有時覺得自己可能仍太眷戀昔日奧迪B5、B6型A4車系的操控表現，所以，有段長時間，約四至五年，總覺得新款的奧迪汽車的操控與玩樂味不太對脾胃。儘管如此，間中仍偶有佳作。

我首次試駕奧迪A5 Sportback要回數到2009年7月底，當時仍在《人車誌》(Car and Driver）工作，那次是在意大利舉行的國際性傳媒試車活動。當時最深印象是覺得轉向輔助力度稍多，軚感輕飄飄，行李艙空間及可擴展的空間的確吸引，外形呢⋯⋯幾流線形，但不算好出眾特別。我無補充。

五年過去了，再次試A5 Sportback，印象係，外形幾襟睇，遠望修長，roof line靠近尾玻璃位置，側望近望都好滑溜，令我想起2004年由日籍奧迪設計師和田智（Satoshi Wada）執筆的C6型A6。今次的Black Edition，包括S Line包圍、Audi Exclusive Black Styling Package、19吋「五爪式」合金輪圈、Audi Drive Select、Sports懸掛付damper control、Dynamic Steering、黑色車廂頂篷及跑車前座椅。

Black Edition的售價為$627,600，咁請問非Black Edition幾錢？$569,800。

其實買得60萬元級汽車的買家，大多數都不介意多付五、六萬加點option。本著凡事查根究底，非人云亦云，人加我又加的心態，總應為你逐點評一評。

個人認為A5 Sportback原有外型已有足夠魅力，斯文優雅，配S Line包圍，確係增添了不少跑味，但我認為兩、三年後，將有S Line包圍同無S Line包圍的A5 Sportback同場對照，那麼，無包圍的一定更能抵受時間考驗。

19吋「五爪式」合金輪圈，少少惡，你可以話有霸氣，但揸Audi，真係一定要cool、要有霸氣，甚至殺氣騰騰，成個jit都唔笑個「龍五」咁款？不見得。

Sports懸掛付damper control啟動後，A5 Sportback turn-in入彎或在快速往還的S彎道都更加敏捷，事實上底盤剛性好高，配一套平衡到ride quality（以19吋255/35 R19 PZero輪胎而言）及操控的懸掛系統，即時令玩樂性分數上升。Dynamic Steering亦有異曲同工之妙，儘管「人工味」重，但挽回不少扭軚入彎及回中時的軚盤回饋力。信我，普通版A5 Sportback的軚感，實在太似駕駛著Camry房車，一個悶字，對奧迪操控有fantasy，好失落。

至於黑色車廂頂篷⋯⋯唔係黑就灰㗎啦，賣點吸引力一般。跑車前座椅，Yes, Please!!

輸港的奧迪新車有一個問題，就是有時配搭的懸掛系統偏硬，稍欠寬容度，當配搭大一點碼的輪胎，輪胎未能有效發揮自身應有的「早段濾震能力」，從而影響整體乘坐質素。

今次A5 Sportback卻無這種情況，即使配255/35 R19 Pirelli P Zero車胎，在中九龍、油麻地、加士居道行車天橋及東九龍的舊路，緩震表現都完全達到舒適水平，懸掛上下伸縮時的噪音亦低。啱嘞，咁先合香港路況。有得畀我話事，我不會選255規格輪胎，225匹，35.7kgm扭力兼配quattro四驅系統的4.7米車，本身已有上佳循跡性，唔使咁闊啊。