Photos: Yip Wai Bun

目前，「三十中」至「四十中」嘅房車/掀背車巿場，選擇真係多到死。所以，如果有人同你講，「呢個價位，揀ES 250啦！係得佢㗎嘞，冇錯㗎嘞！」你即管可以當佢傻，當佢透明，當佢癲。

我冇打算逐一為你來一場虛擬比併，將ES 250同其他相近尺碼或同級對手，逐一放上天秤鬥個高低，因為太複雜，太痛苦，張啲catalog左比右對，又同自己講A呢部歐洲車呢，其實比B呢部日本車高級咗一個半個grade，咁樣對照，其實好傻。

買車，尤其係買呢啲日本品牌嘅舒服豪華房車，最緊要去坐吓，feel吓佢嘅乘坐舒適性，其次先至試揸，了解佢嘅駕駛感受，除非你係有獨特嘅口味，例如你硬係要揀房車，但後座係十年唔逢一閏有人坐。

ES 250嘅賣點，其實好簡單，唔使準備一大疊所謂凌志製車哲學文章，亦無需搵古典音樂襯底，更加唔使瞇起對眼嘟起個嘴，用最深情嘅手法去介紹。一句到尾，就係一部座椅軟熟舒服、隔音質素極高、操作好順手輕鬆、冇Hybrid，引擎設計簡單到不能再簡單嘅日本中型豪華房車。

車價$399,980，同級對手真的多到攞命，不過，當你翻開ES喺香港嘅歷史，咁多年來，ES都係呢個價位嘅擂台躉，冇乜點加價或減價，好硬淨。MenClub睇中試揸佢，而唔係試揸ES 300h，就係鍾意佢配副簡單不過嘅2.5公升直四自然吸氣引擎，好現實，中型房車唔係跑車，冇咩驚世駭俗嘅特色機械，亦冇勾人魂魄，靚到飛起嘅外形設計，用得三五年就身痕想換車。

所以，引擎設計愈簡單愈好，幾年後完咗代理嘅保用期，唔打算再咁大投資番代理做保養，拎出街畀車房阿陳搞都搞得掂，幾好！自用固然開心，可以放心泊吓冇蓋車位，放售亦無需喺甩手前整一大筆落去。

「冇Hybrid冇直噴turbo引擎，邊度慳油㗎？」睇過！廠方數字話12.4km/L，我假設現實用車情況同測試數字有一定差距，再假你腳腳攞命，臨到燈位前嗰一小段直路都唔放過，當你每公里$1.5至$1.7好未？ES 250有Sport、Normal同Eco三個模式，我用Eco喺公路巡航咗20分鐘，力係柔咗啲，但內勁足夠（尤其低扭），懶洋洋，由深井「掂吓掂吓」油門就出到海運大廈，好舒服。

呢副引擎最大馬力183匹/6000rpm，峰值扭力24.0kgm/4100rpm，搭一個六前速自動波箱，無咩高科技噱頭，但凌志幾有心機調校頭段扭力輸出反應，喺長命斜靜止起步同加速，一、二、三波轉波timing同引擎動力上升嘅節奏幾配合。當然，你要將佢同時下德國嘅1.8公升Turbo或2公升Turbo引擎同級比較，ES 250確實少咗份「彈射而出」嘅加速感。不過，「彈射」真係咁重要咩？

講番車廂，中控台好有GS車廂味道，用師奶心態諗：「平接近一半價錢歎到高級版嘅裝潢，好喎！正啊！」之後係凌志嘅表演時間，中控台滑鼠好就手，前座冷氣座椅，屁股仔涼爽到成個人精神晒，nanoe空氣清新裝置唔怕有人「食滯唔認兼唔出聲」，後擋風玻璃電動簾，一切都係招呼周到。

後座梳化好舒服，坐墊好厚好闊，腳位又出奇地充足，車頂仲有個畀後排乘客嘅獨立天窗，面積唔算好大，但畀到人別有洞天嘅有趣感覺，亦感覺到設計師係在乎後座乘客嘅感受，呢啲就係日式待客嘅體貼周到。別無分店，只有凌志一家（你話我讚到過火，搵劍兜心口插我，我都要咁講！）