Photos & Video: Chester Ng

幻想同現實，永遠都有好大差距。

Form 1仔年代，喺窩打老道環球模型附近見到日產Skyline GT-R（R32）經過，已high到幾乎嗌破喉嚨，就好似二十世紀初黑白紀錄片裏的人群，見到飛機經過，就興奮到拍晒手，跳高再瞓喺草地咁。

大個咗，有車牌，由車迷變做喺汽車雜誌工作嘅車迷，識到好多慷慨嘅汽車收藏家，有機會揸過咁多款九十年代日本高性能跑車，日產Skyline GT-R、本田NSX、豐田Supra、日產Fairlady Z(Z32)、三菱GTO/3000 GT、富士SVX、仲有萬事得RX-7(FD3S)。

最後發現，最鍾意嘅，只有本田NSX同萬事得RX-7。

幻想，梗係覺得將Twin Turbo塞落大c.c.直六引擎實冇衰，畀多副四驅佢，仲唔正到死？長谷見昌弘都係揸GT-R贏東望洋冠軍啦！

現實，發覺自己最like軚感豐富、車身動態平衡、輕身嘅跑車，仲有喺轉數上得快，質感滑溜嘅引擎。

有冇四驅，已不再重要，喺街揸車，係想散心，想relax。過彎，真係唔使好似行路軌咁grip，多少少動態，要你多啲運用軚盤、油門、駕駛技巧同入彎前嘅部署，咁樣仲好玩。要爭分奪秒，梗係揸新車，唔會粗勞到呢批90年代日本車壇經典。

我喺《車主》、《人車誌》（Car and Driver）、《壹週刊》工作時，不止一次提過我好鍾意轉子引擎（Rotary Engine）。轉子引擎喺好多人眼中係大食、熱、低扭差，講優點，可能只不過係「順啲囉」，新一代嘅車迷更可能話：「Chiu，我揸架Tesla Model S出嚟，要幾順有幾順啦，仲好靜添！」係喎，Model S又真係好快好靜好定，所以，我結婚都搵老友部Model S做花車。

第三代RX-7（下簡稱FD）喺八十年代中晚期設計，1991年底公布，翌年發售，已經係四份一世紀前嘅產品，但FD嘅外形，冇過時，線條好柔滑、誘人，就似宮澤理惠的body（詳情參看《Santa Fe》寫真集）。嗰期FD同929/Sentia，都係靚到暈嘅萬事得。當時有香港車評人以轉拍電影初期嘅朱茵嚟形容FD，話兩者都係小巧、精緻、性感，我忘記咗呢位前輩係邊個，記得嘅話，真係想Whatsapp多謝佢，實在形容得好。

今次得到一位MenClub讀者力撐，借出佢嘅94年FD畀我哋試揸，車主阿Sam喺紐西蘭讀書嗰陣揸MX-6，佢話：「嗰時已好鍾意FD，但FD太貴嘞，屋企唔會買咁貴嘅車畀你。」印象中，香港當年嘅行貨FD售價為68萬，合誠行貨GT-R（R32）呢？72萬。嗰個年代，消費得起，又like日本跑車嘅男人，十個有六個都揀GT-R，三個揀NSX，剩番可能買Supra，甚至慧眼識新星，已經開始玩三菱Lancer Evolution或Impreza WRX。萬事得FD？「真係唔識欣賞」。

坐上阿Sam呢部車，感覺好似返到1994

咁多年後，阿Sam心血來潮，年幾前突然喺日本bid場見到部啱心水嘅，佢話想搵部高分啲，狀態好啲嘅，唔想ship到番香港慢慢執，所以唔介意年份舊啲或要畀多少少錢。咁啱，嗰期有啲質素、價錢算合理嘅前期型中古盤。車番到香港，交畀車房輕輕微調吓setting就出牌，由於原裝嘅排氣喉有破損，阿Sam索性換咗條算係靜嘅Knight Sports喉，佢話：「最緊要老婆冇話嘈，另外，我怕改裝要加錶，咁樣中控台會唔靚！」

