Photos & Video: Suzuki Production

去年（2016年）MenClub試揸過Subaru S20X系列嘅S207同S201，出片之後，無論喺facebook同YouTube嘅反應都好熱烈，老土啲都要企出嚟講多次：「多謝大家！！」 

如果以逢係「辣車都嘩嘩聲」或「舊嘢總係好啲嘅」心態去睇呢兩部車，佢哋肯定冇乜缺點，事實當然唔係啦。 

S207多方面都好好，但Impreza愈來愈大部係事實，冇咗已往建基於日系小房車車系嘅高性能房車味道。坦白講，S207個Size十足2003年至2005年左右嘅Legacy，中車咁嘅款，好在揸落仲算幾靈巧。

至於S201，除咗外形誇張咗啲，激咗啲之外，其實可以挑剔嘅嘢唔算多，尤其是佢擁有「最強四門GC8嘅光環」，你自然就會原諒佢嘅缺點。

不過，話分兩頭，GC8引擎雖然有300匹，製作亦算認真（以2000年標準而言），但二、三波喺彎路快劈，總覺得車架應該可以再硬淨多啲，以今日角度睇，車頭同車身中央嘅剛性唔夠高，實時感受到嘅扭擺明顯咗啲。

如果你逼我七部中揀一至兩部，我只會揀S203或S204。首先，我覺得S203/S204車身體積（約4.4米）已差唔多，再大部啲就論盡（例如R205），而且冇咗日系小型高性能房車嗰份小巧而狂野嘅特有風味。

S203喺2004年底發表，據講呢款車喺開發到接近後半階段，當時嘅Subaru WRC車隊主將兼2003年WRC世界冠軍Petter Solberg，多次到日本參與測試及就調校給予意見，尤其喺懸掛、輪胎膠質、座椅呢三方面。總產量555部，點解係呢個數？唔係咁都仲要問呱？

今次試揸嘅S203，由一位海外回流香港發展嘅MenClub讀者借出，車主貌似八十後，話明細細個已經深受Subaru WRC賽車影響，亦一直有留意S20X嘅動態。可惜S20X屬JDM，當年只作日本本土銷售，只有少量海外地區嘅代理或平衡進口商爭取到配額。

車主後來返港工作，本來打算喺香港搵部S203玩玩，後來先知唔係咁易，最終請中介人喺日本搵咗部S203，仲要係低咪（累計行駛約21000km）同狀態唔錯，雖然索價三百幾萬日圓，但好盤難求，貴啲就貴啲啦。

呢部S203同去年試揸嘅S201有啲相近，外貌好新淨，懸掛雜聲好輕微，車架好紮實，坐落去做Blind Test（要你戴埋耳筒），單憑感受乘坐感同體感，你分分鍾以為佢係歐洲房車。

S203採用比Impreza WRX STI短15mm嘅彈簧，也較硬，從今次試車發現，其實唔算「死實實」嗰種硬，無時無刻都顯示到懸掛有點點的柔韌，冇過火，而且同避震機幾夾，呢套避震機有四段調校，來自同期嘅Spec C RA，我揸過相近年份嘅小改（原裝彈簧同避震機）Spec C RA，喺街揸，Spec C RA真係冇S203咁貼伏。

或者咁講，我覺得當時嘅Impreza WRX STI，總係車尾未夠安穩，跑山路轆到駁口位或渠蓋，彈跳多啲，唔能夠好快安定落嚟，而且Turn-in唔算係好sharp（即使與同期嘅Lancer Evolution對比），轉向不足情況亦較明顯。原裝Lancer Evolution VII、VIII同S203冇呢方面問題。

你試想像，車尾唔夠「伏」、車身中、後半部滾動較大，轉向不足情況明顯……當然呢啲都係相對而言啦……咁嘅特性，唔會話係好好揸，所以當年S203交車初期，真係好多用家同傳媒大讚。 

我未揸過S202，只係睇過部份日本同澳洲行家嘅試車報告，話S202嘅引擎（320匹，39.2kgm），偏重中段至中尾段輸出，同「大眼仔」時期嘅Spec C RA一樣咁鬼激。我唔肯定香港有冇S202水貨嚟過，佢嘅橙黃色車身幾吸引，係我杯茶，你問我「1」「2」「3」「4」「5」「6」「7」最想擁有邊部，可能係S202。

S203嘅EJ20引擎，整體運轉質感係比Impreza WRX STI暢順好多，尤其係低轉同6500rpm至8000rpm前呢兩段，唔知係唔係同曲軸以人手balancing過有關，中段仲有少少「煲水聲」，幾過癮。呢副引擎配較大口徑嘅IHI渦輪增壓器，葉片形狀同葉片數目，都係針對「低扭好啲」「高轉爆啲」……講真吖，談何容易。

低扭呢，真係唔錯，話晒嗰時仲未配直噴，又唔係Twin Scroll。

試車時喺吐露港公園以6波100km/h左右行車，引擎轉速約2700rpm，縮少少油拖吓Brake，轉數落到2200rpm左右，再踩返起，仲算幾好力。高轉呢，你唔會話用好癲好喪形容，只會話佢好大力，好猛好狂，希望咁嘅對比，幫到你了解。

我去年揸過S207，讚佢懸掛調校成熟，好劈與舒服兼備，呢種調校取向、風格，可追溯至S203。如果諗住S203已經係十二年前嘅車，容易afford，你一定會好失望。因為高質、低咪、又有日本富士維修中心定期保養紀錄嘅放盤，閒閒哋都三百幾萬日圓以上

喂！當年新車都係460萬日圓咋喎！

Subaru Impreza S203 規格

售價：4,609,500日圓（2004年12月新車價）

車型：四門五座

體積：（長）4415mm x （闊 ）1740mm x （高）1410mm

軸距：2540mm

引擎：1994c.c. 水平對向4汽缸渦輪增壓，前置引擎

壓縮比：8.0:1

馬力：320匹/6400rpm

扭力：43.0kgm/4400rpm

波箱：6前速手動，四輪驅動

波箱傳動比

1波：3.636

2波：2.375

3波：1.761

4波：1.346

5波：1.062

6波：0.842

最終傳動比（尾牙）3.900

轉向比：13.0:1

懸掛：（前）支柱式；（後）支柱式

制動：（前）透氣碟；（後 ）透氣碟

車重：1445kg（淨重）

油缸容量：60公升

輪胎：Pirelli P Zero Corsa 235/40 R18（新車時配搭）