寶馬與平治在高性能汽車激鬥的局面緣於八十年代，或者應該說，兩家車廠最初都無意要擊倒對方。事實上，寶馬E30型M3賽車早期最成功的領域，不在德國本土，而190E 2.5-16在八十年代中期的德國房車賽(Deutsche Tourenwagen Meisterschaft，簡稱DTM），表現仍未算穩定。但當進入89、90年賽季後，兩大陣營於DTM的戰況愈趨激烈，無論是來自同一陣型或對家的車種，經常要鬥到衝線前方分出勝負。

而根據當時DTM賽會要求，參賽車輛之製造商均需要就新改良的戰車，推出賽例要求數目的道路版本（俗稱街車），因而令寶馬及平治分別推出M3 Evolution、M3 Sport Evolution、190E 2.5-16 Evolution及190E 2.5-16 Evolution II。

[Youtube]http://youtu.be/KBhCoxxQof0[/Youtube]

德國柏林申辦2000年奧運的車身拉花

MenClub得到車主Adam幫忙，慷慨借出這兩部經典德國快車。Adam非常喜歡八、九十年代的寶馬，亦擁有多部M Power寶馬，他欣賞那個年代的寶馬操控，例如車身輕、重量分布好、入彎反應快、軚感豐富、車身動態夠平衡自然，而直六自然吸氣引擎聲更令人血脈沸騰。Adam話：「而家啲寶馬係好快，但真係做唔番以前嗰啲軚感，唉！」

E30 M3一直只推出左軚版，但歷年有不少有心人「左改右」，部份的改得相當不俗。另外，在國際易手汽車巿場上，偶有聽聞少數放盤聲稱是「廠方為特定巿場VIP製造的右軚版」，孰真孰假，或只是完美的誤會，看倌請 自行判斷。Adam有見及此，數年前開始物色真真正正的左軚M3，並將目標鎖定在M3 Sport EVO，他說：「如果每日都可以開這種車，一定勁開心。」

E30 M3 Sport EVO配代號S14的2.5公升直四引擎，最大馬力調高至238匹，聽聽話話以2000rpm，保持住60km/h、70km/h行車，「力水」認真普普通通，當轉數上升至5000rpm終於顯露真功夫，爆炸力好強勁，S14雖屬直四格局，但高轉時的叫聲仍有多少寶馬直六味，有趣！在6000rpm至7000rpm，對油門一踩一放，可以清楚感到引擎的呼吸脈膊與震動，感覺就似用心口攬住引擎。Adam在前座乘客位話：「好似揸Kart仔咁刺激！」

這部平治Mercedes-Benz 190E 2.5-16 Evolution II到Adam手之前，曾經長時期被收藏在日本，可能是當地汽車收藏家對汽車保修有相當高要求，所以當我著車泊位及試車頭幾分鐘，已覺得整部車的行車暢順性、轉波、動力輔助轉向力度、懸掛緩震的韌挺度，都仿如只用了一、兩年的新車。大哥，Evolution II係90年3月發表嘅平治啊，有乜可能24年後個「ride」仲咁好！低轉扭力亦咁飽滿，點解！點解啊！Adam話：「我比較過兩部車，始終覺得Benz低扭好啲，輕鬆揸已覺得好smooth。」

相比M3 Sport EVO阻力較大的檔閘設計，平治190E 2.5-16 Evolution II的檔閘阻力就低得多，用現今高性能棍波車的標準評價，實在低得有點兒戲，但我肯定不是這一部190E 2.5-16 Evolution II有問題，因為我以前試過兩部棍波190E 2.5-16都有相近情況，我同Adam講笑，「睇嚟平治都係造自動波車叻啲喎！」

平治Evolution II在外形上，無疑比M3 Sport EVO搶眼。Evolution II簡直不似出自八十年代末仍然標榜形象尊貴的平治車廠，差點誤以為是車迷亂改一通的飛仔車。其實，Evolution II的擾流部件由當時德國史圖加特大學的氣流力學教授Richard Eppler設計，Eppler乃德國氣流力學權威，桃李滿門。企近望，原來尾翼角度可以獨立調校，且附有三個角度，先用螺絲批鬆開五粒並列的螺絲，再逐格推，你話幾old school呢！你試試喺鹿頸停車場咁樣set尾翼，揸麥拿侖MP4-12C嘅車主會唔會笑你？

近年歐洲經典車價格持續高企，目前要買一部Evolution II索價接近一百萬港元。另外，即使你肯落本，亦都要考你耐性，因為上述兩款車屬左軚車，就算你是車房、車行的東主，亦不能用紅色T牌行個方便。Adam能夠帶兩部愛車出街，全靠申請了運輸署的「老爺車行駛許可證」，一年可以使用12次，每次使用前需先到運輸署申請。Adam話：「OK啦！有得揸出街run吓部車已好開心。」

咁邊部好啲呢？一於學Adam，兩部都買晒佢。