據電單車網站motorcycle.com報道，電單車製造商鈴木（Suzuki），最近向處理專利設計嘅日本特許廳（Japan Patent Office），申請電單車混合動力系統及半自動波箱設計專利。

睇設計圖嘅車架及車身輪廓，真係同GSX-R1000幾似

根據設計專利申請嘅描述，引擎旁邊有一鼓狀電摩打（#43），既能發放足夠電力驅動電單車，另可透過混合動力驅動模式帶動車輛，換而之，呢個電摩打既可當係充電摩打，亦係輸出動力嘅摩打。引擎動力經過半自動波箱傳到車輪。以全汽油模式行駛，波箱會繼續帶動摩打充電。而半自動波箱，令用家喺轉波時無需再拉clutch，當電腦感應到轉波桿嘅角度，就會自動轉高波或拖波。

右邊把手有三粒掣值得講，分別係Starter（#110）、模式選擇掣（#111）同Kill Switch（#112）。模式選擇掣（#111）令用家可以切換純電動行車模式或電力補助模式，行車時再按動Starter（#110）就可令電單車純粹以引擎驅動。暫時未有消息鈴木幾時將Hybrid電單車商品化，但照目前圖片中嘅車架嚟睇，好有機會係GSX-R1000或相近級數嘅型號，當然啦，好可能係求其笠個車架落去啫。

把手右方設有行車模式選擇掣

電單車耗油量相對四輪乘用車低，真係有必要裝副Hybrid系統？

你揸開傳統電單車，又有冇興趣買部真正嘅「電」單車？

（上圖為左方為第一代GSX-R750；右為GSX-R1000 30周年紀念車花版本）