2公升級Turbo Hatch的馬力增長速度愈來愈快，短短幾年，已跳升至300匹。福士Golf R，300匹；寶馬M135i，320匹；奧迪RS3，340匹；平治GLA 45 AMG/A 45 AMG/，360匹；福士於今年初發表的概念作－Golf R 400 Concept更達400匹。將400匹Turbo Hatch商品化看似天馬行空，但認真想想，當年200匹Mk 5 Golf GTI夠畀人話：「使唔使搞到咁大馬力啊？配2公升Turbo偈會唔會勁推頭啊？」，十年後的今日，大家都覺得「200匹」和Turbo引擎是最起碼配搭。

好老實，平治A 45 AMG，我尚未在香港見過實物，據悉其曝光率遠不及CLA 45 AMG；CLA 45 AMG呢⋯⋯我知道有車迷好喜歡，但我還是覺得CLS較美，「縮水版CLS」，No thanks。至於GLA 45 AMG，車身腰線以下周身筋肉，有越野RV影子，又是掀背車基礎，配四驅系統，整個產品概念有別於上述的300匹級數熱血Turbo Hatch，簡單一句總結，好特別。

無論遠望、近望，GLA 45 AMG都幾大部，亦幾man。閂埋門你可以同自己講：「今次買咗部幾辣嘅Benz SUV仔」。重量上，GLA 45 AMG較 A 45 AMG多30kg，車重達1585kg。廠方的0至100km/h加速數字為4.8秒（A 45 AMG快0.2秒）。近1.6公噸的360匹汽車，峰值扭力有45.9kgm/2250-5000rpm，加速感及推背感算勁，但未至癲，亦未至於狂。這台直四Turbo引擎調校偏向著重頭段及中段，轉數上升速度不及Golf R般快，但動力發放卻比VAG的出品紮實韌淨。個人認為，AMG刻意在這直四Turbo，混入多少大容積V8引擎的味道，多少不重要，總之就有，揸過C 63 AMG的，去試GLA 45 AMG，一定知我想講乜。

早前試駕GLA 250，曾講過其波箱轉波模式（C、S）的分野未夠大。在GLA 45 AMG之上，這款7前速C、S的轉波反應分別大得多，C模式舒服平順得像W202型的C 200自然吸氣引擎房車（同時自動開啟ECO引擎休止功能），S模式足可以「chok」到喉悶頭暈，我喜歡M模式，索性當棍波車揸，轉波撥片以金屬製造，涼浸浸，運作行程短，與SLS AMG的十分相似。

GLA 45 AMG的桶座幾貼身，Recaro出品，承托和包裏力好足，椅背中上方有鏤空部份，混入鋁合金飾件，靚！唯一不足是座墊較長，而油門及制動踏板所處位置，又與駕駛者腳掌稍近，換言之，間中會有「頂腳」情況，或許筆者骨骼精奇，總是找不到較理想的雙腿及腳掌伸展空間。「平治出品，人體工學點會咁差，係唔係你畸型咋？」老實講，我也希望係我畸型，平治無錯。波棍所處位置有別於其他GLA系列，改放於中槽，造型與SLS AMG頗相近，波檔之間推接行程好短，有跑味，好Like。

輪胎尺碼為235/45 R20，賣相夠霸氣，我曾擔心因此削弱行車早段緩震質素，但GLA有較長的懸掛行程（比GLA高26mm），理論上及實際上（好在！）都有較佳的濾震表現，而這額外的緩震卻未有大幅激化車輛在起伏路面的浮盪感，設定上算找到不俗的平衡點。不過，在進入急彎時難免發現車身傾側程度稍大，想有sharp turn-in的山路表現？Sorry，你揀錯對象。心理上雖稍欠一丁點安穩，但用心、手及回彈感去感受，輪胎的抓地力仍處於高水平。制動力方面充裕，制動力衰減情況不明顯。

GLA 45 AMG賣81萬元，同級車或相近品種中最貴。如果純粹論性能，談不上「好吸引」，但此車的package勝在特別，輕裝越野RV x 五門掀背車 x Turbo Hatch，莫講係香港，車壇擁有類似配搭的著實不多，會否成為未來大趨勢呢？我抱樂觀態度，就算落錯注呢？他仍是一部平治，一部AMG，一部360匹的Turbo高性能汽車，點計，都無得輸。

女仕見到會否望過不停，抑或誤將你當成揸A-Class代步的外籍傭工，我真的不敢亂測。不過，它一定可以令不少男仕「葡萄」，加埋AMG及每公升輸出180匹馬力的「光環」，計落還是值得的。

Mercedes Benz GLA 45 AMG規格

售價：$812,000

代理：仁孚行 http://www.zungfu.com

車型：五門掀背五座

體積：（長）4417mm x （闊 ）1804mm x （高）1494mm

軸距：2699mm

引擎：1991c.c. 直列4汽缸Turbo

馬力：360ps/6000rpm

扭力：45.9kgm/2250-5000rpm

波箱：7前速雙離合器自動附手動轉波功能

懸掛：（前）麥花臣支柱；（後）多連桿

制動：（前）透氣碟；（後 ）透氣碟

車重：1585kg

加速：0至100km/h加速4.8秒

極速：250km/h

耗油：7.5l/100km（廠方測試值）

輪胎：Continental ContiSportContact 5P 235/45 R20