保時捷911在車壇威足半世紀，今時今日仍然是同級車的benchmark，而近期抵港的911 Targa更是將Targa傳統成功活化演進。

不過，對許多誕生在60、70、以至80年代初的男性車迷，始終對兩代分別於80年代末及90年代初推出（就是1989年面世的964型及1993年發表的993型）的911念念不忘。原因？靚囉，真係靚，堅靚，襟靚，總之就係靚。稍對「波子」有多點認識的會話，因為993型是最後一代採用氣冷水平對向六汽缸引擎的911，氣冷引擎正正是車廠創辦人費迪南德．保時捷（Ferdinand Porsche）所堅持的設計，993的停產是911發展史其中一個重要分水嶺。

說了這麼多為993貼金的好話，是時候講講它的售價及維修要點。

2010年，一部狀態中上的993型911 Turbo索價68萬，今日的叫價已約100萬，當然，叫價與成交價有一定落差，但合理的成交價一定不低於90萬。

至於被喻為993上車盤的Carrera 2，Tiptronic（四前速加減自動波）版本的成交價約28至29萬，狀態較佳的約35至37萬。

其實，993已是「廿歲仔」的young classic，多個機械部份需要大修，有部份「廿零萬」易手盤有不少「隱疾」。粗略估計維修費由五、六萬起錶。呢條咁簡單的加數，你一定識計嘅！

坦白講，以今日中、高性能跑車的標準看Tiptronic版本的993，其波箱始終能以發揮引擎的應有性能。不過，它的耐用性卻深得用家好評，筆者訪問過多位「993 Tip」用家，都未聽有嚴重波箱故障。換個角度，如果只想擁有部young classic 911，放假揸出街，欣賞一吓舊日911有幾靚，又唔想辛苦吊極力子，「993 Tip」是理想之選。

假若你非「棍」不愛，就要預多約20萬budget，因為目前6速棍波版993型911，最平都索價近60萬，部份質優的車盤，即使有人出價70萬，賣家仍不為所動。「棍波993」吃香的原因與當年輸港量不多有直接關係，畢竟1993/94年，Tiptronic仍是非常先進又方便的高智能設計，畀得錢的買家都求舒服自在，難怪本港代理於1994年引入為數近10部的6速棍波版Carrera 2，放售兩年仍無人問津，直至代理於1996年加送RS包圍部件，才悉數售清。如果你係當年呢批棍波版買家之一，真要恭喜你。

綜合多位用家情報及熟悉易手911行情的業界人士指，目前本港約有20多部棍波版993 Carrera 2（包括由代理進行及自行輸港形式）。你想透過汽車網站或車行入購，基本上是全無可能，因為大多數交易都是「朋友」或「朋友嘅朋友」之間進行，賣方今朝「放聲氣」，lunch time前已完成買賣。有數位現任棍波993不約而同表示，花了近五至八年，慢慢打入棍波Carrera 2用家圈子才覓得心頭好。

你可能在等到心灰意冷時，靈光一閃，想到英國搵部狀態企理的回港。的確，當地不乏狀態理想的棍波993，筆者有位移居英國多年的老同學，數年前就在當地購入一輛狀態不俗的993，body靚，冇銹蝕。不過，亦有資深保時捷收藏家表示，英國有不少993，車體狀態認真一般，易生銹。而且，當地的售價連到港稅項，實與香港易手盤差不多。舉個例，目前英國放售的993，約為35000英鎊，連計到港後繳納的10數萬數項，已貼近60萬。

唉！尚有其他地方買到棍波版993嗎？不妨試試澳洲，但當地的993車價普遍比英國高10至15%，唯一過人之處是當地氣候乾爽，好些放盤的車體都狀態上佳。

還記得993型GT2嗎？當年新車索價近200萬港元，據悉今天已升至450至500萬港元。如果你當年用200萬元在太古城買樓，今日又會喺咩價？

買到心頭好，總要做保養，講講993維修二、三事。

一如好些氣冷引擎911，993型911也有漏油的通病，主要是引擎殼體的封裝墊片因老化、收縮或變形而致引擎機油滲漏。別以為911漏油一定因為車主「用得粗」，漏油的致命原因有可能因車主用車量太低，「擺多個揸」，令封裝墊片無法得到正常工作時的自我潤滑。一般來說，更換引擎封裝墊片約由$40,000起。睇盤時記得上架驗清楚，留預算作日後維修。

993是90年代初、中期的產品，冷氣制冷力比964型已進一步。不過，時至今日，制冷表現只算中規中矩，有心想搞到涼浸浸，最簡單要添加「雪種」或索性更換俗稱「凍Coil」的蒸發器，凍Coil的零件價約$7000，連計裝拆錶台的人工費用，埋單至少$20,000。有用家提醒新晉993玩家，如在睇盤時發現送風速度時有雜聲，好可能是風機已有損毀，建議你盡快更換。

想部993有好似原裝新車的操控表現，又想深入領略保時捷調校懸掛系統的一流功夫，現任用家建議你每隔50,000至60,000公里，更換懸掛搖臂，這種徹底又昂貴的更換零件方法，有別於只更換杯士。既有助令懸掛系統與車體有最緊緻的配合，也能換來更佳的ride quality，屆時再做wheel alignment，整體操控反應自然更佳。費用約由$20,000起錶。換咗你就知我哋冇老點。

993停產多年，好些零件的專利權經已屆滿，北美有數家專營汽車零件的製造商睇準巿場推出供993使用的副廠零件，據聞售價相宜品質亦佳，例如油隔只需百多港元（包運費）。當然，用平貨定揀原廠零件，你慢慢想清楚。

Porsche 911 Carrera 2規格

車型：雙門四座位
體積：（長）4245mm x （闊 ）1730mm x （高）1300mm
軸距：2270mm
引擎：3600c.c.水平對向6汽缸
口徑與衝程：100mm x 76.4mm
馬力：272ps/6100rpm
扭力：33.6kgm/5000rpm
波箱：4前速自動或6前速手動
懸掛：（前）雙搖臂；（後）多連桿
車重：1370kg

**鳴謝Duke、No Gor、Sakura、嘉權、嘉榮提供部份資料