唔少人買新車，尤其是第一、二次買嗰啲，當要面對所選型號有兩、三個級別（Grade），只要價錢唔會差太遠，都會毫不猶疑揀最貴嗰個。心裏面可能咁諗：「前後相差幾萬蚊，OK啦！我畀得起，希望高級啲嗰架靚啲襟啲冇咁多嘢壞啦！」

呢期算係大熱嘅豐田Sienta，喺電油版本抵港約6個月後，追加Hybrid版本，Hybrid版由$248,150起（稱為Sienta Hybrid限量版），頂級Hybrid版（稱為Sienta Hybrid）售$273,910。

假設你對汽車一竅不通，更加唔明白Hybrid科技係乜spring，亦唔覺得電動雙趟門係理所當然，冇就等於要殺頭落地獄的話，咁賣$209,300起嘅Sienta限量版（配1.5公升引擎，冇Hybrid系統）可能最啱你，你更可能認為，前後相差6萬幾，梗係買部平啦！

類似Sienta呢類講求高載客量（可坐7人）的廣體空間小車，除咗要有塞得多人嘅空間外，動力是否充裕（即有啲車迷口中嘅「夠唔夠力」「力水好唔好」）都好緊要。MenClub喺去年八月底試駕過純電油引擎版Sienta，佢最大馬力109匹/6000rpm，峰值扭力13.9kgm/4400rpm，結論係：合格啦！

講真吖，今代Sienta（電油引擎版）車重約1330kg，配一副峰值扭力只有13.9kgm嘅自然吸氣引擎，只算係夠用。如果有人喺你面前講Sienta動力充沛，甚至話動力澎湃，你代我向佢講聲，叫佢去死啦唔該。

如果你以為Sienta Hybrid比Sienta大力好多，呢種想法一定係錯，而且好失望，因為Sienta Hybrid嘅設計目標，唔係要更大power，係要更慳油。廠方嘅耗油數字（日本JC08測計標準）顯示，Sienta Hybrid每公升汽油可行27.2km，Sienta（電油引擎版）每公升汽油可行20.2km。我好易知足（賺錢例外），假設我喺實際環境能夠做到廠方測試數字嘅70%，即約14km/L，已經夠晒皮。

呢篇唔係Sienta Hybrid推廣專輯，我唔會站喺廣告客戶立場一面倒盡數Sienta Hybrid優點。

今次試嘅Sienta Hybrid屬頂級版，外形車廂設備大體上與MenClub去年測試嘅Sienta（電油引擎版）相近，但車身嘅泵把、鬼面罩、倒後鏡位置，就配搭咗藍色嘅車身部件，呢個係Hybrid版嘅設計，唔係香港代理自己加上去，你去到日本見到嘅Sienta Hybrid都係咁。

我自小已好怕呢種藍色，原因不贅。

Sienta Hybrid比Sienta（電油引擎版）重50kg，整個油電混合系統嘅總輸出馬力為100匹，比Sienta少9匹，我唔鼓勵大家拎住兩個版本嘅規格表，坐喺屋企梳化「虛擬比拼」，甚至扮晒專家向你至愛解釋，因為Hybrid車嘅動力輸出，好難直接同純電油引擎對比。

比乜鬼吖，直接約皇冠Sales試齊兩款咪得囉！

Sienta Hybrid比Sienta雖然唔係重好多，50kg，但我揸落已覺得Sienta Hybrid車頭幾重，再準確啲講，係前座至車頭呢前半部份，都比Sienta重，喺屯門公路嘅大彎（小欖、青龍頭至汀九一段），Sienta Hybrid嘅動態真係冇Sienta咁輕快，喺青山公路幾個迴旋處嘅Turn-in、迴旋及出彎表現，都顯得有少少論盡，軚盤輔助力度亦相對Sienta低，所以扭落有啲重。我估計呢個係廠方刻意安排，係站在主動安全嘅立場出發，唔希望用家扭軚太過輕鬆，免得部份用家入彎太快，激化車身前半部負重較高嘅不足（需知道不少揸細車嘅用家，都有扭軚幅度過多嘅壞習慣，尤其揸快車嗰陣 ）。

今代Sienta嘅無段變速自動波箱（CVT）有唔少改善，第一吓踩油門嗰度力陰柔啲，當車速去到你心目中嘅水平，慢慢放鬆或者定住油門，要令引擎去到動力最旺盛嘅輸出段落，易咗好多；但喺Sienta Hybrid，要捕足佢動力最好嘅段落，唔容易，因為佢嘅「黃金動力帶域」唔算明顯。

個人認為，更佳嘅耗油數字固然吸引，而低速下嘅EV（純電動）行車模式，更加係豐田Hybrid科技最可愛同最「Magic」之一，但更易被用家發揮、更清晰感受到嘅黃金動力帶域亦同樣重要，因為呢樣係直接影響到駕駛者嘅暢快度，否則，「大油」唔覺好大power，「細油」又嫌冇力，倒不如簡簡單單揀部電油引擎版算。

Toyota Sienta Hybrid規格

售價：$273,910（$248,150限量版，單邊電動趟門）

代理：Crown Motors www.crown-motors.com

車型：五門七座

體積：（長）4235mm x （闊 ）1695mm x （高）1675mm

軸距：2750mm

引擎：1497c.c. 直列4汽缸，前置引擎

馬力：73匹/4800rpm

扭力：11.3kgm/3600-4200rpm

摩打最大馬力：61匹

峰值扭力：17.2kgm

油電混合動力系統總輸出：100匹

波箱：無段變速自動，前輪驅動

懸掛：（前）麥花臣支柱；（後）扭力桿

制動：（前）透氣碟；（後 ）碟式

車重：1380kg

耗油：27.9km/L