Photos: Toyota Japan

豐田Corolla/Corona兩款房車，曾經喺香港同日本大受歡迎，但自從Corona/Carina喺2001年12月易名為Premio/Allion，轉攻更成熟用家路線及只作本土鎖售之後，成個車系低調晒。 

話轉攻成熟用家路線，實在係講得非常客氣，唔畀面嘅，就直直接接話針對一批消費力唔算強，追隨豐田多年，年過半百嘅務實家庭車用家或退休人士。

Corona車系早見於1957年，係1955年面世，旗艦Crown對落嘅車系，Corona喺六十年代嘅豐田line-up，算係踩住高級車門檻，但隨住豐田車系不斷壯大，Corona衍生咗後來嘅Mark II（出口版稱為Cressida），而豐田喺七十年代擴大本土銷售網嘅時候，因應銷售地區嘅人口年齡組別、消費力氹買車偏好，推出「姊妹車系」，同一底盤*、引擎，但在配置及外形有別，Carina喺1970年成為Corona嘅姊妹車系。 

*第三代Carina曾經與Celica共用FR底盤

第5代Corona，1973年發表

豐田喺1982年請到時任占士邦羅渣摩亞（Roger Moore）為Corona車系宣傳

雖然都係稱為Corona，但Corona EXiV同Corona係有好大分別，當中包括底盤不同，

Corona EXiV只有兩代，分別為第一代（1989-1993）及第二代（1993-1998），

Corona EXiV曾出戰JTCC及澳門東望洋大賽

80年代中晚期，乘住日本泡沬經濟，Corona/Carina兩個車系都變得好潮，流線形到好似concept car嘅車身同中控台設計，但到1996年發表嘅第11代，成部車重回踏實路線，而喺日本發售嘅Corona，更出現咗副名（Sub Name）Premio，呢代Corona曾以行貨形式輸港，配編號3S-FE嘅2公升直四自然吸氣引擎，140匹及19kgm，四前速自動波，極可靠耐用，亦算慳油。

末代Corona曾經輸港，你應該仲記得呢個樣

Corona喺2001年換名轉路線，好大程度上受到MPV同SUV車系夾擊，再加上日本老齡化社會對廣體空間家庭車嘅渴求，Premio/Allion只能退居豐田車系line-up嘅二、三線，不過，日本大廠車系一直有一班穩固嘅支持者/買家，你可以話佢哋固執守舊，用開啱用嘅車，過幾年推出新一代，照樣可以換返同一車系，所以Premio/Allion即使7年轉一次款（今代，即第二代，07年推出至今尚未大轉款），仍有穩定銷情，但有消息指，今代Premio/Allion好大機會係末代產品，如果係的話，日本「阿叔入門級房車」好可能將會成為歷史陳跡。

嚟到呢一代，引擎配搭算多選擇，有1.5、1.8及2.0公升直四，最大馬力分別為109、143及152匹，全部配搭CVT自動波，油耗由19.2km/L至15.2km/L，就算以香港油價嚟睇，都算慳油。今次除咗例牌改動車廂裝飾配搭外，仲加咗鐳射感測系統，能夠check到駕駛者有冇發緊夢，隊到埋前車仲傻吓傻吓，系統見唔對路即自動介入制動，另外，亦會幫手check吓你無端端過線（通常係瞌眼瞓），淨係呢兩樣已經夠晒體貼年紀開始大嘅用家。車價由190萬至268萬日圓，折合約港幣14至20萬。

唉！唔係話我又發白日夢吖，如果十幾萬坐到咁大部Corona，我真係即刻衝落樓去7仔買個叮飯，搣開個盒「筆」兩羮求其「妹兩妹」，即刻lur飯應啦！ 

頂你，我都知呢個gag係好＿爛！