Photos: Honda Japan

啱啱過去嘅3月29日，係本田（Honda）FD2型Civic Type R誕生10周年，10周年唔算係咩嘢大日子，但都有少部份地區嘅車迷同用家坐埋一齊聚一聚。 

MenClub同你回顧吓「FD2 R」三年多嘅車壇旅程。

代號FD2型嘅Civic Type R喺2007年3月29日喺日本發表，但佢最早喺2006年10月嘅世界一級方程式日本分站，以原型車（Prototype）姿態亮相。喺2008年及2009年嘅9月，FD2 R都先後有facelift同追加小量option，例如將電動門邊鏡列為標準設備、尾燈組換上新設計，追加三款車身顏色，令顏色選擇增至五個。壓軸係增設Super Platinum Metallic顏色同18吋BBS合金輪圈選項。

呢代Civic喺日本銷情平平，加上金融海嘯嘅衝擊，2009年底已傳出Civic房車將於年內停產，廠方最終喺2010年4月宣布，「FD2 R」於該年8月底停產。

車迷普遍對「FD2 R」嘅評價唔錯，K20A 2公升直四自然吸氣引擎，喺大口徑油門、11.7:1壓縮比等新配搭下，最大馬力增至225匹/8000rpm，比DC5 R年代嘅輸出多咗5匹，平均每公升輸出112.5匹。 

峰值扭力增至21.9kgm，但輸出位置已由7000rpm降至6100rpm，從易用性嚟講，係高咗。

但有啲巴打認為佢喺終極表現較飄忽，一旦喺入彎時過咗火，發生大幅度轉向不足，好難以傳統高性能FF車嘅方法「救車」，甚至愈救愈衰，繼而發生大幅度甩尾。亦有意見唔鍾意本田將日版Civic Type R變成「四門房車」，情感上始終覺得三門掀背較好。

不過，睇返近十年多位曾經參與開發FD2 R嘅團隊成員，當中唔少係已經退休嘅，都認同一個點，如果唔係成功將四門車型列作FD2 R車型，Civic Type R喺往後至今日嘅發展一定冇咁順暢。事實上，近年日本、歐洲品牌高性能房車/掀背車製造商都想提高呢類車嘅實用性，一來從保險角度出發，二來亦係增加銷售贏面，畢竟三門或雙門車係冇四門/五門車咁易賣，當然，本田喺過去十多年不斷整合日本本土轎跑同三門車系，亦係原因之一。

恕我婆媽，現有FD2 R嘅車主，錫住部車，呢部好嘢嚟㗎，Honda嘅高性能自然吸氣引擎車嘅文化保育靠晒你哋喇！