Photos & Video: Suzuki Production

YouTube這東西真好，一直想重溫的1990年澳門東望洋大賽，最近在無意中找到。那年的東望洋大賽確實超級精彩，由當時已45歲的日本房車賽「大哥大」長谷見昌弘（Masahiro Hasemi）駕駛的日產R32 Skyline GT-R，遠遠拋離當時得令的福特Ford Sierra RS Cosworth，在贏到開巷的情況下輕取東望洋大賽冠軍。

Michael嘅招牌pose，70、80後車迷一定記得

[Youtube]http://youtu.be/SL-VNsbuQlE[/Youtube]

未巿販，先興奮

當時其中一位擔任賽事旁述的呂米高（Michael Lieu）話：「嘩！呢款車嘅四輪驅動系統極之先進，就算賣七、八十萬都值！」事隔近25年，我問Michael：「真係咁值嗎？」他笑說：「因為我當時已賣緊呢款車！」哈哈！明嘅明嘅，賣花當然讚花香。

MenClub邀請Michael再次試駕R32 GT-R，因為他是將這款「日產無敵戰車」帶到香港的第一人。R32 GT-R於1989年8月日本推出前，Michael已經有機會率先試駕，他說：「當時日本的改裝商朋友（東名Tomei*）表示，他們已有樣板車到手，準備用來開發R32 GT-R的改裝零件，歡迎我到東京試車。」「去到東京，對方俾條車匙我，『就係呢㗎嘞！』，哈哈，那個年代，當然會在首都高『片吓』試吓極速啦！」

*東名Tomei由日產廠隊車手鈴木誠一於1968年成立，一直與日產關係密切，80年代末更曾被NISMO委託開發三級方程式賽車引擎

GT-R NISMO限量生產，當年日本本土供不應求，但Michael在日人脈廣，成功爭取10部輸港

＿！起步咁慢嘅！

Michael所試的，是日產為符合全日本房車賽型號認證（Homologation）所限量生產500部的GTR NISMO，他仍清楚記得駛上公路後的首個感覺：「＿！起步咁慢嘅！唔去嘅！因為Turbo只set到0.7 bar，個boost好低，而且配大turbo，結果起步反應好慢，雖然成部車好順。後來當部車行咗幾千里break in之後，決定改動wastegate actuator，內裏有個breathe control valve控制boost pressure，只要改配一個類似機械式放氣『水喉掣』，立即可將增壓力增至1.0 bar，加速表現即時唔同晒，後來再加大至1.1 bar，直情好似火箭！（編者按：R32 GT-R原裝電腦當感測到增壓力達1.2 bar即自動cut油）（Michael，筆者和這部R32的車主一齊大笑）」

Michael補充：「好多人改R32 GT-R，改電腦，將點火timing校快，咁樣係好危險。其實只要改動wastegate actuator同保留原廠嘅airflow sensor，已經可以將最大馬力增至約350至400匹。Airflow sensor感應多咗空氣，畀多啲油injector，直至injector冇時間pulse，咁樣改，好安全。」

R32 GT-R推出不久，日產總廠製作了一套約10分鐘的英語短片，宣傳當時最新日產汽車的駕駛樂趣，在國際車展及海外銷售網絡的陳列室播放，唯片中的R32 GT-R仍是JDM，未有出口，讀者可以睇到當年日產試車員如何激劈Nurburgring北圈

[Youtube]http://youtu.be/_qJyVmylkQY[/Youtube]

為入32，智鬥運輸署

Michael回憶當年進口R32 GT-R的棘手過程：「當時香港政府只承認美國、歐洲及英國的汽車廢氣排放標準，由於我不是正式代理，廠方（日產）不會向我們發出廢氣紙（廢氣排放檢測報告），而當時香港法例無列明如何處理這類自行入口的日本車。我到日產廠方翻查過R32 GT-R相關的廢排文件，發現其廢排水平（包括NOx及CO2），其實遠低於同期的歐洲標準，事實上，當時日本的廢氣標準差不多是全世界最嚴謹。」

Michael初期與香港運輸署交涉多次未果，但他的立場一直很堅定，理由係：「我部車嘅廢排標準明顯比法例要求嘅低，無理由唔畀我出牌。」他續說：「佢哋（運輸署）始終講我哋唔贏，亦恐怕雙方一旦要打官司，勝算極微，最後要求我找一家具政府認證的機構檢驗廢氣水平，倘若報告顯示GT-R符合香港法例要求，即可出牌。」

Michael立即找日本車輛檢查協會（Japan Vehicle Inspection Association，簡稱JVIA）幫手，成功過關。據Michael表示，當時的JVIA要員，不少都是日本政府運輸部門退休後的公務員，而JVIA亦是日本政府承認的中立驗車機構，檢驗進口至日本的法拉利、林寶堅尼，以至其他名不經傳的汽車。

