Infiniti QX80係好貴嘅車，賣1,389,000。「唓！球鬆啲，有幾貴？」

對日產、Infiniti陣營，接近140萬嘅新車，肯定係貴。

Infiniti QX80，400匹，5.6公升V8，長5.3米、闊2米、高1.9米，軸距都3米，咁嘅specs，喺香港絕對係「天外來客」，唯一有機會畀佢舒舒服服喺公路鬆吓筋骨，肯肯定係強國神州。據了解，QX80嚟咗香港冇幾耐，已經賣出超過10部，以咁大銀碼嘅日本豪華SUV，成績算幾好。

點解代理要入呢類車？咁不如問，有無理由代理點解唔入呢類車好過。經過十多年Alphard/Vellfire/Elgrand式洗禮，走中港，不論自駕或公司用，好多人都揀「豪華Van」。不過，喺強國揸車或多或少要用另一種思維，其中一樣好快學到嘅就係，「大家鬥搶，你搶我搶」，搶位嘅嘢，都係講身位，鬥大隻。去到呢啲位，都係高身硬淨大車著數啲，除非你諗住螳臂擋車。OK！所以，QX呢啲畀你坐到7個，達到豪華房車級數嘅闊落SUV，始終有佢魅力。

恕我偏私，如果豐田本港代理有LX 570，又或者引入日版Land Cruiser，真係未必輪到QX80發威，講到尾，凌志同豐田，始終有佢哋嘅品牌光環。但事實係，香港要買呢類行貨日本大型豪華SUV，就係要揀QX80，別無他選。你可能話：「喂！我喺強國出一部LX左軚版，再搞個香港牌，得嘞啩！」咁無話唔得嘅，但迂迴啲，唔係個個有你咁好人脈同心機囉。

QX80離地距有230mm，又配搭275/50 R22嘅22吋胎，擺喺度唔郁已高高在上，霸氣滿瀉。不過，車係用嚟揸嘅，唔係靠個樣，入大陸，走長途，最好就有套多功能四驅系統，QX80有齊自動、4H、4L、可變四驅模式（鋪裝路／沙地／雪地／碎石路）同Hill Descent自動下坡功能。我哋今次冇去「擒」山，只係喺抓著力低嘅濕滑草地路段快揸過，唔錯！

我哋話QX80係豪華SUV，理據算唔算好強好豐富呢。其實，又唔算好豪好勁，不過，有齊Bose 5.1環迴音響系統，中排有兩組LCD螢幕連DVD播放系統（講真，應該有Blu-ray啦！）連無線耳筒，三區冷氣，前、中排都有「暖櫈」（喺大陸，冬天一定要有，哪怕你只係揸車喺珠三角活動），仲有咩豪華設備呢？天窗、10氣袋、等等，差唔多數晒。

預咗你話5600c.c.大咬。傻豬嚟嘅，呢類車，唔係一般消費能力嘅人會買，需知道，目前香港同大陸，有好多界別嘅汽車用家，係有合法渠道，以特惠價或超平價入到平油，這些機會，當然不是屬於你的。睇番廠方數字，算幾老實，公路巿區測計模式，每14.5公升汽油可行100公里，至平都$2，塞吓車或大腳畀油揸快啲，3、4蚊一公里係好合理嘅推想。

引擎最大馬力400匹，喺今次試車，我又唔多覺喎。反而，低轉扭力就好突出，真正有大c.c. V8自然吸氣嗰種氣吞天下嘅逼力，要用到佢57.1kgm嘅峰值扭力唔難，因為引擎幾滑溜，好快已衝到上4000rpm嘅峰值扭力爆發點。7前速自動波箱以順為主，轉波唔算快。SUV轉波咁快做乜先！