由豐田同豐田屬下嘅GAZOO Racing共同開發嘅86 GRMN尋日發表，1月4日至22日接受認購，限售100部，睇吓邊個運氣好喇。不過，車價要648萬yen（折合約港幣42萬），如果你咁好彩抽到拎番香港出牌，都真係唔平喎。不過，呢類Complete Car始終有叫座力，日後嘅易手價亦相對地高，陪唔陪間廠癲，隨得你。

網民對於呢類車嘅反應，好多時都會話：咁貴！我大把選擇啦，我買架乜乜乜不知幾好啊！（藐晒咀拱樣）。

[Youtube]https://youtu.be/KZDV3FxGvAg[/Youtube]

同你睇睇86 GRMN有咩特別。呢部車只有兩個座位，成部車淨重只有1230kg，比目前最輕嘅普通版86輕30kg。

引擎都係沿用2公升水平對向引擎，最大馬力增至219匹/7300rpm，峰值扭力21.1kgm/5200rpm（普通版86最大馬力為200匹/7000rpm，峰值扭力20.9kgm/6400至6600rpm），動力升幅好細，對買車只睇馬力嘅巴打，「一定唔會揀呢啲車」，唔揀罷就囉！引擎最大改動主要係更換較短嘅活塞銷（Piston Pin），另改用磨擦力較低嘅活塞環。

廠方話想藉此增強引擎喺低轉 扭力嘅反應。

波箱方面，1、2、3波之間採用密齒比設計，最終傳動比（尾牙）由普通版嘅4.1增大至4.3，增快起步及頭段加速。後軸配高扭力型嘅LSD，入彎時分配更多扭力畀外圈尾轆，增快入彎速度，傳動軸採用中空設計，排氣喉裝有活瓣，喺4000rpm打開，以配合更高廢氣流量，平時慢車揸，又夠靜。

提高剛性方面，尾廂部份位置改用厚身金屬板補強，後懸及前懸分別設有V型及橫撐金屬架，豐田話經過咁嘅改動後，86 GRMN嘅剛性比普通86高咗1.8倍。

更重要係86 GRMN嘅引擎艙蓋、尾廂蓋及車頂都採用碳纖維製造，而尾擋風玻璃以樹脂製造，表層備有硬塗層，能夠抵受洗車時所造成嘅刮花或輕微破損，更重要係，「膠玻璃」都內藏埋發熱線，唔怕落雨矇查查，豐田話，呢個咁周到嘅設計，係汽車界首創喎。

胎軨方面，配石橋特製嘅Potenza RE-71R輪胎，頭窄尾闊，頭215/40 R17，尾235/40 R17；軨由RAYS製造，頭17 x 7.5，尾17 x 8.5J。