Photos: stanceandspeed.com

MenClub喺今年年頭做咗個故仔，講保時捷兩位氣冷兄弟，964型同993型911，點解無端端講番呢兩代喺八十年代末同九十年代初期推出嘅911呢？好大程度因為近年車迷，尤其係911迷，覺得以前氣冷引擎啲聲靚，夠震撼，夠立體，另一原因係，好多六、七、八十後嘅波子迷都認同，以前嘅911，車身靚啲，襟睇啲。

近五年迅速「彈起」，深受波子迷膜拜嘅氣冷保時捷911改裝王Singer，可謂食正呢個浪，生意接過不停。點解咁巴閉，因為佢啲手工好靚，亦可以滿足你最天馬行空厭尖聲悶嘅要求。不過，Singer嘅老闆係前汽車設計師，亦係搖滾樂音樂人Rob Dickinson，由佢揸fit嘅Singer，喺2009年一次車展發表活動上，一鳴驚人，自此客人多到做唔切。

不過，Singer嘅入場費唔平，據悉，最少都要約400萬港元起錶，仲有，你自己準備一部氣冷911畀佢。有熟悉本地911易手巿場嘅人士表示，本來喺香港易手車場「唔多人吼」嘅Tiptronic 964型911，短短一、兩年間畀人掃得七七八八，有傳呢啲車畀部份海外易手車商或玩家，拎去Singer「再生」兼「升呢」，變成霹靂無敵快到無影兼靚到爆嘅棍波氣冷靚聲王。

「四球嘢」入場費，未必獲主流「波子迷」認同，但Singer嘅出品確實靚，唔去總壇參觀，買本畫冊睇吓見識吓都要，呢本名為《One More Than 10: Singer And The Porsche 911》除咗大量Singer 911靚相，亦有Rob Dickinson嘅改車哲學，睇多啲大師高人嘅玩車金句，吸收多啲玩車智慧，話唔定終身受到。你話「首先你要有錢」，繼續將歪理合理化，爛泥扶唔上壁就另計啦。

本書賣95美元，12吋 x 10吋，硬皮封面，276頁，寄到嚟香港要幾銀？有心人靠你奶力，自己上網睇吓啦：http://www.stanceandspeed.com/automotive-books/one-more-than-10-singer-and-the-porsche-911。ISBN：978-0-9891149-4-3