喺香港買凌志（Lexus） GS/BMW 5 Series/Mercedes-Benz E-Class/Audi A6呢類行政級中大型房車，我一向覺得配副2公升直四Turbo引擎已好足夠。

好坦白，呢類車一配大少少c.c.嘅引擎，到你想賣，好鬼難搵人接手；細c.c.，耗油相對低啲，較容易遇到一班升呢玩「中型行政房車」嘅易手車客。

就算唔賣，自用揸到尾，養都冇咁肉赤，划算好多。

再講，呢個級數嘅Turbo引擎，閒閒哋都有35kgm扭力，亦都有副7/8速自動波箱，喺香港呢啲彎多路斜嘅城巿，絕對能夠做到段段好力。

部份人覺得：買得呢個級數嘅車，唔多care耗油。

我諗，呢種只係一般人，或者應該講，洗錢冇乜節制嘅人一廂情願嘅想法。

實情係：相當多人都係精打細算，錢，即使來得易，「搵得到」，都要應使則使，喺提升生活水平及享受之餘，都要條數計得靚，想剩多啲。

否則，財來財去，到頭來都係冇錢剩。

你睇Lexus喺香港嘅車價表，GS只有兩款，一為GS 200t，另一為149萬元嘅GS F，唔見晒以前啲咩GS 300，咩GS 450h。

你話我衰又好，唔識貨又好，我唔太buy凌志喺GS加Hybrid，以前係咁諗，而家係咁諗，將來，我都係咁諗。

講到尾，我覺得GS應該走跑味濃少少嘅中型房車路線，我亦好懷念Aristo配3公升直6 Twin Turbo嘅日子，今時今日仲講呢啲，好似有啲戇居，但Supra即將回朝，冇人寫包單凌志唔會翻炒舊橋。

過去一年，凌志先後喺NX、IS及RX車系，陸續應用編號8AR-FTS嘅2公升直四Turbo引擎，而家輪到GS。記得第一次喺NX接觸呢款引擎，之後係IS同RX，再到今次嘅GS。

雖然係同一款引擎，但感覺到喺引擎同波箱調校嘅契合程度，不斷有改良，尤其喺早前試過嘅RX同今次嘅GS。

呢款引擎最大馬力245匹，峰值扭力35.7kgm/1650至4000rpm，輸出數字上算幾理想，拼埋其他對手一睇，「交足功課」。

但今次測試嘅F Sport版，採用（前）235/40 R19及（後）265/35 R19 Dunlop SP Sport Maxx輪胎，著實喺起步加速嘅一剎及溜車狀態下，消耗咗唔少動力，總覺得部車「唔多去」，轉去Sport S先重拾少少勁度，我由沙田沿吐露港公路、新界環迴公路往元朗，沿途都要Keep住Sport S，先能夠有「輕鬆啲啲」嘅加速感，更遑論要Sport，要有跑味。

睇睇馬力大232匹，峰值扭力大17.3kgm，最大馬力達477匹嘅GS F，後胎都不過係配275/35 R19車胎。咁嘅對照，即使未試車，一望已覺得GS 200t嘅配搭著實誇張過態，如果你對輪胎配搭有點認識，當你試完車之後，好大機會都會同我有相近感受。

我到過凌志日本網頁瀏覽過，發現當哋嘅GS，除咗F Sport版所配嘅上述規格輪胎，亦可以配（前、後）235/45 R18，更有（前、後）225/50 R17。我唔知凌志係唔係覺得GS而家有得配Turbo引擎，就當GS係跑車咁看待，有咁闊就配咁闊嘅車胎，唔知佢哋係唔係認為咁就係有跑味，易吸客。

如果真係咁，不單白費8AR-FTS引擎團隊嘅心血，更將35.7kgm峰值扭力輕率咁耗費喺尺碼過大嘅輪胎之上。好傻！真係好傻！我會毫無疑問同你講，真係冇需要揀F Sport版（$539,000），有心買，花多少少時間試標準版GS 200t（$449,050）。雖然，F Sport版套Mark Levinson音響幾靚聲。

值得欣慰嘅係，今代GS懸掛寬容度高咗，就算配19吋35或40厚度嘅輪胎，乘坐感尚算令人滿意，上一代一定做唔到。

喺元朗及錦田一帶雙線舊路行車，路面早被重型車輛行到「起晒坑」兼凹凹凸凸，但GS嘅早段緩震表現仍佳，懸掛駛經落差大嘅起伏位，自身嘅噪音未有大幅度傳入車廂，多少證明到凌志喺「滅聲」及「捉聲」仍好有堅持。

四十零到五十萬呢個價位，選擇多的是，你問我點解要揀GS呢？恕我老土，都係嗰句：「日本高級行政房車，唔知點解硬係有種魔力，當你入到車廂，零舍舒服啲、Warm啲、靜啲。」講真，GS嘅中控台嘅設計唔算有驚天動地，又或者好破革好有線條美，真係唔多覺。

試坐晒「四隻角」，就係好舒服，真皮座椅好滑溜，手工好靚，軟熟得嚟又夠挺，如果停車「煲冷氣」係唔會中一氧化碳毒而死嘅話，我諗，我可以喺GS瞓大半日。

Lexus GS 200t F Sport規格

售價：$539,000（GS 200t $449,050）

代理：Crown Motors www.crown-motors.com

車型：四門五座

體積：（長）4880mm x （闊 ）1840mm x （高）1455mm

軸距：2855mm

引擎：1998c.c. 直列4汽缸渦輪增壓，前置引擎

馬力：245匹/5800rpm

扭力：35.7kgm/1650-4000rpm

波箱：8前速自動，後輪驅動

懸掛：（前）雙搖臂；（後）多連桿

制動：（前）透氣碟；（後 ）透氣碟

車重：1665kg-1745kg

耗油：8.3L/100km

輪胎：Dunlop SP Sport Maxx 050 235/40 R19（前）265/35 R19（後）