2005年12月起發售嘅第二代豐田bB，已經夠晒期轉款，可靠消息指，第三代bB將於今年11月發表。

由於第二代bB嘅巿場反應及評價冇第一代咁好，目前仍未肯定所謂嘅「第三代」會唔會沿用bB呢個招牌。據熟悉當地豐田汽車銷售網絡嘅人士表示，儘管第二代未能掀起元祖bB嘅熱潮，但第二代嘅顧客層面其實擴闊咗唔少，豐田認為要留住舊客，不容有失，第三代bB如期推出，已成鐵一般嘅事實。

元祖bB

自從第二代開始，豐田將開發及生產bB嘅責任交畀大發（Daihatsu），而大發亦有喺旗下銷售網絡發售bB，掛住大發logo，命名為Coo（出口版，包括香港地區，稱為Materia）。

第二代bB

消息指，第三代bB嘅外形（車身）設計風格，頗大機會回到元祖bB嗰種「硬朗線條」嘅路線，但鬼面罩同頭燈組嘅安排，目前仍未有相對地統一嘅說法。另外，會繼續以兩排五座位及傳統式車門示人，避免重覆Sienta、Spade車系角色。

最震撼嘅，莫過於豐田與同大發，將會聯手開發一款全新嘅1公升3汽缸Turbo引擎，呢款引擎大致上以目前Vitz（出口版稱為Yaris）車系嘅1KR-FE型機器為基礎，加入渦輪增壓技術，豐田又有Turbo細車，咁TRD同Tom’s一定有改裝件啦，元祖bB TRD Turbo當年有150匹，16年後嘅bB TRD Turbo唔知可以改到幾多匹？

1KR-FE型引擎