2009年發表嘅今代寶馬（BMW）5系，不知不覺間又到咗轉款期。對香港嘅寶馬用家嚟講，今代輸港嘅5系，最成功係有2000c.c. Turbo引擎嘅520i，耗油低，又有8速自動波箱，好順好滑，車廂又大，攞位又易；另外，今代又有配柴油引擎嘅520d，MenClub認識一名520d用家，「打爆」油缸差唔多夠行900km，加埋車隊油卡，幾毫子一公里有交易，唔怪得佢開心到成日請朋友食飯，星期四晚仲話請筆者同班車友食大閘蟹。

今代5系（代號F10）誕生於金融海嘯翌年，你可能話慣性收視效應，

亦可能係產品質素真係好全面，好揸亦好舒服，所以好受歡迎

OK！言歸正傳。代號G30嘅新一代5系，鐵定於2016年秋季發表，近日愈來愈多G30嘅scoop photo喺網上流傳，據悉，新5系大體上冇重大改變，值得留意係前輪後方，亦即係A柱對落，將會新增一個透氣鰓位，來自德國嘅消息指，咁嘅設計，好大機會係車頭鬼面罩、氣壩及輪拱鰓位，增設新一代自動透氣閘，從而降低高速行車時亂流，達到更低嘅巡航耗油，呼應寶馬近年積極提倡嘅EfficientDynamics理念。

引擎配搭方面，撇開相當銷量較低嘅V8及直6型號不談，新5系嘅細c.c.引擎將會「孭重飛」，尤其係新一代嘅寶馬1500c.c.直三Turbo引擎（電油及柴油），最大馬力將介乎180匹至220匹，足以取代今代520i所使用嘅2公升直四Turbo引擎。

另方面，既有嘅2公升Turbo直四引擎，喺輸出數字方面再有提升，據悉，直四引擎嘅高階版（即528i）最大馬力，頗有機會上調至270至280匹水平。

代號G38嘅新5系將於2016年秋季發表

波箱方面，由ZF提供嘅8速自動波呼聲仍然最高，不過，ZF總裁半年前一次公開講話中，唔知有意定無意間提到，廠方正開發比8速更多波段嘅自動波箱（傳統扭力轉換器型式），睇返ZF一向有新設計，都係最先同寶馬分享（應該話：佢兩個大哥一齊合作），照咁睇，G30新5系嘅自動波箱，好大機會唔止8速。

據悉，新5系嘅外型大體與今代（見上圖）分別不大，反而5系GT會致力搣走肥肉，會以瀟灑look示人

乜都假，MenClub最希望本港代理喺下代5系，繼續引入柴油版本。點解？因為真係堅慳油，雖然我哋知好多寶馬友仲未接受到柴油車把聲。