Photos: Yip Wai Bun

早前，萬事得代理打畀MenClub，話希望我哋拎部Mazda3 2.0去揸幾日，畀啲意見。

Mazda3車系誕生（唔再以323命名以來）超過10年，一路都係好車。

所謂好車，唔係話得我哋講，歷年香港賣咗咁多，你總會識到有人曾經擁有或揸過，我聽到嘅都係讚嘅多，彈嘅少。記憶所及，未有發生「call齊記者喺showroom門口扑爛部車」嘅「自毀事件」。

不過，呢個年代，唔係話好車就可以大賣，而係要超好，超超好，甚至係超超超超好車，先有機會大賣，係先有機會，唔係「老馮」、「贏硬」、「食硬」。

近似Mazda3 2.0定位嘅掀背車，好多，真係好多，德國嘅、日本嘅、有啲嚟自英國、法國、意大利。

「一介草民」，鬼知你邊部好定唔好，買得廿零萬，真係唔介意畀多三幾萬，買部更豪更高級「光環」更刺眼嘅。講到尾，定位、定價都好重要，脫離現實，懶得再望多眼。

Mazda3 2.0 Core Edition，賣$215,500，MenClub認為尚算合理。

遇到上一代Mazda3，唔使講，梗係今代靚仔啲

揸住部Mazda3 2.0四日，兜過港、九、新界多個地區，總共行咗389.3km。

載過屋企人，又約過朋友半夜揸上「大山」吹吓車經，佢哋嘅comment，冇咩特別，但值得留意係有幾個都話：「部車幾靚」，而呢幾個人，唔係九唔搭八，見人讚人，見鬼讚鬼，「嗰頭有食嗰頭親」之徒，所以，有一定參考價值。

呢期萬事得話用咗咩「魂動」（Kodo）設計手法，我話之你畀個再好聽嘅名佢，靚就係靚，唔靚，就係唔靚。

難得黃金海岸停車場有錶位，點知坐唔夠20分鐘就落大雨，激氣！

Mazda3 2.0，配一副2公升直四自然吸氣引擎，2000c.c.，唔少人會抗拒，覺得c.c.大，要畀貴一級牌費，我都係咁諗。

又有網民不留情面，青筋暴現咁話：「福士、寶馬都係配1.4公升或1.6公升直四機器，匹數大過你，扭力大過你，又有Turbo。」，我都認同。

但我亦認為，自然吸氣引擎結構相對簡單，較易維修，touch wood四、五年後引擎唔舒服，就算唔番代理check車，揸畀普通車房都搞得掂，檢查項目同更換零件數量都少啲。

呢啲婆媽理論，喺買新車嗰刻，冇幾多人聽得入耳，但到部車舊咗，冇病冇痛，唔使你煩，心裏就自然識得話：「托賴！托賴！」

今時今日，你同人講，2000c.c.自然吸氣引擎係可以慳油嘅，約$1公里，分分鐘畀人unfriend。

「算囉！unfriend囉！」

為咗想引擎更慳油，調校取向「面面俱圓」，但鮮明個性就欠奉

你可能會問：「2000c.c.會唔會好嘥油？」，講真，代理打畀我嗰一刻，我真係唔多想試，2000c.c.點會唔大食啊？

但代理公關大員當時嘅態度好誠懇，話最新一代嘅Skyactiv引擎技術好慳油，心諗：「好，即管試一次！」

話明「用車」，當然按照我一貫喺香港揸車嘅風格同習慣，總計今次接近400公里嘅路程，平均每公升油可以行到12.0公里至15.5公里，無論你用普通汽油或特級汽油，平均約為$0.9至$1.2一公里（未計算汽油折扣優惠）。印象所及，呢副Skyactiv引擎，極可能係我近五年試過最慳油嘅一副2公升自然吸氣引擎。

i-stop停車熄匙功能啟動之後，由風機送出嚟嘅風仍算涼快，唔會令你心思思想熄咗i-stop

呢副引擎有冇好明顯嘅缺點？

有，缺點就係佢嘅優點，萬事得刻意tune到引擎低轉幾好力、中段都算「肯上」，高轉早段仲「爆得吓」，而且低震盪，算係靜，咁嘅setting，擺到明想面面俱圓，但好好先生，邊會有個性。所以，真係有多少浪費咗佢都算係瀟灑嘅外形，算啦！邊可能慳到油，又有激情吖。

紅色縫線討好，6前速自動波箱再無以前「二、三波略嫌長氣」嘅缺點

原裝有兩個USB插口，唔使爭。除非你兩口子加埋有四部手機，四部都「乾塘」

接駁iPhone 6，操作介面簡單好用，選歌快捷，但顯示唔到Cover Art，掃興！

今代Mazda3其中一樣賣點，係車廂靚咗，用料同裝造手功都好咗。

所謂「靚咗好咗」，講嗰個自知冇說服力，聽嗰個未必有心機去聽，因為，靚同好，係好抽象。心情靚嗰陣望就乜都靚，畀老闆照完肺，全身虛脫，對住拳頭咁大個Recaro字章，都未必有feel。摸吓中控台同車廂內門板位置，有唔少韌中帶軟嘅物料，有皮質觸感，摸落幾滑溜。前後皮椅、波棍套、手掣套、門板都有紅色縫線，sporty而唔誇張過火。

揀掀背車，都係貪佢夠裝得嘢多。

筆者即將遷入新居，知道最近永安嘅德國製鋁梯大減價，由$1070減到$690，所以趁有咁大部車，大條道理（勁大條嗰種）「公器私用」，揸車去中環永安，買梯買家品。

最後揀咗一把六級高嘅鋁梯，成把梯unpack狀態下約1.95米高，我預先度過由手套箱至行李艙末端位置，約有2.2米，換言之，夠放有餘。不過，要先放平左方嘅前後座，女友坐到左方後排座椅。女友話：「都係Hatchback好！」我冇正面答佢：「我話日本有Mazda6 Wagon，又有柴油版同棍波版，仲正啦，但香港呢世都使旨意有行貨㗎嘞！除非......」

又一次體會歐洲人點解咁鍾意掀背車

我買咁多Tempo桃味紙巾，呢張相大把位畀你哋「喪入」啦！Mazda3 2.0車尾行李空間為314公升。

各大車廠成日話自己部車用咗乜乜哲學設計，呢啲講解簡直嘥氣嘥時間。

最緊要實物夠靚，如果你覺得Mazda3靚就夠，唔使理佢乜乜哲學，乜乜設計語言。

Mazda3 2.0規格

售價：$215,500（Core Edition）$245,500（R-Grade Edition）

進口商：Vang Iek Motors(HK) www.mazda.com.hk

車型：五門五座

體積：（長）4460mm x （闊 ）1795mm x （高）1465mm

軸距：2700mm

引擎形式：1998c.c. 直列4汽缸，缸內直噴，前置引擎

口徑 x 衝程：83.5mm x 91.2mm

壓縮比：14.0:1

馬力：165匹/6000rpm

扭力：21.4kgm/4000rpm

波箱：6前速自動，前輪驅動

懸掛：（前）麥花臣支柱；（後）多連桿

制動：（前）透氣碟；（後 ）實心碟

車重：1385-1434kg

油缸容積：51公升

耗油：17km/L（公路巿區混合測計模式） 

輪胎：Dunlop SP Sport Maxx 215/45 R18（前、後）