Photos: Yip Wai Bun

香港人買MPV，好多都先揀日本產品，呢樣冇得解，大家慣咗，感覺上係日本嘢親切啲，好似可以信賴多啲。

不過，冇產品可以永遠有慣性收視，因為每個陣營嘅產品總有死穴，有缺點，愈係多人用，呢種不滿情緒就累積得愈多，當巿場上出現完全可以「砍」低你嘅對手，你就大鑊喇！客嘅嘢，嚟得快，走亦走得快。

心態嘅嘢，話變就變，任你showroom有幾靚嘅㗎啡同雪糕，甚至有埋「菠蘿油」同推油都係咁話。

大概五、六年前開始，德製MPV（包括車型酷似MPV）開始喺香港冒起。有段時間，都幾多人買福士Touran同後來嘅Touran GT，我有朋友嘅老媽子買咗部做腳車，1.4公升Twin Charger引擎，慳油，算幾好力。我個friend揸開大馬力玩樂車，聽佢講過：「咦！呢啲車邊度得㗎？！」望吓Touran個樣，又真係老誠咗啲啲啲，睇吓同期嘅豐田Wish，Metallic Orange車身，有型到發光。

我喺《壹週刊》工作時，將Touran GT同當時新出嘅行貨Wish做咗個專題，揸落，Touran GT真係正好多，成部車好紮實安穩，我揸得狠啲，每每都踏盡油門，喂！真係可以當係德國掀背車咁玩。雖然行李艙細過Wish，但車架穩固抗扭度高，我覺得呢樣比任何嘢都重要，睇埋Euro NCAP撞擊評級，掂啦。MPV用嚟載老媽子、載老婆、載個女，邊個揩親些少，撞瘀都冇人想，如果你問我（唔係問MenClub），我一定揀歐洲MPV。

去年年尾，MenClub試過225i Active Tourer，車廂好靚，印象幾好，但懸掛出奇地比3系同1系硬，行爛路，彈跳較多，路噪胎噪都幾明顯，番到屋企諗極都唔明點解會咁。

哦！唔明就由得佢唔好再諗，寶馬車廠自然有機制搞好佢。最近Grand C-Max輸港，一路想試，但太忙，一直未有機會。

Grand C-Max喺德國製造，呢個係賣點之一。

坐上車好快咁望望同摸摸座椅，造工算唔錯，座椅採用2+3+2佈局，後座有少少頂腳，但唔過份。買呢類德製中入門級MPV要有心理準備，後座嘅乘客空間，既不是天堂，亦非地獄。中排座椅佈局似曾相識，既可以係兩張獨立座椅，亦可以掀起右邊座位嘅坐墊暗格，翻出張迷你座椅，「加位」之後變成三座位。你好記性的話，一定記得萬事得第二代Premacy／Mazda 5有類似設計。咁嘅安排，優點在於唔用中排中座時，可以騰出一條小通道，方便後排乘客上落。

歐洲嘅MPV（尤其係德國產品），座位編排向來冇日本車咁花巧，Grand C-Max有得「神秘加位」，已經係好出位。佢哋賣嘅，就係座位好牢固，大吉利是講句，有咩側撞尾撞迎頭撞，又或高速行車時有意外，張櫈起到應有保護乘坐者嘅功能，唔會成張彈咗唔知去邊。

Grand C-Max勝在有較高嘅車廂空間，喺載兩人（連司機）情況下，載貨空間高達1867公升。

「媽！點解咁大嘅！」

Grand C-Max採用雙趟門，但雙趟門不設電索（非電動），要手動，香港人聽在耳裏，真的一句「call lau yea」，可怒也。點解㗎？點解雙趟門可以冇電索㗎。個人認為，用手閂門有幾大問題？前門都冇啦，掀背尾門亦都冇。不過，當好多日本對手都有，本地用家及買家都將電動雙趟門看成理所當然，呢樣就自然成為「被針對、被批評」嘅弱點。

其餘功能同設備，算幾齊，例如全景玻璃天窗、8吋touch mon連後泊鏡頭、7座位安全帶警示系統，仲有SYNC 2藍芽聲控中廂溫度、娛樂及通訊系統（我覺得操控介面幾方便，但冇用到聲控，除非電腦識聽廣東話），以24萬有找嘅德國車嚟講，其實好抵好值。

