Photos: Nissan Press JP/ www.behance.net/enochgabriel

日產（Nissan）喺5月初收購三菱（Mitsubishi）34%股份，成為車廠最大股東，消息震驚日本汽車工業界。高性能車迷fans第一時間諗到嘅，唔係日產點樣改造三菱，而係著名嘅Lancer Evolution車系有冇機會翻生？ 

人哋傾掂收購冇幾耐，一切落實兼簽齊文件，最快都要2017年，邊有咁快吖。不過，外界估計今次日產睇中三菱，主要有兩方面：第一，係車廠喺發展中地區，例如東南亞、中東、非洲、拉丁美洲嘅品牌認受性及產品銷情相當不俗；第二，係三菱喺電動汽車、電池、乃至充電式混能汽車嘅研究及相關專利設計，日本有分析認為日產希望透過目前「一家親」嘅關係，加快推進日產純電動及充電式混合動力汽車嘅發展。

日產CEO Carlos Ghosn（左）當年由雷諾（Renault）空降至日產，親自統領R35 GT-R開發計劃；

今次佢收購三菱，EVO車系有冇機Reborn？

日產喺6月底已委派要員山下光彥，出任三菱副社長，並由佢統領「事業結構改革室」，成員包括開發部、品質監管部及監測部負責人，目的，就係要執番靚三菱嘅品質。

三菱社長益子修（右）去年表示，三菱唔再發展房車車系，暗示Lancer車系「Game Over」

三菱被收購前，社長益子修喺去年表示廠方停止開發房車車系（即係Lancer），以目前嘅情況，係唔係等如露筍難以重見天日？有長年研究日本三四線車廠嘅日本資深汽車傳媒工作者認為，三菱重新推出Lancer車系嘅機會極微，事實上，無論係今代Lancer嘅基礎級別，抑或係Lancer Evolution X嘅銷情都未達廠方嘅最佳預期，佢亦認為，目前車壇已有不少類似Lancer Evolution，而且好成功嘅對手，三菱想喺呢方面東山再起，絕不容易。即使Evolution車系重生，最快都要2020年，因為三菱開發部正處於「大地震」式嘅人事更替。

另外，即使Evolution能夠再生，好大機會以雷諾中型車系底盤（Megane？）開發，引擎（可能包括摩打）會來自日產，藉此大幅減省開發成本，不過，佢相信四驅系統仍然會有三菱自家設計。

有來自菲律賓嘅圖像設計師Enoch Gabriel Gonzales，最近喺網上發表咗佢對EVO 11嘅構想，都幾好樣吖。但係，雷諾底盤日產引擎嘅露筍，你仲有冇興趣？