耐不耐又會有歐洲車廠發表啲驚為天人嘅概念超級跑車，部份更加好有投產意味，show晒specs畀公眾睇，作為一般車迷去睇，實以為佢哋有晒計劃，會喺未來幾年投產。 

不過，要認真搞一部超級跑車，唔單止淨係有高水平技術同「大水喉」，仲要夾埋天時地利，巿場對呢類車嘅渴求程度，更重要係睇埋品牌嘅號召力，總之要睇N咁多項因素，是但一項弱啲，計劃分分鐘爛尾。

1997年W12 Syncro（上）、1998年W12 Roadster（下）

90年代中晚期積極拼搏，力求透過中高檔新產品搣甩廉價平民車形象，躋身一線級數嘅德國福士（Volkswagen）集團，喺公布新世代甲蟲（New Beetle）同Premium Hatchbach（Audi A3/第四代Golf）之後，於1997年秋季嘅東京車展，發表稱為W12 Syncro嘅概念車計劃。

W12 Syncro屬於中置引擎佈局嘅雙座位跑車，雖然冇講明話自己要直踩超級跑車領域，但佢嘅12汽缸引擎，外形由意大利Italdesign頭目——著名汽車設計師喬治阿羅（Giorgetto Giugiaro）已經講明佢唔係講笑，係要認真搞局。熟悉福士汽車嘅車迷，一睇Syncro就知呢部概念跑車配四輪驅動系統。

W12 Syncro嘅12汽缸引擎有別於一般V型佈局，佢採用W型設計，由兩副2.8公升窄夾角嘅VR6 V6引擎組成，總容積為5.6公升，整副引擎只重239kg。早期公布嘅最大馬力為420匹，翌年三月日內瓦車展追加W12 Roadster，動力輸出數字相同，但不設四驅系統，中置引擎後輪驅動。

闊別兩年多，2001年東京車展廠方公布W12 Syncro嘅壓軸版本，稱為W12 Nardo，引擎加配Twin Turbo，最大馬力輸出升至600匹，峰值扭力63.2kgm，配6前速手動波箱配合，0至100km/h加速3.5秒，極速350km/h。翌年2月，W12 Nardo喺意大利拿都（Nardo）試車賽，刷新24小時累計行駛紀錄，總共7740.576公里，平均每小時322.891公里。

W12 Nardo

據悉，當年廠方曾經試探巿場反應，並向買家表示車價約為20萬馬克，以1999年每1.95馬克兌1歐元計算，車價大概係100萬港元有找，可惜有意向嘅買家著實有限，再加上福士集團內有其他品牌成員反對，計劃最終係2003年告一段落。 

唉！開心過咪算囉！