Photos: BMW Press

寶馬E46型3系，香港馬路仲有唔少，如果唔介意擁有「舊咗兩代」，E46型3系其實好抵坐，當然，要有心理準備，要留定預算整車，例如ABS系統或因「跌頂」而需要維修車頂內襯墊。

E46最令人想要嘅，好大機會係M3，E46 M3被評為車身剛度比E36型大有增長，入彎亦積極咗好多，而且「身型」fit咗唔少，更加係最後一代M3採用直六自然吸氣引擎，好有紀念價值同歷史意義。

有留意嗰期嘅E46 3系或M3賽車，可能會認得呢部E46 M3 GTR。呢部曾經贏過2001年美洲Le Mans系列賽（American Le Mans Series，ALMS）GT組別嘅E46 M3 GTR賽車，你應該有印象，因為playstation GT系列同Need for Speed系列遊戲都見過佢。

相比同期採用直六自然吸氣引擎嘅寶馬E46 M3，呢部M3 GTR賽車配一副4公升自然吸氣V8引擎，最大馬力可達444匹/7500rpm，而E46 M3嘅最大馬力，只有343匹，足足多咗100匹。呢款代號P60嘅V8機器，係寶馬賽車部（BMW Motorsport）為M3車系第一款設計及製造嘅V8賽車引擎，佢比直六機器輕30磅，而且更少巧，亦因配備賽車式乾油池（dry sump），引擎可以擺得更貼地，有更低重心。

當年有兩支車隊採用M3 GTR上陣，分別係PTG(Prototype Technology Group)同Schnitzer車隊，M3 GTR嘅強勢姿態，令呢款車喺賽季完結時，贏得全年組別冠軍，亦為Schnitzer贏得車隊冠軍（194分），而車手約克梅拿（Jorg Muller）亦都贏得車手總冠軍（GT組別）。

2001年賽季期間，美國發生911事件，賽事開始前先所有車手及工作人員為死難者默哀

當時大部份GT組別嘅車隊，都使用保時捷996型911 GT3 R或911 GT3 RS賽車，呢批車隊向賽車投訴，認為M3 GTR嘅V8引擎，唔係嚟自大量生產版本（即採用直六引擎嘅E46 M3），極其量只算prototype汽車。寶馬立即喺2001年賽季完結後發售街車版M3 GTR。

根據當年ALMS賽會要求，而生產版本亦要分別喺兩個大洲（continent）發售，但冇規定要生產幾多部。呢類賽例，喺九十年代末至千禧年初嘅房車賽界或耐力賽車界經常有，參賽嘅車廠會「做樣」生產幾部到十部，以達到參賽基本要求。街車版嘅M3 GTR，引擎最大馬力380匹/7000rpm，都係配上文提過嘅P60型引擎，但最大馬力比賽車版少64匹，波箱屬六前速設計，配雙片式賽車離合器，車尾裝有variable locking嘅寶馬賽車部差速器，車廂只有兩張Recaro前座，後座已被拆走。另外，M3 GTR率先成為首部量產M3，裝備碳纖維車頂，比E46 M3 CSL更早。

不過，寶馬陣營同保時捷陣營嘅車隊，仍然為M3 GTR賽車嘅合法性爭論不休，ALMS賽會宣布喺2002年賽季，更改賽例，要求參賽車輛，只少要有100部生產版本及1000台引擎，以符合型號認證（Homologation）嘅基本要求。ALMS賽會鑑於M3 GTR嘅情況，作出特別處理，採用M3 GTR嘅車隊，只要接受「加磅」，就可繼續喺2002年賽季出賽。

寶馬火都嚟埋，立即退出，告別只玩咗一季嘅ALMS。不過，Schnitzer車隊將M3 GTR帶返歐洲大陸，出戰2003年、2004年及2005年德國紐布靈（Nurburgring）嘅24小時賽，先後喺2004年贏得冠軍，翌年再奪冠軍。而揸過M3 GTR嘅車手，都係巨星級，包括韓史德（Hans-Joachim Stuck）、約克．梅拿（Jorg Muller）同迪爾克．梅拿（Dirk Muller）。

呢部屬於PTG車隊嘅E46 M3 GTR賽車（底盤編號M3-GTR-006），喺完成2001年賽事之後，就一直好少露面，乘住今年係寶馬進軍美國賽車界40周年，寶馬美國分部喺PTG車隊昔日成員同BMW Motorsport協助之下，用咗18個月翻新及維修，喺上周末嘅加州蒙特雷（Monterey）經典汽車節（Autobahn Concours D’Elegance）重見天日。