幾年前，有機會喺香港揸過電動版MINI E，嗰次由MINI荃灣陳列室揸到大嶼山石璧水塘，再折返起點，好難忘，難忘唔係話部車好好，始終電池重，佔用空間又大，成部車只可坐兩人，當時嘅MINI E係一部「Lab味」好重嘅車，距離巿販仍有一段距離。

所講嘅難忘係MINI有心機試唔同形式嘅powertrain，我唔介意擁有MINI品牌嘅寶馬集團，係真心探索未來MINI動力系統嘅可行性，抑或趁埋個墟，人搞電動車，佢又「做樣」搞埋一份。總之，有搞到就係好。講真，如果寶馬當年冇買路華（Rover），MINI可能而家仲喺啲中游歐洲車廠手上，如果真係咁，我唔會旨望佢哋有咩驚喜，可能只會間中同Paul Smith、又或者Mary Quant、甚至「咸爺」或「碧咸嫂」出啲乜乜特別版，分分鐘仲係配啲120匹唔夠，15/16kgm嘅1.6公升直四自然吸氣引擎。

現實係，MINI搵到個好老闆，NEW MINI（指2000年以來）嘅衍生型號，唔可以話部部精品，少部份其實定位模糊，幾騎呢，例如Paceman，但冇緊要，寶馬自有佢嘅健全機制，亂咁嚟，niche到爆嘅型號，自然會被「整肅」。

MenClub近月試過兩款新世代柴油私家車，好Like，分別係寶馬320d同Mazda6 2.2 Clean Diesel。讚完冇幾耐，MINI竟然話引入柴油版，而且係柴油版中最頂級嘅Cooper SD。

唔熟悉歐洲Turbo Hatch嘅你，可能覺得好地地有部高性能掀背車，搞乜spring放副柴油引擎落去。實情係，大名鼎鼎嘅福士Golf GTI，都有個柴油版兄弟Golf GTD（見下圖）；而福特Focus ST亦有ST Diesel版。再話埋你知，型男轎跑車奧迪TT都有TDI柴油引擎版，你係唔係應該諗諗收番剛才嗰個「搞乜spring」？

我相信MenClub有少部份讀者都會話：「買得呢啲有型有款嘅車，都唔差在油錢」，又或者話：「型要有代價㗎，嫌油貴就唔好學人扮型！」。幾年前，我喺法蘭克福車展同過MINI嘅公關大員討論過柴油MINI嘅存在價值，佢嘅答覆好簡單：「我哋（MINI）可以克服柴油引擎技術嘅障礙。」佢話，歐洲有好多用家，鍾意MINI嘅外型，又想經常揸部車去好遠地方（例如歐洲區內嘅跨國長途旅行），所以MINI用咗好多資源去搞好柴油引擎版本。

公關好話講夠。有幾好？

我諗大家先要有心理準備，如果你認為Cooper SD，就等同慳油版Cooper S，engine反應同電油版Cooper S一模一樣，咁你一定會好失望（講真，如果上述嘅理解係啱嘅話，咁仲洗乜要電油版Cooper S？）。

在我角度，Cooper SD，其實無需要加個Cooper喺前面，因為喺John Cooper嘅年代，係唔會有柴油引擎放落「MINI仔」，但事實係，時代唔同咗，要大家容易掌握呢副柴油引擎大概邊種層次同級數，冠以Cooper，係方便啲，等公眾易啲理解。

咁Cooper SD可愛之處喺邊？除咗超低耗油量每4L/100km（廠方測試數字）之外，其餘係無時無刻都十分之大力，輕輕印住油門，轉數喺1000rpm至2000rpm，加速反應已相當爽快，而且同副六前速自動波箱好合拍，仲合拍過同電油版。試過用Green模式，懶洋洋掂住油門行屯門公路，好夠力，由大欖攀上長命斜，遇上「櫃車巴士陣」兼有快線L，焗住坐box，收油，路一通，輕輕印一印油門，內勁一發，不費吹灰之力，上到坡頂。用Sport模式，湧住湧住去，如果畀個8前速波箱佢，加速感可能拍住320d咁正。

Cooper SD配一副2公升直四Turbo柴油引擎，最大馬力170匹/4000rpm，峰值扭力36.7kgm/1500-2750rpm。廠方指0至100km/h加速約7.2秒，坐喺司機位，感覺似大概係六秒尾左右，同6.7秒嘅電油版差不多。好多人都知，柴油引擎出力最旺盛嘅段落唔算闊，一般嚟講，3500rpm以後動力增長已快速放緩，隨之而來嘅係震盪同柴油引擎嘅嘮嘈叫響。Cooper SD冇咁嘅問題，就算我刻意「玩嘢」，將轉數推上4000rpm至4500rpm，傳入車廂同地台嘅震盪唔算大，而喺處理柴油引擎高轉噪音嘅功夫上，MINI亦做得好好，好似幫引擎冚咗幾張厚棉被。

試車時好濕滑，喺二波大油出彎，會有少少torque steer，但不過係一剎那，冇緊要。雨天揸得狼死，會覺得Cooper SD嘅轉向不足比Cooper S多一點，係幻覺，抑或事實？我相信同柴油引擎比電油引擎重有一定關係，講真，大部份用家唔會理，但我有必要畀大家知。

MINI Cooper SD售$399,800，首批現貨賣$388,800（連全景觀天窗及後波泊車鏡頭）。你睇完車價，結論可能係，喂！呢個價，仲貴過Cooper S喎，係唔係代理見呢期柴油車多人like乘機托高個價？其實呢，歐洲嘅柴油引擎車，車價一向比同款嘅電油版高（你可以上Mini UK比較吓），好大程度上同柴油引擎造價稍高於電油引擎有關。

MenClub嘅結論係，Cooper SD算係好車，但佢定位好niche，要遇到對新世代柴油引擎有深入認識嘅MINI迷先有得發圍。否則，一般人，買部Cooper或Cooper S算鬼數啦，邊得閒理你B嫂定D嫂，再唔係簡簡單單買部MINI One，咪幾好囉，1.2 Turbo，要幾慳有幾慳，車價又平一大截。

咁柴油版MINI喺香港係唔係冇得搞，睇你點搞同入邊款，你話如果入MINI One D、Cooper D，仲要放喺新Clubman，我諗啲標榜慳油嘅日本微型MPV都幾頭痕。

Mini Cooper SD規格

售價：$399,800（首批現貨價$388,800）

代理：Mini HK www.minihk.com

車型：三門四座

體積：（長）3874mm x （闊 ）1727mm x （高）1414mm

軸距：2495mm

引擎：1995c.c. 直列4汽缸Turbo，前置引擎

馬力：170匹/4000rpm

扭力：36.7kgm/1500-2750rpm

波箱：6前速自動，前輪驅動

懸掛：（前）麥花臣支柱；（後）多連桿

制動：（前）透氣碟；（後 ）實心碟

車重：1175kg（德國工業標準）1250kg（歐盟標準）

0至100km/h：7.2秒（六速棍波7.3秒）

極速：225km/h

耗油：4.0L/100km（巿區公路混合測計模式） 

輪胎：Dunlop Sport Maxx 205/45 R17 88Y（前、後）