霸氣！R32原裝金屬車匙

上文提過，R32 GT-R 1990贏得東望洋大賽後，立即成為不少當代香港玩車男的dream car，筆者當年還是「Form 1仔」，只能靠遙望窩打老道環球模型鎮店之寶－FUJIMI 1:12 R32 Skyline GT-R模型發白日夢。Michael話記得當年去中環high tea（好似係已拆卸的希爾頓酒店，長江中心現址），將刻有GT-R徽號的原裝金屬車匙交到酒店職員，立即引起哄動。

呢款車匙，時至今日仍然咁型，有冇興趣搵番部R32 GT-R玩玩？

話雖dream car，但當年的R32 GT-R售價平均由70萬起錶（喂！90年沙田第一城13座中層向河景單位都係68萬咋喎！），真係幾考驗心理關口，畢竟那七、八十萬不是花在保時捷，而是一部日產轎跑，未必個個明白箇中優點。

Michael話當年向他（Promax）購買R32 GT-R的買家，不少均屬賽車手：「佢哋長期有賽車，鐘意快車，亦都識得欣賞真正高性能汽車，而當時嘅皇者，毫無疑問係R32 GT-R，就算歐洲其他辣車，幾大馬力幾巴閉都好，都唔會有呢套咁先進嘅four wheel drive系統，呢個系統係以當年保時捷959所提出嘅四驅理論，再加以改良製成。我好有幸揸過香港唯一一部行貨959（編按：時為1988年，可翻查同年《車主》），兩套嘅四驅系統，感覺幾乎一模一樣。」

458．Freed．CASIO

筆者對上一次訪問Michael，已是2009年底，當日他接受訪問時還駕著430 Spider。他笑言：「Ferrari其中一個比Lamborghini優勝之處，係車廂按掣唔會同其他車共用，你睇Lamborghini，啲掣來自Audi；我都好唔滿意R32 GT-R套冷氣，啲掣都係來自其他日產車。」處女座嘅呂米高，果然好閹尖。

Michael嫌稅貴，訂咗458 Italia「冇攞車」，但而家好後悔，因為法拉利好可能唔再造自然吸氣V8引擎

Michael睇好458 Italia日後會好值錢

Michael在6年前已講過，棍波車早已過時，他亦表示有近一年冇揸過棍波車，但對自然吸氣引擎亦相當熱衷，「之前訂咗458（法拉利458 Italia），但我冇攞車，啲稅太貴。不過，我而家後悔，早知有就Keep住佢，因為佢哋唔再出自然吸氣V8引擎，第時啲Turbo聲一定唔同咗，458日後一定好值錢。」

Michael話自己要求高，有時幾硬頸，但好嘅嘢一定會堅持，佢20多年來都戴Casio Databank Series，算唔算係擇善固執？

你實會問，Michael而家揸咩車？答案係包你估唔到嘅本田Freed；「整個香港環境都唔適合高性能車使用，最適合可能係七人車。」，呂米高同你講七人車最啱香港，好意外呢！不變的是，他左手所戴的，依然是廿多年仍無變過的Casio Databank 150系列，Michael以前提過「一買就買十幾隻，因為有時玩水上活動，好易整唔見手錶。」

玩車環境不斷退步

Michael以前鐘意玩車，所以進口日本版汽車；近十多年，他愈來愈熱衷水上活動，駕駛遊艇及高速橡皮艇，其公司Promax的業務焦點也由車變做船。「車賽得耐玩得耐，真係厭咗少少，想贏嘅亦贏過晒，而家想玩啲可以令我自由去邊就去邊。我以前經常賽車，完咗賽事會揸隻快艇出海，舒緩晒之前嘅壓力。喺香港玩車已經唔可以再有進步嘅境界，已經一路一路退步，轉眼可以冇晒15分，但香港大部份水域都無速度限制（除了海港及個別海灘），我哋賣嘅高性能橡皮艇，幾似越野賽車，喺大浪揸，會跳起，landing同過彎要控制得好，考你駕駛技術⋯⋯」聽到我好想試吓。

1988年，出戰世界越野錦標賽（WRC）美國華盛頓州分站，成為首位在該賽取得分數的香港人，詳情參看以下網址：http://www.ewrc-results.com/final.php?e=2471&t=Olympus-Rally-1988

mute機睇澳門大賽車

年多前有網民在某討論區出po，話近年每逢有澳門大賽車都好懷念呂米高講賽車嘅日子，又話香港賽車評述界後繼無人。我將網民心聲轉告Michael，佢話：「我唔係特別鐘意『講賽車』，做賽車旁述，因為當年一大班賽車嘅好朋友去澳門，有時大家揸隻船過去，嗰時好開心，電視台嘅朋友叫我玩吓，就係咁開始。」

可能我頑固，不願接受新一代的澳門大賽車評述員，所以近年我都mute住睇直播。

始終，都係呂米高最好。