揸超跑當然能顯示品味與家世，亦因超跑愈來愈user-friendly，愈來愈適合daily use，因此一提到要買性能與出得大場面嘅快車，好多人都即時想到法拉利458 Italia或麥拿侖MP4-12C或650S。

平治昨日公布了全新的S-Class Coupe S 65 AMG，就配備了630ps的6公升V12 Bi-Turbo引擎，峰值扭力高達102kgm/2300-4300rpm，在7前速7G-Tronic波箱配合下，由靜止加速至100km/h僅需4.1秒，喺高速公路口加速，絕對有能力壓倒不少高性能跑車，甚至是超跑。速度錶最高刻度為360km/h（但因有限速裝置，極速只可達250km/h），但解除後，極速絕不少於300km/h。

其實，平治已有配備V8 Twin Turbo引擎的S-Class Coupe S 63 AMG，點解仲要推出S-Class Coupe S 65 AMG？V12嘅嘢，你真係未必明。據悉，平治做過相當長時間的研究，佢哋發現有不少忠實fans，相當迷戀V12引擎，鍾情其低轉暢滑，中段醇厚，高轉狂傲力雄的動力質感，即使家吓downsizing有幾巴閉，隨吓都可以五、六百匹，但V12始終有其獨特魅力與韻味，是他們的「我杯茶」。

好老實講，花數百萬買部S-Class Coupe S 65 AMG絕非「高難度動作」，但要你經常用，甚至日日用，燃油開支都相當襟計，所以話，經常揸住部V12引擎嘅豪華轎跑出出入入，絕對證明你財力深不見底，絕非「一剎那的光輝」的「新發財」。

廢排較高的V12引擎向來是眾矢之的，平治將CL 65 AMG的V12引擎再度改良，令廢排水平達到最新的EURO 6標準。另為引擎「化妝」，在S-Class Coupe S 65 AMG裝設怠速引擎關閉系統，令耗油量降至每公升汽油可行駛8.4公里，比CL 65 AMG每公升汽油僅可行駛7公里，改善了20%。