Photos: Toyota Japan

咩最後先？好地地點解會同Camry合併呀？

喂！FF同FR點撈埋一齊呀？ 

過去半年，日本汽車銷售界及日本傳媒一直流傳今代Mark X（代號GRX130）將會喺最後一代，生產至2018年底就鳴金收兵，正式結束「Mark字頭」（可追溯至1968年誕生嘅Mark II車系）車系歷史。

類似Mark X呢種走中產路線嘅日本FR房車車系，其實已所餘無幾，你睇日產嗰邊嘅Skyline（包括Infiniti同等檔次車型），骨子裏其實已經換成平治（Mercedes-Benz）嘅引擎同波箱，Mark X所配2.5公升V6同3.5公升V6自然吸氣引擎，與已成當下主流嘅低容積Turbo引擎（泛指2公升以內，直四格局）背道而馳，咁嘅配搭，無論喺日本本土或中國大陸（內地發售嘅稱為銳志，Reiz）巿場嘅吸引力都愈來愈蝕底。當然，亦不能忽視車系年齡愈高，新意欠奉嘅問題啦。喂！GRX130喺2009年推出，7年幾8年喇。

350 RDS級別嘅紅黑內櫳

有消息指豐田已決定將下一代Camry造得更有跑味，有更佳操控表現。另外，改配1.5公升直四Turbo引擎，最大馬力以150匹起錶（視乎級別與銷售巿場），一方面試圖吸納既有嘅Mark X用家（fans睬你都傻）。另方面，迎戰落實改配高輸出版本1.5公升直四引擎嘅本田（Honda）新一代Accord。

如果呢種消息最終全部變成事實，咁Mark X真係幾淒涼。

尋日（11月22日），豐田為Mark X facelift，而呢次facelift好大機會係停產前最後一次。今次焦點，主要係改動車頭鬼面罩同頭燈組合嘅設計，對燈變得惡啲、燈殼嘅線條硬朗啲，鬼面罩拉闊咗少少。級別設定方面，新增名為RDS級別。吓！汽車收音機嗰啲RDS？唔係，係Rakish Dynamic Sports，大概可理解為有輕快動態嘅，哈哈，愈講愈唔明，係唔係想講懸掛更加柔韌呀？係唔係想扮寶馬懸掛tuning呀？珍系唔知。

18吋輪圈

16吋輪圈

好在，豐田都講咗啲實際啲嘅，例如增加咗Mark X嘅溶接點，同使用咗特製嘅黏合劑，增加facelift後Mark X嘅車體剛性。車價由265萬日圓至385萬日圓。

藍色為增加溶接點區域；紅色為使用特製黏合劑之區域

Facelift咗之後仲好靚仔吖