根據非官方數字，香港近年賣出嘅新車（乘用車），有93%配自動波箱。如果你揸過或正在揸緊歐洲品牌嘅自動波車，部車嘅波箱好大機會來自德國波箱製造商ZF。ZF其實係德語「齒輪工廠」Zahnradfabrik（Gear Factory）嘅簡稱。

ZF行政總裁Stefan Sommer提醒，要諗吓波箱波段競賽是否make sense

自動波箱構想早喺1904年出現，當時喺美國已有零星嘅試作品，亦有攪拌機工程師想到以離心力原理製作扭力轉換器（Torque Converter）嘅雛型。幾年後，福特曾在T系列配半自動2前速波箱，但始終未成氣候。二十年代，英國有工程師深入研究及改良扭力轉換器，踏入三十年代，德國開始有車廠量產自動波箱，但距離廣泛應用仍有頗長日子。

直至1939年，美國通用汽車推出以油液作動力傳遞媒介嘅行星齒輪自動波箱，該款波箱被視為今日自動波箱真正雛型。

1939年美國通用汽車發表嘅4前速自動波箱Hydra Matic

二次大戰後初期，全美國自動波車數量只佔全美汽車總量嘅5%，但到1965年，已超逾90%。睇睇歐洲，隨著歐洲區內高速公路數目急速擴建，巿場對自動波汽車需求日增。西德平治喺1961年宣布自行研發自動波箱，並喺代號W112型嘅四門中高檔房車車系上使用。

ZF第一款乘用車自動波箱3HP12

六十年代初，當時仍主力製造貨車波箱嘅ZF，有兩名董事局高層，決定加入開發乘用車自動波箱行列。相比平治、美國汽車業Big Three（福特、佳士拿、通用），以至美國當時著名汽車零部件生產商Borg Warner，ZF絕對係「外行」兼新豬。ZF喺1965年，發表名為3HP12嘅3前速自動波箱，供寶馬及標誌（Peugeot）使用。

寶馬2000C轎跑喺1965年率先採用ZF三前速自動波箱

留意早年ZF自動波箱閘設計，最底係P波，對上係後波，之後先係N波，咁嘅編排，其實有一定風險。

七十年代，汽車界仍然以三前速自動波為主，1978年面世嘅保時捷928，最初期只配3AT（來自平治），大哥，240匹嘅車，配3AT，好玩極有個譜。 ZF喺1978年，有個大膽想法，決定將電子系統引入自動波箱，當時唔少人反對，認為電子系統未夠可靠耐用，不過，想轉波更快更順，電子系統係不可或缺。1982年，ZF正式邁向四前速自動波年代，推出配電子系統嘅全新系列4HP。

奧迪A8前身－Audi V8四驅房車車系嘅四前速自動波箱，內置前差速，當年嚟講，相當先進。

1990年，ZF推出配更強感測功能電子系統嘅五前速自動波箱－5HP。5HP可以根據汽車爬坡斜度，又或有否拖動掛接車輛（例如流動汽車屋），自行跳到最適合波段。ZF嘅5前速自動波箱技術，到1997年又有突破，可供中置引擎佈局車輛使用嘅5HP系列面世，被應用到第一代Boxster。

保時捷第一代Boxster

踏入千禧年不久，寶馬最先採用ZF嘅六前速自動波箱－6HP。2007年率先發表全球第一款8前速自動波箱，並應用於2008年底發表嘅新7系。2008年金融海嘯之後，巿場愈來愈睇重減排慳油汽車技術，ZF喺2011年公布世界首台9前速自動波箱－9HP。9HP最厲害係可以橫置放喺引擎艙下方，夠晒慳位。

寶馬與ZF關係密切，好多ZF新款波箱都率先畀寶馬使用

瑪莎拉蒂自2006年左右轉用ZF六前速自動波箱後，車系整體評價大有提升

最新嘅積架車系，指定以ZF 8前速自動波箱為傳動系統骨幹。

越野路華Evoque配用ZF九前速自動波箱

咁究竟再發展落去，自動波箱會唔會去到15或20速？ZF行政總裁Stefan Sommer去年講過，九前速理論上係極限，但冇嘢係搞唔到，佢建議業界要想想邊際回報遞減定律，同埋再多啲波段係唔係make sense，而ZF內部亦有聲音認為，再喺波段數目上競賽，只係純粹從巿務策略上出發，而非基於機械工程原因。

OK！明晒！

ZF由乘用車自動波箱行外人，變成專家，發展歷程殊不簡單。