第一句要講：本田CR-V Turbo由本田泰國分部生產，售價35萬元。 

如果你接受唔到，用35萬買一部泰國製造本田新車，咁我勸你無謂再睇落去。 

我喺今年七月初同太太到過越南胡志明巿（舊稱西貢）幾日，主要係旅遊，亦喺當地試搭咗人生首次嘅Uber，原來喺越南坐Uber非常之抵，由胡志明巿中心出機場，只係99,000盾（即33港紙），比當地租車公司收費平一大截（19萬至22萬盾），啲車新淨兼乾淨，司機哥哥手車亦都幾定。 

有幾轉Uber都係坐豐田SUV Fortuner、MPV Avanza同Innova Crysta，呢啲車可能新買冇幾耐，仲有一大浸新車味，望吓車廂裝造手工、Feel吓隔音同濾震表現，真係幾好，Fortuner仲有TRD版添。

講完去越南試坐泰版Toyota新車嘅經歷，唔係就咁求其話：CR-V Turbo賣35萬OK㗎，記得去陳列室參觀選購啦咁老土。

而係想講，泰製日本車嘅質素，喺今時今日係OK嘅，尤其係Toyota。事實上，而家東南亞、新加坡、台灣、澳洲、紐西蘭有好多售賣嘅日本牌子型號，都係產自泰國，包括呢款CR-V Turbo。

打開門坐上司機位，中、後排「玩」咗一輪，發現相當齊料，中控台大面板Mon對應Apple CarPlay同Android Auto，早前推出嘅Subaru XV都有，呢個時代唔可以少。

導航系統設有倉頡輸入，對應香港字，咩「鰂」魚涌、深水「埗」全部清晰顯示，操作介面亦好醒目易用。

中排座椅可作60:40獨立分割，並作前後移動，雖然係「例牌嘢」，但中排前後滑動距離夠長，空間運用彈性大好多。

我最鍾意第三排天花設有獨立出風口，而且有3段風速控制，試坐過，涼浸浸，就算畀人「吩咐」坐後座，騰出中排或前排座位畀長輩級乘客，都唔怕熱到成頭汗，呢樣要讚。

不過，第三排腳位唔算好鬆動，事實上代理亦都話明CR-V Turbo係5+2 SUV，叫得做「+2」，要有心理準備呢兩個位冇前、中兩排咁駕勢，好在第三排坐墊闊度同深度都OK，屁股大啲都坐得穩陣舒服。

兩側後面可作90度開啟，方便上落中、後排

幫朕check完乘坐空間同基本配備之後，係時候試車。

CR-V Turbo配1.5公升直四Turbo引擎，最大馬力193匹/5600rpm，峰值扭力24.8kgm/2000rpm至5000rpm，波箱屬無段變速CVT，配7前速手動加減轉波模式。1500c.c.牌費有接近200匹馬力，當然開心，峰值扭力數字同輸出起點亦相當唔錯。

我刻意喺沙田馬場、中文大學、九肚山一帶嘅斜路緩慢上斜加速，發覺引擎喺千零兩千轉左右嘅低扭的確幾豐富，追近滿座嘅小巴緩緩上斜，收油後再加速，動力厚韌，細c.c. Turbo引擎做得咁，算係喜出望外。

不過，唔係無嘢投訴。CR-V Turbo配235/65 R17胎，而且係Dunlop SP Sport Maxx，睇返車重1667kg，扭力亦只有24.8kgm，兼且配備四驅系統，真係唔使配235咁闊同SP Sport Maxx呢類相對注重性能表現嘅輪胎。

揀啲窄少少，滾動阻力低啲同更講求緩震表現與舒適度嘅車胎，一定可以令CR-V Turbo嘅起步更爽快。

我喺2015年7月尾試揸今代Stepwgn，已讚過本田最新一代嘅CVT波箱傳遞動力嘅質感實淨咗好多。

CR-V Turbo嘅CVT波箱都有呢種優點，轉去手動轉波模式，喺吐露港公路以3、4、5波奮力加速，加速感緊湊，儘管同最高質素嘅傳統扭力轉換器段速式波箱（例如寶馬ZF 8速AT）仍有相當距離，但以一部針對家庭用家嘅7座位SUV嚟講，CR-V Turbo目前嘅表現已好好，至少我肯樂意「收貨」。

呢代CR-V都幾大部，尤其係闊度，再加上車身高，泊路邊位最好慢慢嚟或預鬆少少，過線亦應該望到清楚先好cut。隨車附設盲點顯示系統同多角度倒車視象系統，對初次轉揸大size高身車嘅用家嚟講，係幾幫到手嘅。

CR-V Turbo喺操控方面，整體算係流暢，軚盤輔助力度再冇以往嘅Honda咁「輕飄飄」，喺高速公路天橋彎位或山路，有較實在同安穩嘅駕駛感，高速時急煞力豐富，車頭亦冇大幅度下潛。

透過中控台屏幕檢查左邊車身與路邊距離，大大減少「揩」花輪圈或撞到途人嘅機會

一撳掣，即係可以檢測盲點

要雞彈挑雞頭，就係前座乘客席嘅真皮包得未夠貼服

CR-V Turbo預售時開價35萬，執筆時2017年之配額已沽清，而家落訂，要到2018年先交車，售價亦已上調至$359,880。

講到尾，齊料、靚specs嘅日本大廠SUV，始終有不乏fans，你呢刻未接受到泰版Honda，唔緊要，好多人已衝破咗呢個心理關口。

Honda CR-V Turbo規格

售價：$359,880（2018年製造）

代理：Reliance Motors www.honda.com.hk

車型：五門七座

體積：（長）4590mm x （闊 ）1855mm x （高）1690mm

軸距：2660mm

跨距：（前）1600mm（後）1615mm

引擎形式：1498c.c. 直列4汽缸，缸內直噴，前置引擎

壓縮比：10.3:1

馬力：193匹/5600rpm

扭力：24.8kgm/2000rpm-5000rpm

波箱：無段變速自動（附7速手動加減功能），四輪驅動

懸掛：（前）麥花臣支柱；（後）多連桿

制動：（前）透氣碟；（後 ）實心碟

車重：1667kg

油缸容量：約57公升

耗油：7.5L/100公里（NEDC測計模式） 

輪胎：Dunlop SP Sport Maxx 235/65 R17 104H（前、後）