好多有揸車或養車嘅人，都唔知道要定時更換引擎機油，以確保引擎部件有足夠油液，提供潤滑同降溫作用。

間中聽過類似以下嘅情況，有車主N年冇換機油，後來發現部車好大食，引擎又經常處於高溫著晒燈，車房嘅師傅問車主：「你幾耐冇機油？」「ha！乜要換油嘅咩？入油我就有」師傅睇完油尺一睇，眼都突埋，要車主立即換機油，打開個油底，滴出嚟嘅固然係「黑monk monk」，但機油嘅黏稠度已呈「川貝枇杷膏」狀.....

接近95%嘅香港汽車用家，都會交畀汽車代理嘅維修部、車房或油站代換機油，少有親自落手，一嚟要有適當器材，二來換出嚟嘅機油唔知點處置，仲有，換油咁污糟，自問唔熟手，呢啲錢一定要畀人賺。

[Youtube]https://youtu.be/OsL669wfh_M[/Youtube]

潤滑油製造商Castrol（嘉實多）發表咗名為Nexcel嘅全新研製嘅潤滑油系統，睇落成嚿汽車電池咁款，原來佢已內藏引擎所需機油同油隔，實際結構同點運作呢，Castrol未有好詳細透露，但佢哋話當要到期換油，只需揸住Nexcel嘅手抽，成個拉出嚟就得，保證一滴不漏，搞到成地都係。

不過，Nexcel需要喺引擎艙預留位置，設置一個類似docking嘅空間，換言之，唔可以喺目前嘅汽車加裝（大哥，邊度去挖個窿畀你塞入嚟啊？個別供開發測試嘅型號就例外），所以，Castrol已經同多間汽車製造商傾緊，希望佢哋會考慮採納有關設計，Castrol預計最快首批配Nexcel系統嘅新車，都要到2020年先投入巿場，拍住大車廠搞，一定有得造，到時個個都用你嘅system，唔使sell啲客都要用Castrol，正啊！！（算盤就係咁打，響唔響仲未知）

講漏咗，其實Aston Martin嗰部旗艦中嘅旗艦，專攻賽道嘅Vulcan，就係全球首部配Nexcel嘅汽車，唔怪得Aston Martin CEO Andy Palmer都要出嚟講兩句。