先簡單講講，Audi TT RS、RS 3 Sedan同RS 3 Sportback，全部配備馬力達400匹嘅2.5公升直列五汽缸Turbo引擎同7前速S-Tronic雙離合器自動波箱。 

實有人話，「RS 3 Sedan賣79萬，點解唔畀多10萬揀TT RS，個樣有型咁多。就算貪實用，都揀RS 3 Sportback啦！放大件物件，五門掀背點都方便過四門房車啦！」

咁嘅講法，係有佢理由嘅。

但High Performance Sedan始終有唔少fans，尤其係喺Audi陣營，畢竟好多款經典嘅Audi街車/賽車都係房車。

然後又有人話，「同RS 3 Sedan價位嘅，我點解唔揀S4 Sedan（79萬）或S4 Avant先（82萬）？話晒係A4底盤同Size，比RS 3（長4479mm）足足大一個碼，V6又滑溜啲，直五過時out㗎喇……」 

我都係嗰句：買實用車你不妨聽吓人意見；買高性能車或超跑，你自己鍾意就應立即去馬。 

話RS 3 Sedan「食咗你都唔知」，外形話到底仲係有德國車特有嘅踏實斯文，唔誇張，冇嘩眾取寵，遠望一眼，以為係喺馬路成日見到嘅A4或A3。

儘管沙板外拋咗啲啲啲，19吋「薄胎」、鬼面罩銀色外框又有黑色「quattro」凸字。 

具備「食咗你」嘅能力，係因為RS 3 Sedan確實係起跑時間好快，同你實際感覺到佢「堅快」嘅辣車，0至100km/h加速4.1秒，400匹馬力，49kgm峰值扭力，極速280km/h。

我唔知而家香港仲會有幾多德國車迷，會鍾意呢類「食咗你都唔知」嘅「低調辣嘢」，但我相信數目唔會係「0」，因為至少仲有我一位。 

講實際駕駛表現，RS 3 Sedan喺引擎同操控表現都令我好有驚喜。

呢款2.5公升TFSI橫置直列五汽缸Turbo引擎，推出至今有八、九年。

我喺2015年10月試揸過367匹嘅RS 3 Spotback，當時已覺得引擎運轉好順暢；今次喺RS 3 Sedan再試，馬力大咗33匹，純論感覺，新舊分別不大。

最值得留意係運轉質感滑溜咗好多好多，我揸過80年代嘅Quattro Coupe、S2、RS 2 Avant，Volvo 850R、S40 2.5 Turbo、Ford Focus ST，佢哋嘅直五Turbo引擎，具有豐富低扭同韌力，但整體嘅運轉質感都有帶少少「粗糙」，從來未試過好似RS 3 Sedan，如溝咗特濃忌廉般幼滑，兼且喺中高轉都好肯上衝嘅直五。

坦白講，呢款引擎兼有扭力廣闊同轉數上得好快嘅優點，個心當堂有「大開眼界」四個字。

缺點唔係冇，例如喺Comfort行車模式巡航，突然想作短途急劇加速爬頭，你一腳篤落油門，佢真係需要多啲時間畀波箱同引擎作出反應，先可以產生最大推力。如果自問係勁心急又經常「抽頭」逢車過車嘅駕駛者，我勸你長選Dynamic模式。

奧迪喺RS 3 Sedan/RS 3 Sportback/TT RS最新版本嘅直五引擎，大幅減磅26kg，包括採用中控嘅曲軸同鋁製曲軸箱，另外活塞表面為等離子塗層，以減低摩擦。 

以一部1515kg重嘅房車而言，輕咗26kg表面上唔算有乜咁特別，但我覺得RS 3 Sedan嘅車頭明顯比2年前試揸嘅367匹RS 3 Sportback輕巧靈活，高速入彎嘅轉向不足情況比馬力升級前大為改善，連帶喺啲外傾、起伏同落差稍大嘅彎位，前輪都貼服咗。

我亦覺得RS 3 Sedan嘅車尾動態，比以前367匹RS 3 Sportback活躍同投入，以好急好快咁扭軚入彎，車尾雖未至雖未好生鬼，好主動穩當powersliding，但車尾對車頭追隨確實積極咗好多，事實上奧迪喺設定RS 3 Sedan四驅時，刻意容許系統派送更多動力予後軸。

喺急彎、大彎快揸十零分鐘，已覺得RS 3 Sedan冇晒已往奧迪高性能四驅房車，「quattro四驅系統主導操控味道」，兼且略嫌規矩、繃緊。新嘅設定方向係，quattro依然好夠抓著力，整部車又有活躍嘅一面，咁嘅轉變，肯定係好事，我好like。

轉向系統，電力輔助力度恰好，軚感就唔好奢望喇，但轉向準，亦因為轉向不足情況已大為減輕，所以「快劈」急彎，大致都係順隨心意，唔需刻意步署或修正，容易揸得開心。

懸掛方面，供試車配傳統被動式吸震筒同彈簧，唔係要加錢選購嘅Audi Magnetic Ride懸掛，但喺吐露港公路或大埔公路（馬料水與大埔滘段），估唔到有幾細密嘅濾震表現，後懸仍唔多覺有雜噪，算靜，快車狀態下，車身滾動係多啲，但總算自然、合理。

前排兩張座椅舒服，包裹力承托力都好理想，個shape亦都唔錯，望落唔係肥嘟嘟。

RS 3 Sedan缺點係，後座腳位同頭頂空間只屬一般，大隻仔女坐後座或會覺得侷促，如果你真係打算當佢家庭房車咁用，最好捉埋經常會坐你車嘅家庭成員去試坐後座。

行李艙空間315公升，中規中矩，好在後座椅背可以完全放平，增至770公升，「一支公」放假去踩車，放一部「拆咗轆」嘅MTB都夠位嘅。

有留意小弟寫試車同汽車評論十多年嘅讀者，都知我偏愛TT/A3/S3/RS 3 Sportback呢類相對小巧嘅Audi，我亦毫不掩飾同大家講，我都like RS 3 Sedan。

售價80萬起錶嘅RS 3 Sedan無疑係好易開心，動力、傳動同驅動組合都好吸引嘅新盤，如果你唔介意車廠將注意力放晒落上述幾項，而令車廂「冇乜特別花巧」，咁Go啦！呢部係「低調堅辣嘅好嘢」！

Audi RS 3 Sedan規格

售價：$791,800起

代理：Audi HK www.audi.com.hk

車型：四門五座

體積：（長）4479mm x （闊 ）1802mm x （高）1397mm

軸距：2631mm

跨距：（前）1559mm（後）1528mm

引擎形式：2480c.c. 直列5汽缸Turbo，缸內直噴，前置引擎

口徑 x 衝程：82.5mm x 92.8mm

壓縮比：10.0:1

馬力：400匹/5850-7000rpm

扭力：49kgm/1700-5850rpm

波箱：7前速雙離合器自動，四輪驅動

懸掛：（前）麥花臣支柱；（後）多連桿

制動：（前）365mm x 34mm 透氣碟；（後 ）310mm x 22mm 透氣碟

車重：1515kg

0至100km/h：4.1秒

極速：250km/h（配optional package之後可達280km/h）

油缸容積：55公升

耗油：8.3L/100km（公路巿區混合測計模式） 

輪胎：Pirelli P Zero 235/35 R19 91Y（前、後）