最初見到阿Sam嘅FD，以為佢專登拆走尾翼，問清楚先知，呢部車屬於前期型日版嘅入門級別，全車只有兩個位，後面嘅dog seat變成雜物箱，不設擾流尾翼。我自己就好like冇尾翼嘅FD同豐田Supra，有另一種美態同味道（睇番兩款車嘅設計手稿，你會認同冇尾翼好有concept car feel）。

見到阿Sam真人同佢部戰馬，學吓唔少車民問RX車主嘅第一句話先：「幾蚊一公里？」「$2.2」喂！唔好老作喎！不過，車主講得我地梗係信，況且，部份原裝算精神嘅RX-8，都係$1.8/1.9一公里，咁嘅耗油數字唔算誇。

轉子引擎，先天結構令工作運度較高，配埋Twin Turbo，熱上加熱，

結構亦相對複雜，actuator要適時更換，有車主索性換上「單Turbo」，煩少樣。

但有用家認為，咁就失咗13B-REW機器嘅特色

車主仍採用原裝軨，喺225/50 R16輪胎、萬事得吸震筒及彈簧之下，緩震表現好好，

亦因此車狀態極佳，跳上去好似揸緊新車

喺西九龍、青衣、北大嶼山高速公路一帶嘅幹道揸過，成部車好新淨，開閂門都好紮實，懸掛活動時近乎冇雜聲（ 日本嘅前任車主只更換萬事得原裝避震機），發揮到懸掛應有伸縮行程同韌挺度，揸咗一陣，已經好似跳咗上部新車咁。波棍閘嘅1、2、3、4波位置好清晰，行程緊緻，再加上FD嘅座椅hip point相對同期嘅跑車低，夾埋低矮視點同緊湊（高大嘅巴打可能會嫌窄）佈局嘅駕駛艙，氣氛一流。

FD嘅1.3公升雙轉子Twin Turbo引擎，喺香港嘅出牌制度下，需繳付2.6公升嘅牌費（少量轉子引擎型號或因運輸署與車行/私人車主往來文件有誤，只以1308c.c.汽車登記），最大馬力為255匹，峰值扭力30kgm，在馬力輸出數字至上的那些年，日本車廠旗艦跑車，「應份」有280匹，FD少25匹，難免被車迷睇低一線，不過，FD車輕，平均介乎1250kg至1320kg，比GT-R、Supra、NSX都輕，睇番當年嘅《Best Motoring》嘅0至400m加速或築波賽道Battle（睇吓好，唔好太認真），FD間中可以向幾位280匹大哥偷襲。

阿Sam呢部FD，引擎極之精神，低轉怠速好穩定，Turbo Lag係有嘅，但唔明顯，由3000rpm至5000rpm呢段，中段嘅加速力幾厚，當然冇Supra或GT-R嗰種如「兜錘窩面」嘅狠勁同震撼力，FD有嘅，係好似不費吹灰之力咁，一推就將你「射」上110km/h，就好似喺泳池滑水梯坐住水泡衝落去咁，好似冇阻力咁，感覺超正，NSX嘅V6出名滑，都畀唔到呢種感覺，真係好想再篤深啲油門，可惜中鏡好似隱約見到有啲紅光藍光閃閃吓，都係算，見好要收！

近年試過嘅經典車/舊車之中，有幾部係揸過之後好有衝動想買嚟玩，有第一代Cayman、Clio RS 2.0同今次嘅萬事得FD棍波。

Mazda RX-7（FD3S）1994 規格

車型：三門兩座/2+2四座

體積：（長）4285mm x （闊 ）1760mm x （高）1230mm

軸距：2425mm

跨距：（前）1460mm（後）1460mm

車底離地距：115mm

引擎：1308c.c. 13B-REW型雙轉子雙渦輪增壓，前置引擎

轉子容積：654c.c. x 2

壓縮比：9.0:1

燃油供應：電子燃油噴注

最大馬力：255匹/6500rpm

峰值扭力：30.0kgm/5000rpm

波箱：5前速手動（有4前速自動波），後輪驅動

懸掛：（前）雙搖臂；（後）雙搖臂

制動：（前）透氣碟；（後）透氣碟

車重：1250kg（5前速手波）

極速：252km/h（出口版）

0至100km/h加速：約5.2秒