執筆時是2月10日傍晚7點，友人WhatsApp我，他所屬的部門今日起開始派信，通知員工派幾多bonus或有無bonus，佢話仲未派到佢，心急如焚。

明嘅！年尾或年頭有無能力實踐買新玩具大計，某程度要睇bonus有幾大嚿，未必是實質性的給力，但有的話，心理上始終感覺更好。對公司前景或對自己來年發展都信心大增。

鐘意車或有養車，年尾派bonus，當然乘機換車、整車或幫部車upgrade。近一年驗車排期長，年尾更多人嚷著要賣車，反正驗車整車都一大筆，倒不如趁有bonus買新車，往後6年煩少樣。由今日開始，會同大家介紹幾款不同價位、類型的best buy、抵買或各有特色之選。

主流汽車用家心態，新車最緊要慳油，妄想無極限，唔洗入油識得行就更好，老闆心諗，呢個世界無咗bonus呢樣嘢好好好。現實啲啦，剛進行小轉款的豐田Prius C，在我們實測耗油約為每公里$0.58，車價22萬有找，入場門檻吸引，用油皮費不算高，算吸引！雖則淨睇$0.58及22萬兩個數字而興起購買慾念，實在有少少衝動和欠理性，但普羅大眾用家就是如此，你跟他或她細心闡釋Hybrid怎樣運作，如何達到低耗油和環保，分分鐘白費心機。

Prius C比今代Prius所採用的混合動力系統細約300c.c.，1.5公升牌費，始終有死忠的日本車捧場客，配合電動摩打，最大馬力輸出101匹。這款100多1匹的掀背小車子，自2012年頭已賣到通街都見，今次小轉款，廠方指重點在全新鬼面罩 、泵把連氣壩、LED燈等等。男性買家最關心的操控、動傳組合質素等範疇有冇「升呢」？廠方沒有提到，這亦是豐田處理中入門級型號小轉款的一貫做法，原因可能是，講你怕你唔明，怕你明啲唔明啲，誤以為「我哋」（豐田）無料到。

筆者在2012年初試過Prius C，對那一次試車仍有深刻印象。我當時任職《壹週刊》汽車版，我發現Prius C的隔音認真「麻麻dee」，駛過起伏較密集路段或隧道管道，懸掛工作時的聲響大體很容易經地台及鄰近傳入車廂，隔音表現只屬僅僅合格。今次試的facelift版，隔音明顯有改進，尤其是地台隔音，籠統一點描述，似加咗張毛氈，零碎或短速尖刺的雜音都不見了。事實上，facelift版今次採用了日本製造的石橋ER 80系列輪胎，輪胎在滾動時的自身噪音都不算高，有利抑減整體噪音水平。

另外，facelift後的Prius C轉向輔助力度變得相對厚實，再無「輕飄飄」，很好！開慣中型車轉揸Prius C，相信不會因軚盤扭動感太輕而產生不安。不過，要將Prius C Hybrid系統的動力發揮得暢順，依然要學習和熟練。方法其實只得一個，亦很簡單，就是在踩油門時要漸進，漸進不等於妥協，不等於任人摑，任人爬頭搶位，而是在需要在pickup爬頭時，不應一腳踩到盡，反而要邊踩邊用耳仔或身體感應動力上升的節奏。

我在屯門公路小欖出口上斜往荃灣，那段長命斜，只要對油門柔順點，不難得到穩當而敏捷的加速反應，隨時輕易超速至需要家人到警署「湊放學」的水平。只要穩住3000rpm以內，Prius C的引擎聲浪不算大，不吵耳，3000rpm以上，真是有點嘮嘈。在駛往青龍頭及深井的幾個高速大灣，Prius C的馬步比facelift前穩定，對不起，我沒實際數字或資料指出，豐田是否在底盤做了補強加固，因而提高了剛性，但請你相信一次筆者，這部Prius C的確比前期型硬淨。真係唔明豐田點解無詳細講講佢哋改良咗咁多項？點解咁老實、咁低調？

每公里耗油繼續6毫有找，車架更紮實，隔音有明顯改進，轉向輔助力度更實在，22萬有找，再加豐田品質效應，Prius C其實幾吸引。當然，你可以繼續話佢悶，勸朋友揀Golf 1.4 TSI 122ps或MINI ONE。