豐田（Toyota）汽車，出名實際襟用，大多數車系都好受歡迎，有後續，唔係生產完一代之後就Game Over。 

不過，睇真啲，豐田都有唔少「撻Q」例子，咁係唔係啲車「唔得」唔夠好呢？又唔多似喎，咁可能係時代變咗，又或者消費者嘅口味變咗啦。

所謂「消費者嘅口味變咗」好可能因為經濟環境唔同咗，平車冇人買，又或者唔實用嘅車冇人吼。

而家揭返啲專講八、九十年代日本車嘅專書一睇，你會發現喺日本泡沫經濟爆破前後推出及開發嘅汽車，好多都係玩樂型、「唔等使」，要靚要特別至上，又或者係，擺到明冇乜錢賺嘅，車廠都照樣生產。 

1990年推出嘅豐田Sera係箇中例子，配大面積玻璃嘅鷗翼車門，車尾亦係採用大面積玻璃，呢一次亦係豐田首次同供應商製作咁大面積嘅弧型汽車玻璃。另外，由於全車大部份面積都會被日光照射，車廂溫度自然比一般房車高，豐田特別喺Sera裝配豪華車系嘅高製冷力冷氣系統

Sera係全新車系，雖然話底盤來自掀背車系小福星（Starlet），有得減省成本，但車廂大部份嘅飾件都係全新設計，亦即係特別為Sera設計及製造，仲配備10個喇叭連Woofer音響系統，睇埋當年車價160萬日圓（當年嘅頂級版Starlet都係130萬日圓），絕對唔係廉價細車。

AXV-II概念車於1988年面世，備受外界好評，豐田決定商品化，定名為Sera，於1990年推出巿場

Sera喺1990年3月發售，生產期只有約4年，總產量約有16000部。即使話「唔係廉價」，但有已退休嘅豐田工程師表示，Sera埋單計數，係「蝕本」收場。好在，豐田蝕得起。

豐田香港代理曾經打算喺1991年將Sera引入本地巿場，並曾將一部Sera捐出作1991年「公益慈善咭」獎品車，不過，「大規模引入行貨Sera」計劃最終未能成事，隨後幾年，都有零星水貨抵港。間中喺街仲可以見到Sera，但有唔少已被作不同程度嘅外形改裝，原裝味道大減，無辦法啦，已經係超過四份一世紀嘅車。

[Youtube]https://youtu.be/o2mTl1YfnzQ[/Youtube]