class Estate最多只能排第二。

我在2011年底到過奧地利試駕今代前期型B-Class，今代B-Class最大突破在於改用1.6公升Turbo及2公升Turbo新引擎，波箱亦由以往的CVT變成雙離合器（Dual Clutch）自動波。我還記得當時是這樣的想：Turbo引擎配Dual Clutch，起步應該幾好力，加速亦應該好爽好快。

實情是，波箱轉波反應滑溜（尤其慢車、塞車），但波檔升降不算快，而Turbo引擎的低扭亦未算強韌，極其量只算豐富，那一次，我有點失落。另外，當時的B-Class外形，真的太像家庭車。我明白嘅！B-Class這種為爭取更多空間，天生方方哋嘅掀背車，即使設計師用盡掩眼法，都無可能達到「心口有排朱古力」，最多只係「盡縮肚腩」。

轉眼又三年多四年，去年有「寶馬B仔」稱號的2系Active Tourer加入戰團，B-Class當然要「做嘢」。坦白講， 2系Active Tourer與B-Class都無靚仔有型的血統，這種車是實實在在的賣空間及舒適乘坐感，要型要潮要有跑格，點解唔揀3系、C-Class、1系或A-Class？大家應心中有數，無謂表錯情。

今次改動主要集中在頭尾泵把、鬼面罩、泵把及兩側車窗下緣都新增了鍍鉻飾條，而今次試駕的B200，更裝有碳灰色輪圈，再加上兩側的擾流部件及「頭唇」，跑味的確比facelift前吸引得多，礙於拍攝當日天氣不佳，或許未能透過圖片及短片，睇到車身漆油原來是深紫色。

開車揸上手走幾個大彎，已發覺前輪比以往貼服，當然吧，配用225/45 R17尺碼Yokohama Advan Sport車胎，行經快彎亦較穩定。最大改進，要數波箱的轉波反應，E模式繼續一貫設計，好柔，每每驚你多踩油，ok，我知你錫我銀包。但想放工「玩吓」，揸得爽少少，一定用S模式，油門反應及轉波智能度都大有改善，終於似番部160匹左右的歐洲Turbo掀背車仔，稍為惡搞，催逼轉數至高轉，車廂隔音仍然理想。

介紹和試駕B-Class這類車，不用說得太花巧，你問我，2系Active Tourer同B-Class邊部好，我肯定揀B-Class，因為車胎緩震力比2系Active Tourer好得多，「哦」完唔好就咁算數，記得以自己試車感受作準。