福士（Volkswagen）被美國國家環境保護局（EPA）揭發，指過去6年，喺美國出售嘅柴油型號嘅電腦涉及「出貓」，透過隱藏運作模式，可以降低驗車時嘅氮氧化物排放量，從而通過美國環保局廢氣測試檢定。當車輛喺日常行車時，氮氧化物排放量比測試時高出40倍。

事件愈鬧愈大，福士集團行政總裁Martin Winterkorn，於本港時間星期一凌晨宣布成立公司以外嘅獨立委員會進行調查，事隔幾小時，再發聲明表示：「我們破壞了顧客對我們的信任」。昨晚福士美國行政總裁Michael Horn，喺紐約舉行嘅2016年度美國版Passat新車發布會表示：「我們大錯了！」。

「知，咁你又做？」

福士集團行政總裁Martin Winterkorn

福士集團（美國）主席及行政總裁Michael Horn

福士集團已宣布在美停售全新2公升柴油私家車，並召回生產年份由2009年至2015年嘅型號，包括Golf、Passat、Jetta、Beetle，另有來自奧迪（Audi）嘅A3及其他五個柴油型號。涉及車輛數目為48萬2000部，以每部罰款3萬7500美元計，福士或要面臨約180億美元，折合約1404億港元嘅超巨額罰款。

今次醜聞，事緣去年5月，西維珍尼亞州大學（West Virginia University）發現2012年Jetta及2013年柴油版Passat嘅廢排測試結果，多組數據出現矛盾，大學方面遂通知美國國家環境保護局，最終展開有關調查。

2016年度美國版Passat一早安排好在9月21日發表，恰巧「撞正」驗排造價醜聞，大鑊！

最慘係，唔熟車嘅消費者，誤以為電油版Passat一樣呃人，質疑Passat嘅整體質素。

過去十多年，福士集團喺汽車銷售量及汽車工程等多個領域，都取得驕人成就（包括呢個驗車蠱惑裝置）。不過，喺美國嘅巿場佔有率仍然偏低，廠方儘管嘗試努力透過引入新科技型號，仍難敵豐田。

福士「出事」，國際傳媒都在揣測，究竟有冇西維珍尼亞州大學以外嘅人士，向美國政府報料？畢竟，汽車業者好清楚各門各家嘅造車「精妙之處」與「蠱惑位」，大家其實互揸不少「痛腳」，關鍵只在於「出手與否」同「幾時引爆」。

7前初，福士北美分部進行咗TDI柴油引擎超慳油測試。

經過16日，穿越48個州嘅長途旅程，走畢13247公里，只用咗295美元柴油（折合約2300港元）。

咁樣計，平均每公里0.17港元。媽！好抵啊！（希望呢個紀錄無「蠱惑」）。

測試團隊刷新環繞美國48周最低耗油新紀錄（非混能車）。

過去五至六年，美國汽車業界（包括美、日汽車品牌）先後爆出多宗大規模回收事件，涉及零件包括油門、制動及安全氣袋。有業界及傳媒人士分析估計，是次醜聞得以被揭發，不排除係福士集團在美或來自德國本土對手「告密」。

廠方早於2013年進行類似低耗油測試實驗。

福士（Volkswagen）品牌，過去半世紀以來都予人務實可靠、光明磊落及穩健作風，今次事件涉及車輛雖只屬柴油型號，但對普羅汽車消費者而言，對福士品牌嘅整體印象必定大打折扣，往後應該如何重建消費者信心？

呢件事唔會就咁完結，之後必定仲有「大龍鳳」，記得留意MenClub日後報道。