蓮花（Lotus）車廠上月喺英國古活賽車節（Goodwood Festival of Speed）發表咗僅重900公斤，但有450匹馬力嘅全新型號3-Eleven，唔少英國跑車迷都嚇一跳，因為成個外形都好辣好爆，你話，喂！冇擋風玻璃，香港實出唔到牌啦！又冇頂，實冇冷氣，haha！呢啲車真係唔啱你嘞！

有啲記性嘅歐洲車車迷，可能仲有啲啲印象記得Lotusr喺幾年前（正確係2007年），推出過2-Eleven，2-Eleven當時只配1.8公升直四引擎，雖然秤埋都係輕，但就唔及3-Eleven嘅500匹/噸嘅馬力重量比（power-to-weight ratio）咁強。3-Eleven喺0至96公里（即0至60哩）加速可於3秒內完成，極速290km/h。

3-Eleven配一台沿自Evora S嘅3.5公升V6超級增壓（Supercharged）引擎，最大馬力450匹，街車版可配六前速手波，專攻賽道嘅版本可配六前速順序式（Sequential）波箱。蓮花車廠話3-Eleven喺廠方自家嘅Hethel測試跑道，刷新最快Lotus（方程式賽車以外）跑車圈速，比車廠第二快嘅跑車，快成10秒。

3-Eleven全車以鋁合金製造，街車版設有翻車保護架，而擾流大尾翼可以喺241km（約150哩）時產生約215kg下壓力。懸掛規格方面，全部四輪獨立雙搖臂，防傾桿可以獨立調校，Eibach彈簧配Ohlins吸震筒，332mm透氣制動碟配四碟卡鉗。3-Eleven將會喺9月份嘅德國法蘭克福車展（IAA）在世界首展。3-Eleven限量生產311部，來年4月起交車。