Grand C-Max有一個我認為好大，而大家可能唔在乎嘅優點，就係部車好好揸，懸掛緩震、抗傾同懸掛噪音都好輕微，仲有，引擎同波箱嘅配合程度極佳。

我有一段長時間無留意福特（Ford）新車，我以前好like Foucs嘅懸掛設定，舒服又劈得，但懸掛活動時嘅噪音始終較福士Golf高。今次試Grand C-Max發現，點解懸掛喺高速駛過凹凸起伏位，可以咁靜，食咗乜？當然，不能抹殺Michelin Primacy 3嘅功勞（215/55 R16），發揮到充足嘅早段緩震功效，但喺獅子山隧道公路出名最乞人憎嘅幾個爛位，Grand C-Max都有好到近乎寶馬320d嗰份高級德國行政房車嘅濾震表現，我真係好意外，你想拆我招牌嘅話，不妨去陳列室試玩搞搞震。

215/55 R16尺碼胎軨，外形絕對欠缺跑味。不過，配合Michelin Primacy 3車胎，竟然有上佳嘅早段緩震效果，而且胎噪低，高速駛過密雜起伏位，能與懸掛好好配合，「快速消化」震盪。

前碟後鼓制動配搭，肯肯定畀「睇specs論車」嘅「車民」鬧爆。不過，若你識得分邊啲係靚制動，你去feel吓，制動力好充裕，brake pedal踏感好實在，踏板行程好分明，呢樣係歐製Ford嘅優點之一，廠方一向唔標榜（可能覺得理所當然，應該咁做），香港傳媒亦從來少講。

Grand C-Max懸掛調校幾有趣，佢令你有種幻覺：部車重心好似好低，高速由沙田第一城橫跨城門河嘅天橋直駛御龍山前嘅落斜大右彎，成部車好穩定，完全唔多覺有傾側，但過彎動態又冇繃緊，算鬆容。時間同篇幅有限，亦驚悶親大家，講到呢度算。

Grand C-Max配1.5公升直四Ecoboost Turbo引擎，最大馬力150匹/6000rpm，峰值扭力24.5kgm/1600-4000rpm，配編號6F35嘅六前速自動波箱。以D波喺吐露港公路約95km/h行車，引擎轉速維持在1800rpm，好輕鬆，亦都算幾靜。不過，Kickdown反應唔夠生猛，要爽，一定要拉低一格去S（好多讀者、以至部份亞洲區汽車編輯，都冇留意或冇善用自動波箱嘅S波，就批評引擎同波箱反應慢，希望大家留意）。

引擎無刻意賣弄個別段落嘅衝刺表現或平順性，相反，係好有心去經營，要令段段都有易用嘅動力帶，整體嚟講，低中高嘅運轉幾順滑，我最初以為佢中高轉會變「軟腳蟹」，點知仲都幾肯上，5500rpm之後嘅震盪唔明顯。

香港人對二十萬頭嘅歐洲掀背車，接受能力高咗好多，但對於同價位嘅歐洲MPV，反應依然唔算強烈。早年嘅福士Touran/Touran GT，以至近期嘅Grand C-Max，都係整體好高質素嘅MPV。如你自問看重MPV喺意外時嘅抵禦能力，我推介你先試歐洲車款。

Ford Grand C-Max規格

售價：$239,900

進口商：Future Motors www.hkford.com

車型：五門七座

體積：（長）4519mm x （闊 ）1828mm x （高）1662mm

軸距：2788mm

跨距：（前）1543mm（後）1554mm

引擎形式：1498c.c. 直列4汽缸，缸內直噴，前置引擎

口徑 x 衝程：79.2mm x 76.4mm

壓縮比：10.0:1

馬力：150匹/6000rpm

扭力：24.5kgm/1600-4000rpm

波箱：6前速自動，前輪驅動

懸掛：（前）麥花臣支柱；（後）多連桿

制動：（前）300mm x 25mm 實心碟；（後 ）280mm x 11mm 鼓

車重：1507kg

0至100km/h：10.2秒

極速：199km/h

最小迴轉半徑：5.6米

油缸容積：60公升

耗油：6.8L/100km（公路巿區混合測計模式） 

輪胎：Michelin Primacy 3 215/55 R16（前、後）