星期一，鈴木香港代理公布新K-Car Hustler輸港，嗰個post嘅反應好好，大家好多comment。

認真啲睇，意見幾兩極化：

一邊就話好事喎，Like喎，要買喎，等咗好耐喇喎！

另一邊就話，叻極咪又係K-Car，16萬大把嘢揀，點會買佢？

有位巴打話，1966年嘅Corolla都79匹，而家2015年嘅K-Car仲係得64匹，去死啦！

亦有人話，full load上斜，我包保佢實「冇力」。

從事汽車傳媒多年，見慣呢類負評，有謂「肚飽唔知肚餓人」，如果留言者係富甲一方，求其搵人陪一晚都使二三十萬，當然唔會，亦可能無需要理解最新嘅K-Car究竟係乜野一回事，但如果你係揸開廉價汽車，都係咁睇K-Car，冇update自己嘅汽車科技database，請恕我講得直：「你好舊過晒時！」

K-Car喺香港嘅優點往往被人忽視，而佢嘅缺點又經常畀人放得太大，例如：揸呢啲細車，一嘢就畀泥頭車撞死啦！（講呢番話嘅人有冇睇過最新K-Car嘅JNCAP撞擊測試片段）？

如果你覺得負評K-Car係好過癮，我支持你加入插埋一份，插得大力啲，狠啲，深啲，「桶」得盡啲，你過癮之時，好讓頭腦清晰，有獨立思考嘅人，睇到呢類人有幾片面、膚淺。

Suzuki係一間值得尊重嘅車廠，尊重之處唔係話佢啲車好實淨，坦克揩埋嚟都唔會散，亦唔係話佢啲車好high tech，又話者耐用過平治W124 E仔。係欣賞佢哋咁多年嚟，都不斷發掘K-Car嘅可能性，而且有心機做。150萬yen一部車仔，有Turbo引擎，有棍波，有Recaro櫈，避震又有心機tune，660c.c.引擎咩，細緻去調校，盡量畀多啲扭力買家，即使輸出數字都冇大幅上調可能性，仍著力搞去引擎暢滑度、油門反應，冇話因為「得嗰660c.c就放軟手腳hea做」。

平安夜喺日本發表嘅Alto Works，算係近期鈴木嘅得意之作。Works係鈴木歷史好耐嘅級別，檔次同RS不相伯仲。最早期嘅Works級別喺1987年嘅Alto車系出現，Alto Works一路賣到2000年先停產。2002年，Works級別喺Kei車系復出，香港代理當年都有引入Kei Works，筆者都試過車，佢裝有頭LSD，仲記得由太子道東扭入窩打老道個街口，臨入彎前拖到二波，扭入去，前輪啜住啜住咬入彎，好玩！Works級別自2009年暫別日本車壇，一直到今日。

2002年Kei Works

Alto Works其實同今年3月發表嘅Alto Turbo RS相似，都係配一副編號R06A嘅直3 Turbo引擎，不過，Works版配有5前速手動波箱選擇（另可揀5前速自動離合器波箱，唔係dual clutch），Works版喺引擎冷卻方面再落少少功夫，喺頭泵把位加裝進氣口，令引擎水溫由攝氏88度降低至82度，廠方話咁樣有效抑制引擎爆震情況，引擎扭力得以由Turbo RS嘅10.0kgm/3000rpm，稍微上調至10.2kgm/3000rpm。

波箱方面，1、2、3、4波採用密齒比設計，令用家更易經常用盡power band。三個踏板嘅彈簧經過細緻調校，回彈表現更線性，而踩踏行程亦經過縮短，盡可能縮短轉波時間，波棍亦採用「快棍」連桿，呢啲唔係話咩high tech嘢高級嘢，但只要肯做同認真少少好tune，得著可以好大，大大提升操縱質素。