「去日本玩，未搭過夜行巴士，唔算真正年青過囉！」

嗱！呢句說話係好有問題，因為夜行巴士其實都幾逼，再講，好多兄弟姊妹唔認同夜媽媽同啲三唔識七嘅人屈埋喺部巴士有幾過癮！

但係，如果你諗番讀緊U嗰陣，啱啱冇皇管，開始做兼職，有個錢去吓日本玩，逗留日數又唔長，爭分奪秒想去多幾度，你就會明白夜行巴士係唔錯嘅選擇。

當然，而家有廉航，成個世界唔同咗㗎喇！

其實，夜行巴士業界都喺度變緊。最近日本關東巴士（Kanto Bus）同両備ホールディングス（Ryobi Holdings），將會喺1月18日開始推出咗東京池袋至大阪難波嘅個室夜行巴士服務。話得個室，就係一人一格，入到去，你鍾意瞓覺又得，睇漫畫、睇AV、睇巴士、睇飛機、以至打⋯鼻鼾都冇人理你。車種方面係三菱Fuso 12米巴士，全車只有11席（11個室），有公用洗手間。

不過，話得個室，仲要係豪華嘅，都唔算平，大人單程價20,000日圓，兒童單程價15500日圓，抵唔抵睇你自己喇，不過夜行巴士勝在賺番啲時間，個室有張舒服啲嘅椅靜靜哋瞓一覺，第二朝養足精神「買．食．玩」！

開車及抵達時間如下：

東京往大阪，喺池袋站西口7番（晚上10點50分）開車，翌日早上（6點40分）抵達大阪難波City Air Terminal（OCAT）。

大阪往東京，晚上10點40分喺難波City Air Terminal（OCAT）開車，翌日6點40分到達東京池袋西口。

有興趣可以睇吓呢兩個網址：

http://www.bushikaku.net/article/25495/  & https://secure.j-bus.co.jp/hon